2 Ɓakɔlítɔ 7 - Ɔngana á Kɛ̌kɛ

¹ Cɔ, ɓaya, mɔkɔ ɗanga-ɗanga ndɔ ande asu. Ɓadani ékondi, ambe ɓéesokoseɛ ka tokisa ɓosoɛ nde aosoomisa nyama na měma asu. Ambe ɓékaɓɛ ɓá ɓato á kanga ɓojeɗe na ɓánga á Mokonga.

Pɔ́lɔ atúmi na maseye

² Ambe měma anu ákoɗokanɛ ka ɓesu. Nga, ɓékéngǐí nkpa ájeɗe, ɓékémúji nkpa, ɓékémbɛɗanisigi nkpa ecici.

³ Kɛ́yɔngi nndɔ ka nyɔngɔ á tenea anu nyɔngɔ akpɛ. Nga, a ɓíndɔ ɗégɔɓi na nenóngoɗi gea, měma asu akoɗokani ka ɓenu phɛɛ, kaɓɛ ka kuwa, kaɓɛ ka enda ɓe tɔ kimoci.

⁴ Nenóseɓei phɛɛ na ɓe phɔtɔ ǒbeba na ɓenu. Nanga ɓétambaga, měma ani atúmi na nténdé na maseye.

⁵ Nga, mbenɔ nde ɗéɓejú ka Makɛdɔnía mosá, ɗéɓékéúmbi, ɓê ndiu otambaga phɛɛ: Oyombɔ, ɓéoɓá na ɓánga.

⁶ Cɔ, Mokonga, mmbé a gǎkɛ ɔ̌kɔmbɛa ɓakpa iɓo á ngamɔ ɗásɔ́kɔ́mbɛi iɓo á ngamɔ ka kiɗia á Títɔ.

⁷ Nna tɔ kiɗia á Titɔ unge ɗásɔ́kɔ́mbisisi iɓo á ngamɔ, a ndiu phɔtɔ ka nyɔngɔ nde ɓotómmɛsi ngɔngɔ. Ɗásóngoɗi gea, ɓona siki á ɔna ani, áosongoɗea phɔtɔ nyɔngɔ á esúia anu na ɓî ɓootétemisa mamea á nyɔngɔ ani. Kaɓonɗɔ unge, nena maseye ángbó phɛɛ.

⁸ Cɔ, nanga ɓaoɓa nde ɗénóɗundui ɗánɔɓɛisi, ké phɔ́ otangaaga nndɔ. Ɗétangaigi ndiu mbenɔ nde neúbi gea ɓaoɓa ndɔ ɗánɔɓɛisi ka mbenɔ ábɔa.

⁹ Cɔ, kɛ̌kɛnde gǎkɛ, nena maseye. Nna gǎkɛ ka nyɔngɔ á ɓɛí ndɔɔ. A ndiu ka nyɔngɔ nde ɓɛí ndɔ akěti tambea anu. Ɓɛí ndɔ ɗátú mɔphɛ á Mokonga. Nanga ɓî ɓékénogǐí ájeɗe.

¹⁰ Nga, esúia nde aotóka ka mɔphɛ á Mokonga, aoketia tambea ka ɓá na ɓoamia á ka měma, ianaga káɓéku ye. Esúia á mɔphɛ á ka mokonda a gǎkɛ okusisa.

¹¹ Cɔ, ɔ́nani phɔ́ kema nde esúia nde ande á mɔphɛ á Mokonga aobikisa: Ɓá na moíngí phɛɛ, ɛ́yɔngɛa, kangea ɓojeɗe, ɓá na ɔ́kapha, ɓá na mɔphɛ á ɔna ani, ɓá na mɔphɛ á bɛɗaneaga ani, keea ɓojeɗe. Kaɓondɔ, ɓɔɔnisi gea, ɓókótú suɓi á nyɔngɔ ndɔɔ.

¹² Cɔ, kaɓɛ na ɗénóɗundui, nna tɔndɔ ka nyɔngɔ á nkpa ndɔ agi ájeɗe ka phɔa dakɛ, kaɓɛ mmɓɔ dakɛ angǐí ájeɗe. Ɓaoɓa ndɔ ɗá ndiu ka ɓenu gea te, ɓɔ́ɔnɛ sasanu mosá á Mokonga ɓî ɓosogǐí ánjá.

¹³ Nndɔ ungɔ asóphi ɓukpɛkpɛ. Bǎ á ɓukpɛkpɛ ndɔ, ɓê phɔtɔ oɓá na maseye ángbó goto ka ɔna ɓî ɗóɓongɛgi Títɔ ánjá.

¹⁴ Eme, neǒbeba na ɓenu mosá akɛ nga kéku na soni. Ɓî ɗéɓeonóngoɗea esa bui nyɔngɔ á ɗoni, na ébeba asu na ɓenu mosá á Titɔ ɗátú tɔ ɗoni.

¹⁵ Títɔ anokondi phɛɛ nga, aokanisia ɓíndɔ ɗɔ́ɓɔɔmɔ́ka yɛ, ɓóonsesea, ɓóonɗokomisa na ɓánga akɛ.

¹⁶ Eme phɔtɔ, nena maseye. Nenóseɓei ka nyɔngɔ bui.