2 Ɓatɛsalɔníka 1 - Ɔngana á Kɛ̌kɛ

Nsesɔ

¹ Eme Pɔ́lɔ, Síla na Timɔtɛ́ɔ, ɓenósesi sambani. Ɓesu ɓáunge ɓeɗundu ɓaoɓa nde ka ɓato á kanisa ndea Tɛsalɔníka, ɓunde ɓánde ɓakpa ndea Abasu Mokonga na Mɔkɔta nɛsu Yéso Kiísito.

² Abasu Mokonga na Mɔkɔta nɛsu Yéso Kiísito, ánóphɛ ɓujɛjɛ na ɓonjánja-ékondi.

Mokonga atenande nyɔngɔ esa nde Kiísito ajaeka

³ Ɓaya, akeni ɓénsegɛ Mokonga esa bui ka phɔa anu. Aánjá ɓegeɛ ɓó nga, ɓeekea nɛnu aɔmɔta phɛɛ, na ekondani nɛnu ɓenu ɓɔbu, nkpa na nkpa ka dakɛ amɔti phɔtɔ phɛɛ.

⁴ Kaɓondɔ unge, ɓeǒbeba ka phɔanu mosá á ɓato á kanisa ndea Mokonga ka nyɔngɔ á moíngí nɛnu na ɓeekea nɛnu suɓi á tambaga bui na kema ájeɗe phɛɛ nde ɓosuɓi í.

⁵ Tambaga ndɔ aoúbisa base gea, Mokonga ande nteni-nyɔngɔ kángá oɓayɔ. Nga, ka nyɔngɔ á phiphia anu tambaga ndɔ unge ɓokeni na ngia ka koɓoamɛ nɛkɛ nnde ɓootambaga ka nyɔngɔ í.

⁶ Eya, Mokonga ande nto á ɗoni, aětambisagande ɓunde ɓáonótambisaga.

⁷ Cɔ, ɓenu íɓunde ɓootambaga, Mokonga anóphande muumbiɔ kimoci na ɓesu mbenɔ nde Mɔkɔta Yéso asɛnɛkande. Atókande na koba, kimoci na ɓamalaéka nɛkɛ ɓunde ɓána ɓukpɛkpɛ.

⁸ Adidande k'ɛɛmbɛ á nsa. Aětambisagande ɓunde ɓánaomúba Mokonga, na ɓunde ɓáoyá ɓeekea á Mbinɔ-Ánjá ndea Mɔkɔta nɛsu Yéso Kiísito.

⁹ Tambaga nɛɓɔ, aɓande otúkɔtúkɔ á kanga sungiaga, na katana ɗanga na Mɔkɔta, na katana ɗanga na ɓoombia á ɓukpɛkpɛ nɛkɛ.

¹⁰ Nndɔ, atɔtɔkɛanaeka k'ésa á ja akɛ. Wa, ɓakpa nɛkɛ ɓɔbu ɓunde ɓámɓeeki, ɓánɗokomisaeka, ɓáotangaaga ɓoombia nɛkɛ. Ɓenu phɔtɔ, ɓoɓande sɔsɔɓɛ aɓɔ nga, ɓoɓeeki nyɔngɔ nde ɗéɓenɔtɔ̌mi.

¹¹ Kaɓondɔ unge, ɓɛɔmmɛma Mokonga esa bui gea, ánóphɛ ɓukpɛkpɛ á ɓá ɓakpa nde ɓákeni ka mɔphani nɛkɛ. Ánoengɛ phɔtɔ na ɓukpɛkpɛ nɛkɛ ka gea á ɓonjánja nde ɓokondi. Átɔtɔkisɛ phɔtɔ ekuma nɛnu nnde ɓogi ka nyɔngɔ á ɓeekea akɛ.

¹² Mpɔ, ɓáobeba ina á Mɔkɔta nɛsu Yéso ka nyɔngɔ anu, ɓâ phɔtɔ onóbeba ka nyɔngɔ akɛ ɓondɔ. Nndɔ bui atɔtɔkɛanande ka ɓonjánja-ékondi ndea Mokonga na Mɔkɔta Yéso Kiísito.