2 Ɓakɔlítɔ 11 - Ɔngana á Kɛ̌kɛ

Pɔ́lɔ na ɓateki á mbɛa

¹ Cɔ, ɓaya, ómophiphiani phɔ́ ábɔa ka yɔnga nde nɛɔyɔnga ɓea mbóbó. Eya, nɛnɔmɛmi gea, ómophiphiani!

² Nena nsengo ka ɓenu ɓíndɔ Mokonga aně ka nyɔngɔ anu ka nyɔngɔ nde ɓenu ɓonde ɓea nseka nde nekondi ɔmanisa akɛ na mǒko moci. Mǒko kayɛ ande Kiísito.

³ Ne gǎkɛ oɓánga gea, ɓákanódemɛgɛmbɛ, ka ɗeketisa anu kanisia anu na ɓeekea nɛnu á ɗoni, ɓíndɔ Nketi ɗángí suɓi á njɔka, áondemaga Áwa na maibe nɛkɛ.

⁴ Nndɔ atókani ka ɔna ɓî ɓomɓeeki nkpa buakɛ mmbé abiki mɔtɛ-anu na tɔ̌mia anu mbino á Yéso ɓaangbo, mmbé atingani na mmbé ɗéɓenɔtɔ̌mi mbino akɛ. Á bǎ í, ɓokamisigi ɓeekea á měma nɛngbo na mbino nɛngbo nde atingani na Měma á Mokonga na Mbino ánjá nde ɗɔ́ɓɔtɔi mɔtɛ-asu.

⁵ Cɔ, neokanisia te, ɓateki ndɔ ɓǒseɓei, ɓákámɔnyɛ́nyi gǎkɛ ka kema.

⁶ Nanga ɓî kéoúba yɔnga ánjá, ne ndiu na úbapha phɛɛ. Ɗéɓenɔɔnisi kema bui base ka mbenɔ bui.

⁷ Mbenɔ nde ɗɛ́nɔtɔmigi Mbino-Ánjá ndea Mokonga k'écici, néǒdidisa ka ɗokomisa anu. Cɔ, ɗégi ájeɗe?

⁸ Mbenɔ nde ɗɛ́ɔnɔ́bɛɗaneaga ɗéneɓeeki gea kanisa nɛngbo unge ámophendɛ na ákumbɛ ɓoɗoko ani. A phɔtɔ ɓea eme, ɗéutí nkumba á kanisa ndɔ na bɛɗaneaga í ka enga anu.

⁹ Ɓî ɗétú mɔtɛ-anu, nna na nkpa nde ɗátú omogabea kema nde ɗétú na siki í. Ɓadani ɓaɓêki á ka Makɛdɔnía ɓáunge ɗáɓáomobikia na nkumba bui nde ɗéna siki í. Ɗékébisi ɓoɗoko ani ka ɓenu na kébisɛku.

¹⁰ Ɓî ɗoni á Kiísito a suɓi ani, nɛyɔngi ɓe: Nna na nkpa nde aɔtɔka imisiani ébeba k'índe neogea ka Akáya. Ɓákámoútɛku ɓoombia í.

¹¹ Negi ɓó ka nyɔngɔ éke? Ande ka nyɔngɔ nde kénókóndi? Mokonga aoúba gea nenókondi.

¹² Kema nde neogea kɛ̌kɛnde, nɛsɛkisiande goto ka gea, ɓakpa nde ɓáokáɓa ébeba k'ékuma nɛɓɔ ɓea ɓesu, ɓákáɓɛmbɛ na ɓukpɛkpɛ í.

¹³ Nga, ɓakpa ndɔ, ɓánde ɓateki á mbɛa, ɓánde phɔtɔ ɓademigi k'ékuma nɛɓɔ, ɓáǒdemisaga gea, ɓánde ɓateki ndea Kiísito.

¹⁴ Kema ndɔ nna á tangaaga í nga, Sɛtáni aǒgaia sasakɛ ka gea te, ande malaéka nde aojuanisa owanga.

¹⁵ Cɔ, nna gǎkɛ nyɔngɔ á tangaaga aoɓá ɓabɛɗanigi ndea nketi na ɓáégai ka ɓá ɓabɛɗanigi á koɗoni ndea Mokonga. Kaɓondɔ, sungiaga aɓɔ aɓeanande n'ekuma nɛɓɔ.

Nteki Pɔ́lɔ aphiphíí tambaga k'ékuma nɛkɛ

¹⁶ Nesikíí goto yɔnga gea: Nkpa kakanisiɛmbɛ gea te, nende mbóbó. A gǎkɛ oɓá n'a ɓó, ómoɓeekeani ɓea mbóbó ka gea, néebebɛ ábɔa.

