2 Ɓatɛsalɔníka 3 - Ɔngana á Kɛ̌kɛ

Pɔ́lɔ akondi ɓámɛmɛ ka phɔakɛ

¹ Cɔ, ɓaya, ka sungiaga, mɛmani Mokonga ka phɔasu ka gea, nyɔngɔ ndea Mɔkɔta ákamisɛgɛ ndandá, na ɓáɗokomisɛ phɔtɔ ú ɓíndɔ ɓooɗokomisa mɔtɛ-anu.

² Mɛmani phɔtɔ Mokonga gea, ásótókisɛ ka njaga á ɓakpa ɓájeɗe na ɓakae. Nga, ɓakpa ɓɔbu ɓáná na ɓeekea.

³ Mɔkɔta a tɔ ɔtɔtɔkisa nnde ɗáyɔngi. Anógbagisande ka měma, anóambande na Nketi.

⁴ Ka nyɔngɔ índɔ unge ɓebisi měma asu ka Mɔkɔta ka gea, ɓɔ́tɔtɔkisɛ kema nde ɓenósósi, ɓíndɔ ɓootútuisa, na tɔtɔkisa í kɛ̌kɛnde.

⁵ Ambe Mɔkɔta ánɔsɔndɔɛ ka měma k'ékondi nde ɓoně ka Mokonga na ka phiphia nde Kiísito aosópha.

Ambe nkpa buakɛ ábɛɗanɛgɛ ekuma

⁶ Cɔ, ɓaya, ɓenósósi k'ína á Mɔkɔta nɛsu Yéso Kiísito gea, katanani na ɓana-amanu ɓɔbu íɓundɔ ɓakusi na ɓundɔ ɓáyé ɓɔphɛi nde ɗɛ́ɓɛ̌phɛí.

⁷ Nga, ɓo ye oúba sasanu ɓî akeni ɓeá á mphangiɔ nɛsu. Ka nyɔngɔ nde ɗéɓékétú ɓakusi mɔtɛ-anu.

⁸ Ɗékéí ea ndea nkpa ecici. Ɗéɓe ndiu ɔbɛɗanaga keiphe n'esa, ɓéotambaga, ɓɛ́ɔɛla ka kanga bisa ɓoɗoko asu ka nkpa moci sɔsɔɓɛ anu.

⁹ Ɗéɓegi ɓó, nna gea ɗéɓékétú na kɔkɔta ka gea ɓósóengɛ. Ɗébekondi ndiu, ɗeketea anu mphangiɔ ka ɓeá á tambea asu.

¹⁰ Eya, ɓî ɗéɓetú mɔtɛ-anu, ɗéɓenóngoɗi nyɔngɔ ndee: «Mmbé ayé bɛɗanaga, káɛgɛ mɔnɔ.»

¹¹ Ɓɛyɔngi ɓó nga, ɓásóngoɗi gea, ɓakpa ɓuangbo ka ɔlɔ anu, ɓánde ɓakusi kángá bɛɗanaga, ɓáikíí tɔ éngisa ka nyɔngɔ ndea ɓadaɓɔ.

¹² Cɔ, ɓěsósi ɓakpa ndɔ, ɓɛ́ɔ̌phɛa k'ína á Mɔkɔta Yéso Kiísito gea: Ɓábɛɗanɛgɛ ɓíndɔ akeni, ka gea ɓátɔɛ eea nɛɓɔ sasaɓɔ.

¹³ Ɓaya, ɓenu gǎkɛ, ɓókóɛlɛ́ mɔnɔ ka gea ɓonjánja.

¹⁴ A gǎkɛ oɓá nkpa n'ayé ɓɔphɛi nɛsu nnde ɓeɗundu suɓi á ɓaoɓa nde, mɔnjiani nkpa ndɔ ánjá, ɓókóɓeekeanɛmbɛ na yɛ, ka gea ákuwɛ na soni.

¹⁵ Ɓɔ́kɔmbɛɗɛmbɛ ɓea mɓiɓia, mphɛani ndiu ɓea muna-amanu.

Pɔ́lɔ aɔɔkɔwa

¹⁶ Ambe Mɔkɔta mɛna-ɓujɛjɛ, yɛ sasakɛ ánóphɛ ɓujɛjɛ esa bui na ka kema bui. Áɓɛ na ɓenu ɓɔbu.

¹⁷ Mɔkɔ nde, ande á ka njaga ani sasani eme Pɔ́lɔ. Ɓende unge neobisaga njaga ka ɓaoɓa nde neoɗunduaga bui: nndɔ unge ande ɗundua nɛmɔ.

¹⁸ Ambe ɓonjánja-ékondi ndea Mɔkɔta nɛsu Yéso Kiísito, áɓɛ na ɓenu ɓɔbu.