2 Ɓatɛsalɔníka 2 - Ɔngana á Kɛ̌kɛ

Nto á otúkɔtúkɔ abɛɗanagande mosá á ja á Mɔkɔta

¹ Ɓaya, ka nyɔngɔ á ja á Mɔkɔta nɛsu Yéso Kiísito na dondanaga asu na yɛ, ɓenóɗengemisigi gea,

² měma anu kaɗengɛmbɛ ka mbangɔ-mbangɔ na ɓánga, aoɓá nkpa n'anóngoɗi gea, esa á ja á Mɔkɔta ajú. Ɓókǒɓeekeɛmbɛ, nanga ɓáɔtɔa nyɔngɔ, nanga ɓáphɛa, nanga ɓébeba sasaɓɔ gea, ɓána ɓaoɓa nde atóki mɔtɛ-amɔ.

³ Ka nkpa kanódemɛ mɔnɔ k'aphe bubui. Ka nyɔngɔ nde mosá á esa ndɔ, ɓakpa ɓásii ɓán'yande Mokonga, na Nto á otúkɔtúkɔ áɔsɛnɛka, mmbé sungiaga akɛ ande ɓúngaga.

⁴ Yɛ sasakɛ aoyá kema bui nde ɓakpa ɓáobeba na ɗokomisa í ɓea ɓamokonga á mbɛa. Áɔtɔngana suɓi éndu ndea Mokonga, áǒgea sasakɛ ande Mokonga.

⁵ Cɔ, ɓoɓosei ye nyɔngɔ nde ɗénóngoɗi ɓî ɗétú phɔ́tɔ na ɓenu?

⁶ Kɛ̌kɛnde, ɓo gǎkɛ oúba kema nde aoimisia kiɗia á Nto á otúkɔtúkɔ ndɔ ka gea, áɓɛ tɔ ka mbenɔ nde Mokonga ɗáangi.

⁷ Nga, ɓukpɛkpɛ nɛkɛ á ɓɔsɔmɛa a ye ɔbɛɗanaga. A gǎkɛ oɓá kema nde áonimisia kɛ̌kɛnde na ka ye ɓei, mpɔ áɔbɛɗanaga base.

⁸ Mpɔ, Nto á otúkɔtúkɔ áɔɔnɛkana base. Mɔkɔta Yéso ammowande na ɛphɛu á k'aphenɔkɔ akɛ, ka ɓukpɛkpɛ á ɓoombia nɛkɛ aunge antúkatúkande mɓiɓia ndɔ, ka mbenɔ nde yɛ Yéso abikande.

⁹ Bika á nto á otúkɔtúkɔ aɓande ka ɓukpɛkpɛ á Sɛtáni, atɔtɔkisande etéte bubui á ketangaɔ, mphangiɔ, na kema á ɓangisa á odemayɔ.

¹⁰ Ageande ɓojeɗe á odemayɔ bubui ka dema á ɓakpa ɓunde ɓákeni na ɓungaga nga, ɗáɓákáɓeeki na konda ɗoni nde ɗáɔtɔka amisa aɓɔ ka měma.

¹¹ Ka nyɔngɔ índɔ unge, Mokonga ětekisíí ɓukpɛkpɛ á odemayɔ ka gea, ɓáɓeekeɛ nyɔngɔ á mbɛa.

¹² Kaɓondɔ, Mokonga ateni nyɔngɔ á ɓakpa ɓɔbu ɓunde ɓákáɓeeki ɗoni, ɓâ ndiu okonda ɓojeɗe.

Mokonga ɗásɔ́sɔmbu ka amisa asu ka měma

¹³ Ɓaya, akeni gǎkɛ ɓesu ɓémbebɛ Mokonga esa bui ka nyɔngɔ anu, ɓenu íɓunde Mɔkɔta anókondi. Ande gea, Mokonga ɗánɔsɔmbu mosá ka gea, ɓóamɛ ka měma ka ɓukpɛkpɛ á Měma á kanga ɓojeɗe nnde aonóɓotea ka enda ánjá, phɔtɔ ka nyɔngɔ nde ɓoɓeeki ɗoni.

¹⁴ Mokonga ɗánɔɔphani ka ɓoamia ndɔ k'aphe á Mbino-Ánjá nde ɗéɓenɔ́phɛí, ka gea, ɓóɓɛ na ɓoombia ndea Mɔkɔta nɛsu Yéso Kiísito.

¹⁵ Cɔ, ɓaya, mamani akpɛ na ɓóambɛ ɓɔphɛi nde ɗéɓenógoisigi, nanga nnde ɗéɓenógoisigi n'ɛsɔ, nanga nnde á ka ɓaoɓa nɛsu.

¹⁶ Ambe Mɔkɔta nɛsu Yéso Kiísito sasakɛ, n'Abasu Mokonga, mmbé ɗásókondi, áosógbagisaga ka měma ka ɓonjánja-ékondi nɛkɛ ka saga na saga na opha asu nseɓeɔ ánjá,

¹⁷ ánóphɛ ɓukpɛkpɛ, na mamisa anu akpɛ esa bui k'ékuma ánjá, nanga á ɓá kaɓɛɗanaga, nanga á ɓá ka yɔnga.