2 Timɔtɛ́ɔ 2 - Ɔngana á Kɛ̌kɛ

Ɓɔphɛi ka ɓá nto émani anjánjá ndea Yéso Kiísito

¹ Cɔ, oɓɛ miki nɛmɔ Timɔtɛ́ɔ, ɓá na ɓukpɛkpɛ ka ɓonjánja-ékondi nde Kiísito Yéso ɗásóphi.

² Ɓɔphɛi nɛmɔ nnde ɗɔ́ɔ́ki mosá á ɓakpa ɓásii, ɔ́phɛ́a ɓakpa nde ɓákeni ka gea, ɓáɓɛ na ɓukpɛkpɛ á goisaga ɓakpa ɓuangbo.

³ Tambaga ɓea nto-émani anjánjá ndea Kiísito Yéso ɓíndɔ ne kau.

⁴ Nna na nto-émani nde aoga k'aphe émani n'abisi měma akɛ ka enda nde atingani na moangɔ émani, a ndiu tɔ okáɓa gea, mɔkɔta nɛkɛ ánkondɛ.

⁵ Nna phɔtɔ na nto á njoko á gǎ mbangɔ nde ɓámphendande ka tɔka akɛ ka njoko ndɔ, akoɓá na ká ɓǐ moangɔ á njoko ndɔɔ.

⁶ Ngubi nde aɔbɛɗanaga akpɛ, aámbé akeni na ɗúngú á k'ama mosá-mosá.

⁷ Ianaga phɔ́ nyɔngɔ nde nɛɔyɔnga nga, Mɔkɔta akophande ɓukpɛkpɛ á engekisa í bui.

⁸ Cɔ, nkanisia Yéso Kiísito, mosuko á moamɛ Daúdi, mmbɔ ɗájujúki ka kukuwa ɓíndɔ Mbino-Ánjá nde nɛɔphɛa ayɔngi.

⁹ Ka nyɔngɔ á Mbino-Ánjá ndɔ unge, neotambaga kau na ka ɓî ɓámoɓóege na ngoi á ngɔa ɓea nto á ɓojeɗe. Nanga ɓámoɓóaga ɓó, ɓákáɓóege gǎkɛ nyɔngɔ á Mokonga.

¹⁰ Kaɓondɔ unge, nephiphíí tambaga bui ka nyɔngɔ á ɓakpa nde Mokonga ɛ̌sɔmbu ka gea, Yéso Kiísito éamisɛ phɔtɔ ɓɔ ka měma na tɔá á ɓoombia á mɛyɔ.

¹¹ Cɔ, nyɔngɔ nde akeni ɓeekea í: «Aoɓá na ɓeku kimoci na Kiísito, ɓeendande phɔtɔ kimoci na yɛ.

¹² Aoɓá na ɓeophiphia tambaga kimoci na Kiísito, ɓemameande nji kimoci na yɛ. Kaɓɛ na ɓen'yé Kiísito, yɛ phɔtɔ, asóyande.

¹³ Kaɓɛ na ɓékéɔtɔtɔkisa nyɔngɔ nde ɓɛɔyɔnga, yɛ a tɔ ɔtɔtɔkisa nyɔngɔ nde aɔyɔnga nga, nnaɔtɔka n'angáni nyɔngɔ nɛkɛ sasakɛ.»

Ɓá á mbɛɗanigi nde amɓɔngɛi Mokonga

¹⁴ Ókanisia ɓakpa nyɔngɔ ndɔ bui, ɔ́phɛ̌ base mosá á Mokonga gea, ɓákasanɛ mɔnɔ ka nyɔngɔ á kampápa nga, sani nna na kantíti, a ndiu ǒɓúngisaga ɓunde ɓáɔɔ́ka.

¹⁵ Cɔ, oɓɛ ókakamisa ka gea óɓɛ mbɛɗanigi mmbé akeni mosá á Mokonga, mmbé kákuwɛku tanda na soni ka phɔa ekuma nɛkɛ. Ɓá ndiu mbɛɗanigi nde aɔphɛa ka koɗoni nyɔngɔ á ɗoni ndea Mokonga.

¹⁶ Téa yɔngaga á jǎi-jǎi nnde atingani na moangɔ á ɓeekea nga, ɓakpa nde ɓáoɓea nndɔ, ɓáǒɗangamisa na Mokonga phɛɛ.

¹⁷ Nyɔngɔ nɛɓɔ a ɓea embóɗo nde aɔdɛna ka nyama á nkpa bui. Sɔsɔɓɛ aɓɔ ande Imɛnɛ́ɔ na Philɛ́tɔ.

¹⁸ Ɓɔ, ɓásagi ɓɔphɛi á ɗoni, ɓáɔyɔnga te, moangɔ á jujúka á ɓasí ka kukuwa a ye tɔtɔkɛani. Kaɓondɔ, ɓáoɓotea ɓeekea á ɓakpa ɓásii k'ódemayɔ.

¹⁹ Cɔ, etimo nde Mokonga acumi akpɛ aunge aosimbia. Nyɔngɔ nde ɓáɗundu gǔ í aungee: «Mɔkɔta aǒɓúba ɓakpa nɛkɛ.» Goto: «Nkpa buakɛ mmbé aɔyɔnga gea, ande nkpa nde ɓa Mɔkɔta, áɗeketɛ ɓojeɗe.»

²⁰ Eya, suɓi éndu ángbó, nna tɔndɔ na nkumba á láté na ngɔa, a gǎkɛ phɔtɔ na nnde á me na á toko. Nnde á láté na ngɔa, ɓáɔbɛɗaneaga ka jaí, nnde á me na á toko ɓá gǎkɛ ɔbɛɗaneaga ú esa bui.

²¹ Aoɓá nkpa n'ěsokosei ka tokisa á ɓojeɗe bui á ka měma akɛ, aɓande ɓea nkumba nde ɓáɔbɛɗanaga ně ka jaí, nnde mɛna-endu abisi ka mpɛphɛ, n'aɓɔngisi k'ékuma ánjá bui.

²² Timɔtɛ́ɔ, koɓɛmbɛ na mɔphɛ á koganda, káɓa ndiu koɗoni, ɓeekea, ekondi, ɓujɛjɛ kimoci na ɓunde ɓáokumia ina á Mɔkɔta na měma ánjá.

²³ Ya kampápa á kobóbó nnde nna na kantíti ka nyɔngɔ nde oúba gea nndɔ aobikisa sani.

²⁴ Cɔ, kákeni mbɛɗanigi ndea Mɔkɔta ásanɛ. Akeni ndiu áɓɛ nto á aphɔngɔ ka ɓakpa ɓɔbu, mmbé aɔtɔka goisaga na phiphia á tambaga.

²⁵ Mmbé aɔ̌phɛa ɓakpa nde ɓáopúa na yɛ na měma aphɔngɔ. Kǎi Mokonga aeɓophande měma á kětia á tambea aɓɔ ájeɗe, ɓáoúba koɗoni,

²⁶ ɓáǒsóɗoa ka mɛ̌kɔ ndea Nketi, mmbé ɗáekoɗi ka gea, ɓátɔtɔkisɛ mɔphɛ nɛkɛ.