2 Ɓakɔlítɔ 12 - Ɔngana á Kɛ̌kɛ

Mphaniɔ nde Pɔ́lɔ ɗáɔni

¹ Ambe néeɗokomisɛ nanga ɓî nna na kantíti. Neogea nɛ́yɔngɛ gǎkɛ mphaniɔ ndea Mɔkɔta k'éme.

² Mokonga ɗántáisi mǒko moci mmbé ɗáɔngani na Kiísito n'ego phɛɛ, a ye ɓasaga nkama na gena (14). Mokonga ɗántáisi na koba na nyama akɛ? Kaɓɛ kángá nyama akɛ? Kéoúba, Mokonga sasakɛ aámbé aoúba.

³ Eme neoúba gea, Mokonga ɗántáisi na Paadísɔ. Kaɓɛ ka nyama, kaɓɛ kángá nyama, kéoúba. Mokonga sasakɛ aámbé aoúba.

⁴ Cɔ, nkpa ndɔ áɔɔ́ka nyɔngɔ á ketangaɔ nde kákeni gǎkɛ ɔtɔa í.

⁵ Cɔ, něbebande ka nyɔngɔ á nkpa ndɔɔ. K'éme sasani gǎkɛ, něɗokomisande tɔ ka nyɔngɔ á utua ani.

⁶ Atú gǎkɛ oɓá na nekondi éɗokomisa, kétóɓɛku mbóbó nga nɛyɔngande ɗoni. Cɔ, ké gǎkɛ ogea ɓó ka nyɔngɔ nde, kékóndi ɓakpa ɓámoɗokomisɛ phɛɛ kɔnyɛ́nya kema nde ɓáɔni na ɓáɔ́ki k'eme.

⁷ Mokonga ɗámɔɓɛti na kenkumbɔ ka gea te, kěbebɛ mɔnɔ sasani, ka nyɔngɔ á mphaniɔ ángbó ndɔɔ. Kenkumbɔ ndɔ ɗátú ɓea mphaniɔ ndea nteki nde ɓa Sɛtáni nnde ɗámɔɓɛti ka imisiani ɓá na ɓemboko phɛɛ.

⁸ Ɗɛ́mɛmi Mɔkɔta mɔngɔ isaɔ gea, ámoamisɛ ka kenkumbɔ ndɔɔ.

⁹ Mpɔ, Mokonga â gǎkɛ omosikisia gea: «Ɓonjánja ékondi nɛmɔ k'óɓɛ áɓɛ phɔ́ úngaa! Ɓukpɛkpɛ nɛmɔ atɔtɔkɛani suɓi á ɓɔɔlɔ nɛkɔ.» Kaɓondɔ, eme Pɔ́lɔ, nekondi gǎkɛ, néebebɛ ka nyɔngɔ á ɓɔɔlɔ nɛmɔ ka gea te, ɓukpɛkpɛ ndea Kiísito ámogbukumiɛ.

¹⁰ Kaɓondɔ unge, nena maseye ka nyɔngɔ á ɓɔɔlɔ bui, kaɓɛ mbóma, ɓuyɛnɛ, tambaga ɗanga-ɗanga, k'ína á Kiísito. Mbenɔ nde nena ɓɔɔlɔ, wandɔ unge nena ɓukpɛkpɛ.

Pɔ́lɔ aoianaga ka nyɔngɔ á Ɓakɔlítɔ

¹¹ Eme Pɔ́lɔ nɛɔyɔnga ɓea mbóbó nga, ɓenu Ɓakɔlítɔ ɓáunge ɓomososei nndɔ. Nanga ɓî kéna kantíti mosá anu, atókeni ɓenu ɓáunge ɓómoɗokomisɛ. Ɓateki nɛnu ɓundɔ ɓǒseɓei, ɓákámɔnyɛ́nyi gǎkɛ ka kema.

¹² Ɗɔ́ɓɔɔni nyɔngɔ ɗanga-ɗanga á nteki n'aɔtɔtɔkɛana sɔsɔɓɛ anu: Ɓá na měma á phiphia ka tombaga bui, mphangiɔ á ketangaɔ, ketangaɔ na kema á ɓukpɛkpɛ.

¹³ Cɔ, kema ánjá sina nde negi ka kanisa nɛngbo nnde kégi ka phɔanu, ande ka nyɔngɔ á kanga ɓenu kumba ɓoɗoko ani? Aoɓá n'a ɓó, ómoímiani nyɔngɔ ndɔɔ!

¹⁴ Nesóɔmɛa ka gǎ mɔtɛ-anu ka mɔngɔ á ko isaɔ. Kénokumbisɛku ɓoɗoko ani nga, kéokáɓa nkumba nɛnu, ne ndiu tɔ onokáɓa ɓenu. Nga, nna ɓaniki ɓáunge ɓáɔ̌kɔngɔɛa ɓaɓɔkɔti aɓɔ imɔna. Ɓaɓɔkɔti ndiu ɓáunge ɓáogea ɓó ka ɓ'anaɓɔ.

¹⁵ Eme neɓeekeande gabea anu imɔna na gaba enda ani bui. Ɓî nenókondi phɛɛ, ɓókómokondɛku tanda ábɔa?

¹⁶ Ɓooúba ánjá gea, kétónókumbisi ɓoɗoko ani. Ɓakpa ɓuangbo gǎkɛ ɓáokanisia te nenókǒngu ka ɓɔngaga anu n'odemayɔ.

¹⁷ Ande gea te, ka ɓakpa nde ɗénotekisíí aámbé ɗánɔɓɔngigi k'ína ani?

¹⁸ Nga, ɓî nenɗengemisigi Títɔ ágɛ mɔtɛ-anu kimoci na dasu moci, ɗánoúti mɔnɔ ka kema? Ande gea te, Títɔ n'eme, tambea asu nna k'aphe moci?

¹⁹ Kanisia anu esa nde bui ande gea te ɓemɔ̂ kǒunia ka yɔnga mosá anu? Nna ɓó! Ɓɛɔyɔnga mosá á Mokonga, ɓíndɔ Kiísito aokonda, ka nyɔngɔ á mɔtisaga anu ka měma.

²⁰ Ka nyɔngɔ nde neoɓánga gea, mbenɔ nde nekiɗiande mɔtɛ-anu, kénódondeku ɓíndɔ nekondi na ɓenu ɓókómodondɛku phɔtɔ ɓíndɔ ɓokondi. Neoɓánga donda anu suɓi á: Sani, nsengo, esúia, měma éteɓa, mbóma, maca, étondoa, eongo kaɓɛmbɛ.

²¹ Ne phɔtɔ oɓánga gea, ɓî nejúande goto mɔtɛ-anu, Mokonga kamokusɛmbɛ na soni mosá anu. Nga, něgámeande ɓakpa ɓásii ɓunde ɓákáɗeketimbɛ ɓojeɗe nɛɓɔ á kala na kětia tambea aɓɔ ka nyɔngɔ á ɓɔjɔɔkiɔ, otungɔ, mambɔ na ɓojeɗe nde ɓáogea.