2 Ɓakɔlítɔ 9 - Ɔngana á Kɛ̌kɛ

Ɓɔphɛi ka nyɔngɔ á egabɔ ka ɓaɓêki

¹ Ɓaya, kákeni goto nénoɗunduiɛ nyɔngɔ á taɓeá á ɓakpa ndea Mokonga ɓunde ɓá ka Yudɛ́a.

² Neúbi ye mɔphɛ ánjá nɛnu. Kaɓondɔ, něbebi ka nyɔngɔ anu, mosá á ɓato á ka Makɛdɔnía, néǒgea te: «Ɓakiísito á ka Akáya, ɓá ye ɛ́ɓɔngisigi ka taɓeá kpanga ka saga nde anyɛ́nyima.» Moíngí nɛnu, aéɓotei ɓakpa ɓásii ka ɔlɔ aɓɔ.

³ Kaɓondɔ, nenótekisíí ɓadasu ka gea, ebeba nde neně ka phɔanu, kaɓɛmbɛ á jǎi. Akeni ɓóɔ́ɓɔngisiɛgɛ ɓíndɔ ɗéyɔngi.

⁴ Nga, aoɓá na nekiɗi ye na ɓato á ka Makɛdɔnía ndɔ na ɓókóɔ́ɓɔngisigimbɛ, ámbé ɓekuwande na soni ka nyɔngɔ nde ɓenóseɓei. Soni ndɔ aɓande phɔtɔ ka ɓenu.

⁵ Kaɓondɔ, nɛtɔ́ɔni ánjá, ɔphana ɓadasu ndɔ, ɓámɔmɛɛ mosá ka gǎ mɔtɛ-anu ka bisa ophangɔ égabɔ ékondi nɛnu ɓíndɔ ɗɔ́ɓɔɔku mosá. Nejuande ye tɔ na ɓá ye ɓɔngisigi kema bui, na nndɔ aɔnisande gea, ɓoogaba na měma mo kángá á sosea anu.

⁶ Cɔ, kanisiani phɔ́ mɛní ndee: «Ookona ábɔa, ô ɗungua ábɔa. O gǎkɛ okona ásii, ô ɗungua ásii.»

⁷ Akeni nkpa ágabɛ ɓíndɔ měma akɛ anteki, kángá á ianaga, kángá á sosea akɛ. Nga, Mokonga ankondi nkpa nde aogaba na maseye.

⁸ Mokonga ana ɓukpɛkpɛ á opha anu kema ásii phɛɛ ka gea, ɓóɓɛ na kema bui nde ɓookonda. Gǔ índɔ goto, ɓoɓande na nnde ɓɔtɔtɔkisande ně kema ánjá bubui.

⁹ Nga, Ɓuku á Mokonga agi te: «Nkpa anjánjá agabi nkumba ásii ka ɓato á ɓuyɛnɛ, ɓonjánja nɛkɛ ande á mɛyɔ.»

¹⁰ Mokonga aámbé aomopha ngubi mbó na eea nde aoea. Mokonga anóphande phɔtɔ mbó bui nde ɓona siki í na mɔtisa í mpɔ ɓonjánja nɛnu áɔgɔmbisa mbuka ásii.

¹¹ Mokonga anóphande ɛtɔi ásii ka gea, ɓóɓɛ na ɓukpɛkpɛ á gabea á ɓakpa mbenɔ bui. Mpɔ, ɓáombeba Mokonga ka nyɔngɔ égabɔ nɛnu nde ɓɛ̌nyɛ́nyisiande.

¹² Nga, ekuma ndɔ ɓɔɔbɛɗanaga, nna tɔ ka enga á ɓakpa ndea Mokonga. A phɔtɔ kǒɓopha ɓakpa mɔphɛ á sega Mokonga phɛɛ.

¹³ Ɓǒphangiande ɓakpa base ekuma nɛnu ánjá. Ɓakpa ɓásii ɓánɗɔkɔmisande Mokonga ka nyɔngɔ á ɔ́kapha anu. Nndɔ ungɔ aoɗigimisa ɓeekea nɛnu ka Mbino-Ánjá ndea Kiísito. Ɓámbebande phɔtɔ ka nyɔngɔ á ɓonjánja nɛnu ka égabea ɓɔ nkumba nɛnu na ɓuangbo ɓɔbu.

¹⁴ Ka nyɔngɔ ékondi ásii, aunge ɓakpa ndɔ ɓámɛmande Mokonga ka phɔanu ka nyɔngɔ á ɓonjánja-ékondi ndea Mokonga ka ɓenu.

¹⁵ Cɔ, ɓosegi ka Mokonga ka nyɔngɔ á egabɔ nɛkɛ ángbó phɛɛ.