2 Ɓakɔlítɔ 5 - Ɔngana á Kɛ̌kɛ

¹ Cɔ, ɓeoúba gea, nyama asu a ɓea ɛma nde ɓeoenda suɓi í ka mokonda nnde aɔngbɔɔkana, Mokonga asóbisíí endu na koba, nnde aoiphia mɛyɔ. Nna ɓakpa ɓáunge ɓáphɛkande.

² Kɛ̌kɛnde, ɓeoɓénga phɛɛ ka nyɔngɔ nde ɓena mɔphɛ phɛɛ ka gea, Mokonga ásóphɛ nyama á na koba.

³ Nga, ɓe ye kɔɔ́la ú, ɓékéúkɛku ye nyama.

⁴ Ɓî ɓe phɔ́tɔ koenda suɓi á ɛma ndɔ á ka mokonda, ɓeoɓénga ɓea nkpa n'akúmbi nkumba áɗoko phɛɛ. Nna gea te, ɓekondi gea, Mokonga átokisɛ nyama á ka mokonda ndee. Ɓekondi ndiu gea, ásóphɛ nyama á na koba ka gea, nnde aoenda mɛyɔ ámiɛ nnde aokuwa.

⁵ Mokonga aámbé asɔɓɔngisigi ka ɓá na enda á mɛyɔ. Asóphi phɔtɔ Měma akɛ ɓea moéma ka engekisia asu kema nde asóbisíí.

⁶ Kaɓondɔ, ɓena nténdé. Ɓeoúba gea, ɓî ɓe phɔ́tɔ suɓi á nyama ndɔ, ɓe phɔtɔ ɗanga na ɔma á ɓoiki ndea Mɔkɔta.

⁷ Ande gea te, ɓeoenda suɓi á ɓeekea kángá á ɔna ka kema.

⁸ Eya, ɓena nténdé ɗoni! Ɓekondi ɗeketa á nyama ndee, ka gǎ ika bíbí á Mɔkɔta.

⁹ Kema nde ɓe gǎkɛ okáɓa k'ama mosá-mosá, ande ékondisaga na yɛ, nanga ɓéɓá na nyama ndee kaɓɛ ɗeketana ně.

¹⁰ Nga, ɓesu ɓɔbu ɓemamande mosá á ntua nde Kiísito atenande nyɔngɔ á ɓakpa kau. Wa, amphendande nkpa na nkpa ka ɓeana na tambea akɛ, kaɓɛ ánjá, kaɓɛ ájeɗe ka enda akɛ ka mokonda.

Kiísito ande cina á ɔnganisa á ɓakpa na Mokonga

¹¹ Cɔ, ɓeoúba kantíti á ɓánga á Mɔkɔta. Kaɓondɔ, ɓeokaɓa tɔka á ɓakpa ka měma aɓɔ. Mokonga aosóúba ánjá phɛɛ. Neseɓei phɔtɔ gea, ɓoósoúba ka měma anu.

¹² Ande gea te, ɓékéǒbeba sasasu mosá anu. Ɓe ndiu konóngoɗea ɓuiki asu gea, ɓóóbebɛ na tambea asu, ɓóɓɛ phɔtɔ na nyɔngɔ á sikisia á ɓakpa nde ɓáǒbeba na kema nde aɔɔnɛkana, kaɓɛ ndiu kema nde a suɓi á měma.

¹³ Cɔ, aoɓá na ɓebóbóki, a tɔ ka Mokonga. A gǎkɛ oɓá na ɓeoúbapha, a ka ɓenu.

¹⁴ Ekondi ndea Kiísito aunge aɔsɔ́sɔndɔɛa. Nga, ɓesu ɓáunge ɓeoúba ɗoni gea, Kiísito ɗásókui ɓesu ɓɔbu. Ande gea te, ɓakpa ɓɔbu ɓasí ye tɔ kimoci na yɛ.

¹⁵ Nga, Kiísito ɗáku ka ɓesu ɓɔbu gea te, ɓakpa nde ɓá phɔtɔ koenda, ɓákáendɛ mɔnɔ ye ka ɓɔ sasaɓɔ, ɓáendɛ ndiu ka Kiísito mmbé ɗáku na jujúka ka nyɔngɔ aɓɔ.

¹⁶ Kaɓondɔ unge ɓéké ye ɔmbɛɗa nkpa n'etéte á kokpa akɛ. Nanga ɓî ɗéɓɛmbɛɗi Kiísito kala n'etéte á kokpa, kɛ̌kɛnde ɓéké ye ɔmbɛɗa n'etéte ɓíndɔ.

¹⁷ Cɔ, aoɓá nkpa n'aiki suɓi á Kiísito, ande gea te, Mokonga anconji goto kɛ̌kɛ. Nyɔngɔ á kala bui áoímika, â ye tɔ ojiga nnde á kɛ̌kɛ.

¹⁸ Nyɔngɔ ndɔ bui atóki ka Mokonga. Yɛ aámbé asɔ́ɔnganisi na yɛ ka nyɔngɔ á Kiísito. Asóphi phɔtɔ ekuma á ɔnganisa á ɓakpa ɓunɛngbo na yɛ.

¹⁹ Yéso aámbé ɗáɛɔnganisi ɓakpa na Mokonga kángá ɛnjia ye ɓojeɗe nɛɓɔ. Ɗásóphi ekuma á tɔ̌miaga nyɔngɔ á ɔnganisa á ɓakpa na yɛ.

²⁰ Ɓende ɓakpa nde ɓɛɔyɔnga k'ína á Yéso nga yɛ aámbé asóteki. Ande gea te, Mokonga aámbé agi te ɓɛ́nɔɔphanɛ. Cɔ, ɓenóɗengemisigi k'ína á Kiísito gea te, ɓɔ́ɔnganɛ na Mokonga.

²¹ Cɔ, Kiísito ɗákátú na ɓojeɗe. Mokonga ɗánkumbisi gǎkɛ ɓojeɗe nɛsu gea te, ɓî ɓe kimoci na Kiísito, ɓéɓɛ ɓato á ɗoni mosá á Mokonga.