2 Ɓakɔlítɔ 13 - Ɔngana á Kɛ̌kɛ

Ɓɔphɛi á ka sungiaga na mɔkɔ

¹ Nnde ande tamba nɛmɔ á ko isaɔ á gǎ mɔtɛ-anu. Ɓáɗundu suɓi á Ɓuku á Mokonga gea: Ka tena nyɔngɔ bui, ambe ɓaɗigimisi ɓáɓɛ ɓei ɓaɓɛ kaɓɛ ɓasaɔ.

² Nena nyɔngɔ á ngoɗea ɓakpa nde ɗáɓági ɓojeɗe mosá na ɓenu ɓɔbu phɔtɔ. Ɗéneyɔngi ú ɓî ɗétú na ɓenu ka tamba nɛmɔ á ko iɓɛ. Nesikíí goto kɛ̌kɛnde na nekéɓei. Ka tamba ndea mbusa ɓî neɓande kó, kénkuiɛku ye nkpa ngomi.

³ Ɓî ɓookonda engekisa gea Kiísito aámbé aɔmɔyɔngisa, ɓoengekisande ɗoni. Ka ɓenu Kiísito káútú, a ndiu ophangia ɓukpɛkpɛ nɛkɛ sɔsɔɓɛ anu.

⁴ Ande ɗoni gea, mbenɔ nde ɗáɓánkɔkɛigi Kiísito ka moyangɔ, nyama akɛ ɗáɔlɔmani. Kɛ̌kɛnde gǎkɛ aoenda ka ɓukpɛkpɛ ndea Mokonga. Ɓesu ɓateki phɔtɔ, ɓî ɓe kimoci na yɛ, ɓɛɔlɔmani. Ɓukpɛkpɛ ndea Mokonga abɛɗanagande gǎkɛ na ɓesu ka ɔlɔ anu.

⁵ Cɔ, óengani sasanu ka ɗigimisa gea, ɓonde ɓaɓêki á ɗoni. Ɓooúba gea, Kiísito a sɔsɔɓɛ anu. Nna ɓo? Kaɓɛ na nna ɓó, ámbé ɓotugbanigi suɓi á ɓeekea.

⁶ Nekanisi te ɓoúbi gea, ɓékétugbanigi k'ékuma nesu.

⁷ Ɓɛɔmmɛma Mokonga te, ɓókógeɛmbɛ tanda ɓojeɗe. Ɓékéokonda ɔnisa á ɓukpɛkpɛ asu. Ɓe ndiu okonda gea, tambea anu áɓɛ ánjá nanga ɓásɔɔ́na ɓea ɓakpa nde ɓátugbanigi.

⁸ Nga, ɓékéokonda gea nnde atingani na ɗoni. Ɓe tɔ ɔbɛɗanaga ka úbisa anu ɗoni.

⁹ Eya, ɓena maseye ɓî ɓeútú, ɓô gǎkɛ oɓá na ɓukpɛkpɛ. Kema nde ɓɛɔmmɛma Mokonga ka ɓenu ande gea ɓóɓɛ kángá ɓojeɗe.

¹⁰ Kaɓondɔ unge, nenóɗundui ɓaoɓa ndee na neɗanga na ɓenu. Nga ne ye okiɗia, kékóndi néɓɛ nkáe ka kɔkɔta nde Mokonga amopi ka ɓenu. Kɔkɔta ndɔ nna á kusa anu, a ndiu ka mɔtisaga anu ka měma.

¹¹ Cɔ, ɓaya, ɓójiga ye. Ɓáni na maseye, ókakamisani ka ɓá kángá ɓojeɗe, ógbagisagani ngǔngu anu, ɔ́kanani na měma mo, ikani ka ɓujɛjɛ. Mpɔ, Mokonga, mɛna-ekondi na ɓujɛjɛ, aɓande kimoci na ɓenu.

¹² Seseanagani ɓíndɔ akeni ka ɓato á Mokonga. Ɓakiísito ɓɔbu ɓanosambei.

¹³ Cɔ, ɓonjánja-ékondi ndea Mɔkɔta Yéso Kiísito, n'ekondi ndea Mokonga, na komunamema á Měma á kanga ɓojeɗe, áɓɛ na ɓenu ɓɔbu.