2 Ɓakɔlítɔ 6 - Ɔngana á Kɛ̌kɛ

¹ Cɔ, ɓesu íɓundɔ ɓɛɔbɛɗanaga kimoci na Mokonga, ɓenóɗengemisigi gea, ɓókóɓɛnjiɛgɛmbɛ ɓonjánja-ékondi nde Mokonga anóphi.

² Nga, Mokonga agi: «Ka mbenɔ ánjá, ɗɛ́ɔ́ki ɛmɛmi nɛkɔ. K'ésa á ɓoamia á ka měma, ɗékoengi.» Cɔ, mbenɔ ánjá ndɔ ajú. Esa á ɓoamia ndɔ aungee.

³ Ɓékékondi ɓɛtisa á nkpa n'ephiphi ka kema bui nga, ɓeóɓánga ɓakpa sɛkaga ékuma nɛsu.

⁴ Ɓe ndiu okaɓa gea, ɓakpa ɓásɔɔnɛ ɓea ɓabɛɗanigi ndea Mokonga esa bui. Kaɓondɔ unge, ɓeophiphia phɛɛ tambaga, ngomi na ea á minyɔ.

⁵ Ɗáɓásóɓindi na makea asu ka mekakɔ, ɓakpa ɓáosobikisia oyombɔ, ekuma áosóphûmisa, ɓékéɓɛ na tɔ̌ k'íso na ika kángá eaga ka nyɔngɔ á mɛma Mokonga.

⁶ Ɓɛɔ̌ɔnisa sisasu gea ɓende ɓabɛɗanigi ndea Mokonga ka esokosea asu, úbapha asu, ɓá asu na měma á phiphia na ɓonjánja. Ɓe kimoci na Měma á kanga ɓojeɗe k'ékondi nɛsu á ɗoni á ɗoni.

⁷ Ɓe tɔ ɔtɔmiaga nyɔngɔ á ɗoni. Ɓɛɔbɛɗaneaga ɓukpɛkpɛ á Mokonga. Nkumba émani nɛsu ka mana ně na kéúnia ně ande koɗoni mosá á Mokonga,

⁸ nanga ɓásoɗokomisa kaɓɛ tóndea asu, nanga ɓásobeba kaɓɛ bóma asu. Ɓuangbo ɓáogea te, ɓende ɓademigi, nanga ɓéɓá ɓato á ɗoni.

⁹ Ɓáɔsɔ́ɔna ɓea ɓakpa nde ɓákáoúbukana, na ɓe ndiu oúbukana ánjá. Ɓáɔsɔ́ɔna ɓea ɓasí na ɓe phɔ́tɔ koenda. Ɓáosótamɓisaga kángá á mowa asu.

¹⁰ Ɓáɔsɔ́ɓɛisa na ɓe gǎkɛ na maseye esa bui. Ɓáokanisia te ɓende ɓaúki, na ɓendiu ɔ̌tɔisa ɓakpa ɓunɛngbo. Ɓáokanisia te ɓéké na ka kema, na ɓe ndiu na kema bubui.

¹¹ Cɔ, Ɓakɔlítɔ ɓaya, ɓétónɔyɔngɛi base gea te měma asu atókoɗokani ánjá ka ɓenu.

¹² Ɓékétónoɗakei měma, ɓenu gǎkɛ ɓáunge ɓotósóɗakei měma anu.

¹³ Nɛɔyɔnga na ɓenu ɓea aba-ɓaniki na ɓ'anakɛ. Ɓenu phɔtɔ geani ɓó ka ɓesu. Ósókóɗeani měma anu!

Ɓókódaɗuɛ mɔnɔ ɓonjánja na ɓojeɗe

¹⁴ Ɓókóɗakatɛanɛ mɔnɔ na ɓakpa nde ɓákámɓeeki Mokonga. Koɗoni na ɓojeɗe a kimoci? Owanga na kindi a kimoci?

¹⁵ Kiísito na Nketi, ɓáɔtɔka na ɓáɔ́kani ka ɓo? Cɔ, mɓêki na nkpa nde kámɓeeki Mokonga ɓáɔtɔka ɔ́kana k'éke?

¹⁶ Endu ndea Mokonga n'endu ésomba á ɓaketi a kimoci? Nga, ɓende endu ndea Mokonga mmbé aoenda. A ɓíndɔ Mokonga ayɔngi gea: «Neikande sɔsɔɓɛ aɓɔ na netambande kimoci na ɓɔ, Neɓande Mokonga nɛɓɔ, ɓáoɓá ɓakpa nɛmɔ.»

¹⁷ Kaɓondɔ unge Mɔkɔta agi: «Tókani ka ɔlɔ aɓɔ, ɓókatanɛ na ɓɔ. Ɓókodungɛ mɔnɔ ka ɓosoɛ, mpɔ, eme nenóseseande.

¹⁸ Neɓande abanu, ɓoɓande baseka na ɓaganda nɛmɔ. Mmbé ayɔngi nndɔ, ande Mokonga Mɛna-Ɓukpɛkpɛ.»