2 Ɓakɔlítɔ 2 - Ɔngana á Kɛ̌kɛ

¹ Kaɓondɔ, ɗénegi gea, kéjeku ye mɔtɛ-anu ka gea te, kɛnɔɓɛisɛmbɛ goto.

² Nga, aoɓá na nɛnɔ́ɓɛisi, ani mmbé amɔtɛbisande goto? Nna phɔ́ mmbɔ ɗémɓɛisi?

³ Kaɓondɔ unge, ɗénóɗundui gea, kébikɛku ka gea kěɓɛiɛmbɛ ɓakpa nde ɓátómotɛbisande ka kiɗiani mɔtɛ-anu. Ɗoni, nenoseɓei tɔ ɓenu ɓɔbu nga, neoúba gea, kema nde aomopa maseye a phɔtɔ ɓó ka ɓenu ɓɔbu.

⁴ Ɗénoɗundui ɓaoɓa ndɔ měma ani n'asiɗi phɛɛ, na neogáma. Ɗákátú gǎkɛ ka nyɔngɔ á ɓɛisa anu. Ɗátú ndiu ka gea, ɓóúbɛ ekondi ángbó nde neně ka ɓenu.

Ɓɔphɛi ka nyɔngɔ á íma á ɓojeɗe

⁵ Aoɓá nkpa na ɗáɛɓɛisi ɓakpa, nna eme ámbé ɗámɔɓɛisi tɔndɔ. A phɔtɔ ka ɓenu ɓɔbu. Ɓókoɓikisɛ mɔnɔ gǎkɛ nyɔngɔ.

⁶ Ɓî ɓakpa ɓásii ɓánkeigi nkpa ndɔ, nndɔ akeni.

⁷ Kaɓondɔ, ímani ye tɔ ɓojeɗe nɛkɛ, ɓómɔphɛ ɓukpɛkpɛ. Kaɓɛ na nna ɓó, mmbe ɓɛí nɛkɛ kásiɛku, ámbé nndɔ aduukisande měma akɛ.

⁸ Cɔ, nekondi phɔtɔ gea ɓɔ́ɔnisɛ ekondi ka phɔakɛ.

⁹ Nga, ɗénóɗundui ka tombaga anu ka gea nɛ́ɔnɛ mmbe ɓooɓeekea nyɔngɔ nɛmɔ bui.

¹⁰ Aoɓá n'oími ɓojeɗe ndea nkpa, nê phɔtɔ oíma ú. Mbenɔ nde neoíma, aoɓá na nena ɓojeɗe nɛngbo ásii á íma í, neoíma ú ka nyɔngɔ anu mosá á Kiísito.

¹¹ Negi ɓondɔ ka gea, Sɛtáni kasódemɛgɛmbɛ, nga ɓeoúba kanisia akɛ.

Pɔ́lɔ aotambaga ka měma ka Tɔ́a

¹² Cɔ, ka kiɗia ani ka Tɔ́a ka tɔ̌miaga á Mbino-Ánjá ndea Kiísito, ɗɛ́ɔni gea, Mɔkɔta ɗámokoɗei aphe ka bɛɗanaga kó.

¹³ Měma ani ɗákátú gǎkɛ na ɓujɛjɛ nga, ɗékéndondi muna-amasu Títɔ. Kaɓondɔ unge ɗɛ́ɔku ɓato á ka Tɔ́a, néoga na Makɛdɔnía.

Yéso aokíndisa

¹⁴ Cɔ, ɓémbebɛni Mokonga nga, ka jukanisa asu na Kiísito aunge ɓena ɓukpɛkpɛ á kinda esa bui. Aosóbɛɗaneaga ka ɛmbisa á nyɔngɔ nɛkɛ ka nji bui ɓea su á nkoki nnde aɔɛmba ɔma bui.

¹⁵ Cɔ, ɓesu ɓe ɓea su ánjá á nkoki nde Kiísito aongabea Mokonga. Nkoki ndɔ a ka ɓakpa nde Mokonga aeamisi ka měma, a phɔtɔ ka ɓakpa nde ɓáoɓúngaga.

¹⁶ Ka ɓunde ɓáɓúngigi, nkoki ndɔ ande su á kukuwa nde aokusisa. Â gǎkɛ phɔtɔ oɓá su á enda nde aoendisa. Cɔ, ani mmbé aɔtɔka ekuma ɓ'índe?

¹⁷ Nga, ɓéké ɓea ɓakpa ɓásii ɓunde ɓáɔtɔmiaga nyɔngɔ á Mokonga na phendisa í. Ka nyɔngɔ nde Mokonga ɗásóteki, ɓesu ɓe ndiu ɔyɔnga ɗoni mosá á Mokonga ka ɔngana na Kiísito.