2 Timɔtɛ́ɔ 4 - Ɔngana á Kɛ̌kɛ

¹ Cɔ, Timɔtɛ́ɔ, nekososi base mosá á Mokonga na Kiísito Yéso, mmbé atenaeka nyɔngɔ ndea ɓakpa nde ɓáku na ɓunde ɓáoenda, ka sɛnɛka akɛ ka koɓoamɛ nɛkɛ:

² phɛá á Nyɔngɔ á Mokonga na ɓukpɛkpɛ, kaɓɛ mbenɔ ánjá, kaɓɛ mbenɔ ájeɗe. Kea á ɓojeɗe base, imisia, ɓá na měma á phiphia ka gbagisaga á měma á ɓakpa esa bui nde ɔɔphɛa.

³ Mbenɔ abikande, nnde ɓakpa ɓáyande ɓɔphɛi á ɗoni, ɓâ ndiu oɓea mɔphɛ nɛɓɔ sasaɓɔ. Ɓáékáɓande ɓagoisigi ɓásii ɓunde ɓáétimbande ka phɛá aɓɔ nyɔngɔ nde ɓɔ ɓáokonda ɔ́ka í.

⁴ Ɓákáɓeekeɛku ɔ́ka á ɓɔphɛi á ɗoni ka kecue aɓɔ, ɓáépháiande ndiu ka ɔ́ka egani á mbɛa.

⁵ Oɓɛ gǎkɛ, óamba ka kema bui, óphiphiɛ tambaga, bɛɗanaga ekuma á tɔ̌mia á Mbino-Ánjá. Tɔtɔkisa ekuma nɛkɔ ánjá.

⁶ Cɔ, k'éme, ɓa ye tɔ bíbí á bisa enda ani ka phɛ́a, ande gea te, kukuwa ani a ye bíbí.

⁷ Ɗémani emani ánjá, ɗéjú ka sungiaga á njoko á gǎ mbangɔ, ɗéambi ɓeekea nɛmɔ.

⁸ Kpangá á Kɛ̌kɛnde, Mokonga amobisíí kekombó á koɗoni, nnde Mɔkɔta mmbé ande nteni nyɔngɔ á ɗoni amopande esa nde abikande goto. Nna tɔndɔ eme, a ndiu phɔtɔ ka ɓakpa ɓɔbu íɓunde ɓákondi ɔna akɛ esa nde asɛnɛkande.

Nyɔngɔ ɗanga-ɗanga á ka sungia á ɓaoɓa

⁹ Cɔ, gea ɓukpɛkpɛ ka donda ani mbangɔ,

¹⁰ nga, Dɛ́ma amosagi ka nyɔngɔ nde, akondi kema á ka mokonda ndee. Yɛ, age ka ntanga-nji á ka Tɛsalɔníka. Kɛɛ́skɛ age nɛkɛ ka ntanga-nji á ka Galatía na Títɔ áoga nɛkɛ ka ntanga-nji á ka Daamatía

¹¹ Cɔ, Lóka sasakɛ áambé a tɔ n'eme. Mbika na Malíkɔ nga, akeni ka engani k'ékuma nɛmɔ.

¹² Ɗénteki Tukíkɔ ka ntanga-nji á ka Ɛphɛ́sɔ.

¹³ Ka bika akɔ, óbika kani na bɔngɔ á k'egogo, nnde ɗéɗu ka Tɔɔ́a, mɔtɛ á Kaápɔ. Óbikambɛ phɔtɔ kani na ɓuku, nndɔ tɔ á nkeke.

¹⁴ Ntombe Alɛsandúɔ ɗámogi ájeɗe phɛɛ. Mɔkɔta amphendande ka ɓeana n'índe ɗági.

¹⁵ Oɓɛ phɔtɔ, óengambɛ na yɛ nga, ayé ɓɔphɛi nɛsu phɛɛ.

¹⁶ Mbenɔ nde ɗétúɔ̌yɔngɛa sasani k'ama mosá-mosá ka ntua á tena á nyɔngɔ, nna tanda na nkpa nde ɗámoengi. Ɓakpa ɓɔbu ɗáɓámoɗu ndiu. Cɔ, Mokonga k'ětangeɛmbɛ ɓojeɗe nɛɓɔ!

¹⁷ Mɔkɔta ndiu aámbé ɗámoengi na áomopa ɓukpɛkpɛ ka gea te, nɛ́tɔmiɛ Mbino-Ánjá nɛkɛ phɛɛ ka gea, ɓakpa nde ɓáná Ɓayúda ɓáɔ́kɛ. Yɛ ɗámoamisi k'aphenɔkɔ á simba.

¹⁸ Amoamisande ka ɓojeɗe bui á ɓaɓiɓia ani. Amoamisande ka ɓojeɗe bui, áomoenga ka ngisa ani ka koɓoamɛ nɛkɛ na koba. Cɔ, obebɔ áɓɛ ka yɛ ka saga na saga! Áɓɛ ɓó.

Mɔkɔ

¹⁹ Nsambea kani Piisíla, Akíla, n'ekombo ndea Ɔnɛsiphɔ́ɔ.

²⁰ Ɛlasítɔ ɗájigi ka ntanga-nji á ka Kɔlítɔ. Ɗénsagi Tɔɔphímɔ ka ntanga-nji á ka Milɛ́tɔ ka nyɔngɔ nde ɗáosamba.

²¹ Ókamisaga bika mosá á matú á phiɔ. Ɛubúlɔ, Púdɛ, Línɔ, Klɔdíɔ, na ɓadasu ɓɔbu, ɓákosambei.

²² Cɔ, Mɔkɔta áɓɛ n'oɓɛ. Ɓonjánja-ékondi nɛkɛ áɓɛ na ɓenu.