2 Ɓakɔlítɔ 3 - Ɔngana á Kɛ̌kɛ

Ɓabɛɗanigi á ɔngana á kɛ̌kɛ

¹ Ande gea te, ɓe goto ǒɗokomisa sasasu? Nga, ɓakpa ɓuangbo ɓána siki á phangia anu ɓaoɓa nde aoɗigimisa gea ɓende ɓabɛɗanigi. Ɓesu gǎkɛ, ɓe phɔtɔ na siki í?

² Ɓenu ɓáunge ɓonde ɓaoɓa nɛsu á ka měma nnde nkpa buakɛ aúbi n'aotanga ú.

³ Eya, ande base gea, Kiísito aámbé aɗundu ɓaoɓa ndɔɔ, ɓesu ɓáunge ɗáɓásóphi ú ka bika ně. Ɗákáɗundu ú na pɛnjɛa, ɗáɗundu ndiu na Měma á Mokonga, Mɛyɔ. Mokonga ɗákáɗundu ú ɓea gǔ ɛ́tɛ nde Mósa ɗábɛɗaneigi, ɗáɗundu ndiu ka měma á ɓakpa.

⁴ Eya, ɓeɔyɔnga ɓó ka nyɔngɔ á ɓî ɓembisíí Mokonga měma ka Kiísito.

⁵ Ɓeoúba gea, ɓéké na ɓukpɛkpɛ á tɔtɔkisa á kema ɓíndɔ sasasu. Ɓukpɛkpɛ ndɔ a tɔ otóka ka Mokonga.

⁶ Yɛ aámbé ɗásóphi ɓukpɛkpɛ á ɓá ɓabɛɗanigi á ɔngana á kɛ̌kɛ. Ɔngana kau nna á ɓaoɓa, a ndiu á Měma á kanga ɓojeɗe. Nga, ɓaoɓa aokusa, Měma a gǎkɛ oendisa.

⁷ Cɔ, ɗáɓáɗundu ɛɔphi ndea Mósa k'ɛ́tɛ. Ɓî Mósa ɗéphangisi Ɓaisilaɛ́lɛ Ɛɔphi ndɔ, ɓákáphiphiɛ enga á keongi akɛ ɓî ɗáophenuaga na ɓoombia á Mokonga. Phenuaga ndɔ kaiphiɛ. Ɛɔphi ndɔ â gǎkɛ ɔ̌sɔndɔɛa ɓakpa ka kukuwa.

⁸ Ekuma á Měma á kanga ɓojeɗe aɓikisande gǎkɛ ɓoombia nde anyɛ́nyɛande.

⁹ Kaɓɛ ekuma ɛ́ɔphi nde aotena nyɔngɔ á ɓakpa akpɛ na ɗágɔɓi n'atúmi na ɓoombia, cɔ, aoɓá ekuma á Měma á kanga ɓojeɗe nnde aǒtangisisa ɓakpa ɓato á koɗoni mosá á Mokonga, aɓande na ɓoombia nde anyɛ́nyɛande.

¹⁰ Cɔ, ɓɛɔtɔka na ɓɛyɔngi gea, ɓoombia ndɔ á kala nna ɔtɔka n'aingimiani na ɓoombia á kɛ̌kɛnde, nnde aángbó phɛɛ.

¹¹ A gǎkɛ oɓá kema nde nnaoiphia na ɗátú na ɓoombia, ɓoombia índe á kema nde aoiphia unge anyɛ́nyɛande.

¹² Ɓî ɓena nseɓeɔ ndɔ, aunge ɓebisi měma asu phɛɛ kau.

¹³ Ɓéké ɓea Mósa mmbɔ ɗáɓumbi keongi akɛ na bɔngɔ ka imisia á Ɓaisilaɛ́li gea, ɓákáɔnɛ mɔnɔ ɓoombia á kanga iphia ndɔ ɓî aoimíka.

¹⁴ Cɔ, kanisia aɓɔ áosia na ka kesande. Mbenɔ nde ɓáotanga ɓuku á ɔngana á kala, bɔngɔ ndɔ â tɔ oika wa. Bɔngɔ ndɔ ɓáphúiande tɔ ka nkpa nde aɔngani na Kiísito.

¹⁵ Cɔ, nanga ka kesande, mbenɔ nde Ɓaisilaɛ́li ɓáotanga suɓi á ɓuku ndea Mósa, bɔngɔ ndɔ aɗaki kanisia aɓɔ.

¹⁶ Ɓíndɔ ɓáɗundu gǎkɛ te: «Ɓɔngɔ ndɔ aɔtɔka n'agú, aoɓá nkpa n'amɓeeki Mɔkɔta.»

¹⁷ Cɔ, wani, ina ndɔ Mɔkɔta ande Měma. Ɔma nde Měma á Mɔkɔta a ɓei, ɔma ndɔ nna na kɔkɔɓɛ.

¹⁸ Ɓesu ɓɔbu ɓéké ye na bɔngɔ ndɔ aoɗaka keongi asu. Nga, ɓoombia á Mɔkɔta aophenuaga kau. Kaɓondɔ ɓeékěti ka kengeana na Mɔkɔta, ɓéoɓá goto na ɓoombia ángbó esa bui. Nndɔ ungɔ ande ekuma ndea Mɔkɔta n'ande Měma.