2 Ɓakɔlítɔ 8 - Ɔngana á Kɛ̌kɛ

Moangɔ á enga ɓakiísito á ka Yɛusalɛ́ma

¹ Ɓaya, ɓekondi ɓóúbɛ ɓî Mokonga aɔnisi ɓonjánja-ékondi nɛkɛ ka kanisa bubui á ka Makɛdɔnía.

² Nanga ɓî ɓaɓêki ndɔ ɗáɓáotambaga, ɓâ tɔ oɓá na maseye phɛɛ suɓi í. Nanga ɓî ɗáɓátú ɓato á ɓuyɛnɛ, ɗáɓátú ogaba phɛɛ.

³ Ɗɛɔni n'íso ani sasani ɓî ɓáphúi imɔna na ɓukpɛkpɛ nɛɓɔ bui. Mbusa, ɓâ goto ophúia ásii phɛɛ kángá á sosea aɓɔ.

⁴ Ɗáɓásóɗengemisigi phɛɛ gea, ɓééyameɛ ka nyɔngɔ á enga ɓakiísito ɓunde ɓá ka Yudɛ́a.

⁵ Ɓáogaba kɔnyɛ́nya nseɓeɔ nɛsu. Nga, ɗáɓáebisi ka njaga á Mɔkɔta sasaɓɔ. Mpɔ, ɓáoɓeekea nyɔngɔ nɛsu bui ɓíndɔ Mokonga ɗákondi.

⁶ Kaɓondɔ unge ɓɛmɔphani Títɔ ágɛ mɔtɛ-anu ka gea, átútuisɛ ekuma égabɔ ndɔ ɗákpangi na ka ɓî agande ɔgɔɓɛa ú.

⁷ Cɔ, ɓenu, ɓona kema bubui, kaɓɛ ɓeekea, egabɔ á yɔnga, úbapha, moíngí kángá á sungiaga. Ɓo phɔtɔ n'ekondi ásii ka ɓesu. Kaɓondɔ, ɓekondi ɓɔ́ɔnisɛ phɔtɔ gea, ɓona kema bui k'ékuma ndɔɔ.

⁸ Kéonósosea, ne ndiu ɔyɔnga nyɔngɔ á moíngí nde ɓadanu ɓátú ně. Kaɓondɔ, nenóphi mbenɔ á ɔnisa gea, ekondi nɛnu ande á ɗoni.

⁹ Nga, ɓo ye oúba ɓonjánja-ékondi ndea Mɔkɔta nɛsu Yéso Kiísito: Yɛ, ɗátú ntɔi, áǒbisa nto á ɓuyɛnɛ ka nyɔngɔ anu, ka gea te, ɓóɓɛ ɓatɔi ka ɓeana na ɓuyɛnɛ nɛkɛ.

¹⁰ Cɔ, kanisia ani ka nyɔngɔ ndɔ aɓe: Aánjá ɓɔ́sɛkisiɛ ekuma ndɔ ɓíndɔ ɗóɓokpangi ka saga ndɔ anyɛ́nyi. Nga, ɓenu ɓáunge ɗóɓokaɓi ekuma ndɔ mosá-mosá ka saga nde anyɛ́nyima, ɓô phɔtɔ ko anga tɔtɔkisa í.

¹¹ Cɔ, kɛ̌kɛnde, kpeengeanisani ekuma kau. Mbenɔ nde ɗóɓoangi tɔtɔkisa í, ɗɔ́ɓɔɔnisi mɔphɛ ánjá nɛnu phɛɛ. Ɓî ɓo tɔ na mɔphɛ ánjá ndɔ, ɓokpeengeanisande ekuma ndɔ ka ɓeana n'ɛtɔi nɛnu.

¹² Nga, aoɓá na ɓobisi mɔphɛ ánjá, Mokonga aɓeekeande kema nde ɓogabi, ka ɓeana na nnde nkpa aně, nna gǎkɛ k'índe nkpa nna ně.

¹³ Nga, kégi gea ɓóenge ɓadanu ka gea ɓóɓɛ ɓato á ɓuyɛnɛ, a ndiu ka gea, ɓóɓɛ tɔ na ɓɔ kimoci.

¹⁴ Kɛ̌kɛnde gǎkɛ, ɓî ɛtɔi nɛnu aásii, gabani ú ka ɓakpa nde ɓá na siki í ka gea te, esa nɛngbo nde ɓoɓaeka na siki í, na ɓɔ ɓá n'ɛtɔi ásii, ɓánógabeaeka phɔtɔ ú. K'aphe ndɔ unge, ɓoɓande kimoci na ɓɔ,

¹⁵ ɓíndɔ Ɓuku á Mokonga agi te: «Mmbé ɗákɔngu ásii, ɗákájigi ně ásii, mmbé ɗákɔngu ábɔa, ɗákáúki ú.»

Titɔ na ɓadakɛ ɓáge na Kɔlítɔ

¹⁶ Obebɔ ka Mokonga, mmbé amophi Títɔ moíngí ka enga anu ɓíndɔ ɓeogea.

¹⁷ Nga, aɓeeki mɔphani nɛsu na nténdé, áosuia gǎ á mɔtɛ-anu ka mɔphɛ nɛkɛ sasakɛ.

¹⁸ Cɔ, ɓenteki Títɔ na dasu moci, mmbé kanisa bui ambebi ka nyɔngɔ á ekuma nɛkɛ á tɔ̌miaga Mbino-Ánjá.

¹⁹ Kanisa bui ansɔmbu gea, ágɛ na ɓesu k'aphe á bɛɗanaga ekuma ndɔ égabɔ. Ɓɛɔɓɛɗanaga ekuma ndɔ, ka ɗokomisa á Mɔkɔta sasakɛ na ka phangia mɔphɛ asu ánjá.

²⁰ Ɓékékóndi gea, ɓásoyeyɛ k'ékuma nde ɓásóphi ka bɛɗaneaga na imɔna ásii ndɔɔ.

²¹ Ɓeokáɓa gea ánjá, nna tɔndɔ mosá á Mɔkɔta, a ndiu phɔtɔ mosá á ɓakpa.

²² Cɔ, ɓenteki dasu moci na ɓakpa ndɔ ɓáge. Mbusa á ɔnjia á tambea akɛ mɔngɔ ásii, áɔ̌sɔɔnisa gea ana moíngí phɛɛ. Kɛ̌kɛnde gǎkɛ, yɛ asui phɛɛ nga, anóbisíí měma.

²³ Títɔ ande phɔtɔ dani. Nɛɔbɛɗanaga kimoci na yɛ ka ɓenu. Ɓadasu íɓundɔ ɓáge na yɛ, kanisa unge aéteki, ɓáɔbɛɗanaga ka ɓoombia á Kiísito.

²⁴ Kaɓondɔ, phangiani ekondi nɛnu ka ɓakpa ndɔɔ. Mpɔ, kanisa bui aengekisande gea ɓena ekondi ka ɓenu na úba gea, ɓekeni ébeba na ɓenu.