2 Timɔtɛ́ɔ 1 - Ɔngana á Kɛ̌kɛ

Nsesɔ

^1-2 Ka Timɔtɛ́ɔ, miki nɛmɔ ékondi samba. Eme Pɔ́lɔ, nteki nde ɓa á Kiísito Yéso, k'ékondi ndea Mokonga aámbé nekoɗundui ɓaoɓa ndee. Amopi ekuma á úbisa a mɔkɔ á enda, nnde a ka moangɔ ndea Kiísito Yéso. Ɓonjánja, ngomi, na ɓujɛjɛ áɓɛ n'oɓɛ k'ína á Abasu Mokonga na Mɔkɔta nɛsu Kiísito Yéso.

Pɔ́lɔ ansegi Mokonga na phɛá á Timɔtɛ́ɔ

³ Neonsega Mokonga, mmbé nɛɔmbɛɗaneaga na měma ánjá ɓíndɔ ɓatatɛ ɗáɓátúogea. Ne phɔtɔ onsega mbenɔ nde neokokanisia k'ɛ́mɛmi nɛmɔ keiphe n'esa kángá sungiaga.

⁴ Ne phɔtɔ okanisia ngamɔ akɔ, kaɓondɔ unge nena siki á ɔna akɔ phɛɛ ka gea, nétúmɛ na maseye.

⁵ Ne phɔtɔ okanisia ɓeekea nɛkɔ á kanga maibe ɓíndɔ tatakɔ Luísi n'amakɔ Ɛɔníkɛ, ɗáɓátú ně mosá. Kaɓondɔ, neúbi ɗoni gea, ɓeekea ndɔ a phɔtɔ suɓi akɔ.

⁶ Ka nyɔngɔ índɔ unge, nekokanisíí gea, kakamisa egabɔ nde Mokonga ɗákophi, mbenɔ nde ɗébisi njaga gǔ akɔ.

⁷ Nga, Mokonga ɗákásophi měma á kɔɓɔɓɔkɔ. Ɗásóphi ndiu Měma á ɓukpɛkpɛ, ekondi na éamba.

⁸ Cɔ, kokuwɛmbɛ na soni ka ɗigimisa á nyɔngɔ ndea Mɔkɔta nɛsu. Kokuwɛmbɛ phɔtɔ na soni ka phɔani ímbe ne ka mekakɔ ka nyɔngɔ akɛ. Tambaga ndiu na eme kimoci ka nyɔngɔ á Mbino-Ánjá nga, Mokonga aámbé akophi ɓukpɛkpɛ.

⁹ Yɛ aámbé, ɗásóamisi ka měma, áɔsɔ́ɔphana gea, ɓéɓɛ ɓakpa nɛkɛ, nna ka nyɔngɔ á ekuma nɛsu, a ndiu tɔ ka nyɔngɔ á moangɔ nɛkɛ sasakɛ na ɓonjánjá-ékondi nɛkɛ. Nndɔ bui, ɗásóphi kimoci na Kiísito Yéso, mosá á conjá á mokonda.

¹⁰ Kɛ̌kɛnde, ɓonjánja-ékondi ndɔ aúbikani base ka kiɗia á Namisi nɛsu Kiísito Yéso. Yɛ aámbé agɔɓi ɓukpɛkpɛ á kukuwa, áosóphangia base enda á mɛyɔ ka Mbino-Ánjá nɛkɛ.

¹¹ Ka nyɔngɔ á Mbino-Ánjá nɛkɛ ndɔ unge, Mokonga ɗámobisi, néɓɛ ntɔnganisi Mbino-Ánjá, nteki na ngoisigi.

¹² Ka nyɔngɔ índɔ unge neotambaga kau. Ké gǎkɛ na soni í nga, neomúba mmbé ɗémɓeeki. Neengekisi gea, yɛ aámbé ana ɓukpɛkpɛ á amba kema nde ɗámopi na ka ɓî ajaeka.

¹³ Cɔ, amba á nyɔngɔ á ɗoni nde ɗékongoɗi áɓɛ mphangiɔ k'óɓɛ. Ámbá ɓeekea n'ekondi nde ɓeně suɓi á Kiísito Yéso.

¹⁴ Ámbá ánjá nyɔngɔ nde ɗáɓákophi, ka ɓukpɛkpɛ á Měma á kanga ɓojeɗe nnde aiki suɓi akɔ.

¹⁵ Cɔ, a ɓíndɔ ooúba, ɓakpa ɓɔbu á ka Asía ɓámomakei ngɔngɔ. Sɔsɔɓɛ aɓɔ ande Phigɛ́lɔ na Ɛɛmɔgɛ́nɛ.

¹⁶ Ambe Mɔkɔta áɛgeɛ ekombo ndea Ɔnɛsiphɔ́ɔ ɓonjánja nga, ɗáomogbagisaga měma mɔngɔ ásii, kángá á kuwa na soni ɓî ne ka mekakɔ.

¹⁷ Ɓî Ɔnɛsiphɔ́ɔ ɗájú gǎkɛ ka ntanga-nji á Lɔ́ma, ɗámokaɓi na moíngí phɛɛ na ka ɓî ɗámodondi.

¹⁸ O phɔtɔ oúba ánjá phɛɛ gea, ɗámoengi ɓî ɗétú ka Ɛphɛ́sɔ. Kaɓondɔ, ambe Mɔkɔta ánkuiɛ ngomi mosá á Mokonga k'ésa nde abikaeka.