¹⁷ Nnde nɛɔyɔnga kɛ̌kɛnde, kéɔyɔnga ú ɓíndɔ Mɔkɔta akondi nɛ́yɔngɛ, ne ndiu ɔyɔnga ɓea mbóbó ka nyɔngɔ á ebeba.

¹⁸ Ɓakpa ɓásii ɓáǒbeba ɓea ɓato á ka mokonda ndee. Eme gǎkɛ něbebande phɔtɔ.

¹⁹ Ɓenu ɓogi te ɓooúbapha, nndɔ ungɔ ɓǒphiphia ɓabóbó kau ka konda anu.

²⁰ Ɓǒphiphia gea ɓánótambisɛgɛ ɓea ɓakɔɓɛ, ɓáonóuta nkumba, úɓia anu nkumba nɛnu, ɔnisa anu ka ɓɔngɔ, tóndea anu na ɓɛta anu ka keongi, ɓô tɔ ophiphia nndɔ bui.

²¹ Cɔ, neokuwa na soni á yɔnga gea, ɗéɓékétú na ɓukpɛkpɛ á gea kema ndɔɔ. Aoɓá nkpa ɓaangbo n'akengi ébeba ka kema ímoci, eme phɔtɔ neébebande. Kɛ̌kɛnde nɛɔyɔnga ɓea mbóbó.

²² Ɓáná phɔ́ Ɓayúda? Eya, n'eme phɔtɔ! Ɓaisilaɛ́li? Eya, n'eme phɔtɔ! Ɓasuko á Abalaámu? Eya, n'eme phɔtɔ!

²³ Ɓáná phɔ́ ɓabɛɗanigi ndea Kiísito? Neyɔngande phɔ́ ndiu ɓea mbóbó. Eme nende mbɛɗanigi ndea Kiísito kɔ̌nyɛ́nya ɓɔ. Ne ye na netambigi ka bɛɗaneaga Kiísito phɛɛ: Makeagani ka mekakɔ, ɓindagani na ólokagani ka kukuwa.

²⁴ Ɓayúda ɗáɓámoɓindi gbutu nkama isaɔ na ngianjaga gena (39). Ɓáogea ɓó, mɔngɔ ɓɔku.

²⁵ Ɓalɔ́ma ɗáɓámoɓindi mɔngɔ isaɔ. Esa nɛngbo, ɓáomomakeaga ɛtɛ ka kusa ani. Ɗɛ́tɔti na koko mɔngɔ isaɔ. K'ésa ndɔ ímoci, néoika ka iɓo sɔmani na keiphe.

²⁶ Ka tamba nɛmɔ ɗanga-ɗanga, ɗétambigi ásii phɛɛ: Tɔta na koko ka ɔɓa ka nyɔngɔ á tuma á iɓo phɛɛ, púa na ɓato á oyombɔ, púa na ɓakpa ájeɗe á k'ékuna nɛmɔ na ɓunde á k'ékuna nɛngbo. Ɗéóloki kukuwa ka nji, ka nkanda, ka oɓenge na ka ɔlɔ á ɓadani á mbɛa.

²⁷ Ɗétambigi k'ékuma ásii, ɗɛ́phɛigi tɔ̌, néokuwa na nja n'ɛnyɔta, néoikaga kángá á eaga ka nyɔngɔ á mɛma Mokonga, néoɓá na phiɔ na ɓá na ɓuyɛnɛ á ngɔ́mbɛ.

²⁸ Ɗéké yɔngi nyɔngɔ nɛngbo bui, néoianaga phɛɛ esa bui ka nyɔngɔ á kanisa bubui.

²⁹ Aoɓá nkpa na nna akpɛkpɛ, nê phɔtɔ ɔ̌yɔka ɓɔɛlu. Nkpa aogua ka ɓojeɗe, nyɔngɔ ndɔ áomokaea phɛɛ.

³⁰ Aoɓá na nena siki ébeba, áɓɛ tɔ ka nyɔngɔ á utua ani.

³¹ Mokonga, Aba-Mɔkɔta Yéso, mmbɔ obebɔ nɛkɛ ande mɛyɔ, aoúba gea, kɛ́ɔyɔnga mbɛa.

³² Ɓî ɗétú ka Damasíki, mɔkɔta moci mmbé ɗáɔbɛɗanaga kusi á kɔkɔta ndea moamɛ Aɛ́ta, áǒbisa ɓaambi ka nji ka gea, ɓámodungɛ.

³³ Kaɓondɔ, ɓâ gǎkɛ omomakea ka jɔ, mpɔ ɓáomophoɗisa ka ɓoenga na didisani ka ɓǔkendu, néotea.