2 Timɔtɛ́ɔ 3 - Ɔngana á Kɛ̌kɛ

Ɓɔphɛi á ka sungiaga á mokonda

¹ Cɔ, kanisia phɔ́ nyɔngɔ ndee: k'ésa á sungiaga á mokonda, aɓande esa akpɛ.

² Nga, ɓakpa ɓáɓánde ɓakukuma, ɓákondi imɔna, ɓato ébeba, ɓato éɗokomisa, ɓato á bóma á Mokonga, ɓunde ɓánáɔ̌ɓɔ́ka ɓaɓɔkɔti aɓɔ, ɓato á kanga obebɔ, ɓunde ɓáɔjɔɔkisa kema ndea Mokonga,

³ ɓato á kanga ekondi, kángá á ngomi, ɓatɔngi á mbɛa, ɓato á tondea ɓakpa, ɓato á kanga éamba, ɓakae, ɓayé-ɓonjánja,

⁴ ɓatɔngi-ɓakpa, ɓato á mɔ̌ akpɛ, ɓato étondoa, ɓato á konda nnde ɛ̌ɓɔngɛi kángá á konda gǎkɛ Mokonga.

⁵ Ɓáɔɔnɛkana ka nsɛgɛ ɓea ɓakpa nde ɓáomɓánga Mokonga, na ɓáyé ndiu ɓukpɛkpɛ á Mokonga. Cɔ, óɓángisani na ɓakpa ndɔɔ.

⁶ Ka ɓɔ, ɓáongia mɔtɛ á nkpa, ɓáɛɓɔngande ɓake nde ɓáká na měma ésimbia, ɓunde ɓátúmi na ɓojeɗe, kema á ka mokonda bui aǒɓotea.

⁷ Ɓake ndɔ, ɓáokaɓa égoisaga esa bui, ɓáná gǎkɛ ɔtɔka na ɓáubi koɗoni kau.

⁸ Ɓakpa ndɔ ɓá ɓea Yánɛ na Yambúlɛ, ɓunde ɗáɓápúi kala na Mósa. Nga, ɓakpa ndɔ ɓáyé phɔtɔ nyɔngɔ á koɗoni bui, úbapha nɛɓɔ aújúkani, ɓeekea nɛɓɔ nna na kantíti.

⁹ Cɔ, ɓákátútuisɛku gǎkɛ moangɔ phɛɛ nga, kobóbó nɛɓɔ aɓáeka base k'íso á ɓakpa ɓɔbu ɓíndɔ á Yánɛ na Yambúlɛ.

Ɓɔphɛi á ka sungiaga ndea Pɔ́lɔ ka Timɔtɛ́ɔ

¹⁰ Oɓɛ gǎkɛ, ɗómoɓi bîbíbí ka ɓɔphɛi nɛmɔ, tambea ani, mɔphɛ nɛmɔ, ɓeekea nɛmɔ, phiphia nɛmɔ, ekondi nɛmɔ, phiphia á tambaga nɛmɔ.

¹¹ Ɔphɔtɔ oúba ɓî ɓakpa ɓámodaɗi na tambisaga ani ka Antiɔkía, Ikɔnía, na ka Lísta. Eya, ɗétambigi phɛɛ. Mɔkɔta â gǎkɛ ómoamisa kíndɔ bui.

¹² Ɓakpa ɓɔbu ɓunde ɓákondi enda ka beba á Mokonga ka jukana aɓɔ na Kiísito Yéso ɓáetambisagande.

¹³ Ɓato á ɓojeɗe na ɓademigi, ɓángiande ka ɓojeɗe phɛɛ, ɓáǒdema ɓakpa, ɓakpa ɓâ phɔtɔ ǒdema ɓó.

¹⁴ Oɓɛ, ɓeá tɔ ɓɔphɛi nde ɗɔ́ɔ́ki na nnde ɗóengekisi ánjá nga, ǒɓúba ɓagoisigi nde ɗáɓákogoisigi ú.

¹⁵ Goto, kpangá koniki akɔ, ooúba Ɓuku á Mokonga, nnde aɔtɔka n'akophi kɔɓɔɔngɛ ka gea te, óɓɛ na ɓoamia ka ɓeekea á Kiísito Yéso.

¹⁶ Nyɔngɔ bui nnde ɓáɗundu suɓi á Ɓuku ndea Mokonga, ɓáɗundu ú na ɓukpɛkpɛ á Mokonga, n'akeni ka phangiaga, sɛka á ɓɔphɛi á mbɛa, ka kea, na úbisa á aphe á ɗoni,

¹⁷ ka gea, nkpa ndea Mokonga ámɔtɛgɛ ka měma, áɓɛ na ɓukpɛkpɛ ka tɔtɔkisa á kema bui ánjá.