2 Ɓakɔlítɔ 10 - Ɔngana á Kɛ̌kɛ

Pɔ́lɔ aounia ekuma nɛkɛ

¹ Eme Pɔ́lɔ, nenóɗengemisigi na ɓɔphɔngɔ ka ɓonjánja ndea Kiísito. Ɓakpa ɓáomogea te, ne aphɔngɔ mbenɔ nde ne sɔsɔɓɛ anu. Ne gǎkɛ nkae mbenɔ nde ne ɗanga na ɓenu.

² Nenóɗengemisigi gǎkɛ ɓe: Mbenɔ nde nejúande mɔtɛ-anu, kékóndɛku ɓómokáisɛ. Nga, neoúba gea negeande ɓó ka ɓakpa nde ɓáokanisia te, ɓesu ɓeobɛɗanaga na mɔphɛ á kokpa.

³ Ɓende ɓakpa ɗoni, ɓéké gǎkɛ omana ama kokpa.

⁴ Nkumba émani nɛsu nna á kokpa, a ndiu á ɓukpɛkpɛ ndea Mokonga, nnde aɔgɔɓa ɓukpɛkpɛ á ɓaɓiɓia. Ɓeotúkatúka kanisia ájeɗe,

⁵ ɓeogusa kema bubui nde ɓakpa ɓáǒbeba ně ka imisia úbapha ndea Mokonga. Úbapha ájeɗe áoɓá ɓea nto émani, mmbé ɓándungi, ɓáomakea ka mekakɔ gea, ámɔ́kɛ tɔ Kiísito.

⁶ Mbenɔ nde ɔ́kapha nɛnu a ye oɓá kángá kisɛki, ɓeɓande bíbí ka tena á nyɔngɔ akpɛ, tambea á kanga ɔ́kapha.

⁷ Ɓo tɔ kɔɛnjia kema gǔ-gǔ. Aoɓá nkpa n'aoúba te, ande nkpa ndea Kiísito, áúbɛ phɔtɔ gea, ɓesu ɓe phɔtɔ ɓó.

⁸ Mɔkɔta aámbé ɗásópi kɔkɔta ka gea ɓénómamisɛ ndiu nga, ɓékéokáɓa gúsa anu. Neǒbeba ně phɛɛ na ké gǎkɛ ɔtɔka na neku na soni í.

⁹ Kéokonda nɛɔnɛkanɛ ɓea nkpa nde aonóɓángisa ka ɓaoɓa nɛmɔ.

¹⁰ Nga, ɓuangbo ɓáogea te: «Ɓaoɓa ndea Pɔ́lɔ akái na gbaga phɛɛ. Mbenɔ nde aoɓá sɔsɔɓɛ asu, áoɓá aɔlɔ, nyɔngɔ nɛkɛ â tɔ oɓá ecici.»

¹¹ Cɔ, akeni nkpa nde aɔyɔnga ɓó, áúbɛ ɗoni gea, nyɔngɔ nde ɓeoɗundua suɓi á ɓaoɓa nɛsu na ɓe ɗanga, kátigani na nnde ɓɛtɔtɔkisande mbenɔ nde ɓeɓande kimoci na ɓenu.

¹² Ɗoni, ɓéké tanda okaɓa ékengeanisa na éingimianisa na ɓato á maca, ɓî ɓáǒɗokomisa sasaɓɔ. Ɓáobisa kipimɔ nɛɓɔ sisaɓɔ ka épima ně. Ɓáokáɓa ékengeanisa sasaɓɔ. Ɓakpa ndɔ ɓánde ɓabóbó.

¹³ Ɓesu, ɓékéǒɗokomisa phɛɛ, ɓeokonda bɛɗaneaga kipimɔ ékuma nde Mokonga ɗásópi na nnde ɗásójúsi mɔtɛ-anu.

¹⁴ Ɓî ɗéɓejú ye mɔtɛ-anu, ɗéɓékétingi ekuma nde Mokonga ɗásóphi. Nga, ɓesu ɓáunge ɗéɓejú mosá mɔtɛ-anu ka tɔ̌miaga Mbino-Ánjá ndea Kiísito.

¹⁵ Cɔ, ɓékéǒɗokomisa amanyɛ́nyɛa ka nyɔngɔ á ekuma ndea ɓakpa ɓuangbo. Ɓeseɓei ndiu gea, ɓɔmɔtande ka ɓeekea nɛnu. Mpɔ, ekuma nɛsu â phɔtɔ ondanda sɔsɔɓɛ anu na sikia gǎkɛ tɔ ka muwɔ nde ɗáɓásóbisíí.

¹⁶ Mpɔ, ɓendandisande Mbino-Ánjá ka nji á ɗanga na nji nɛnu ɔma nde ɓákáɔ́kimbɛ mɔnɔ, kángá á ɓesu éɗokomisa k'ékuma nde ɓakpa ɓuangbo ɗáɓábɛɗanigi ka ɓeana na muwɔ nde ɗáɓáepimíí ɓɔ.

¹⁷ Ɓáɗundu suɓi á Ɓuku á Mokonga gea: «Nkpa nde aǒɗokomisa, áedokomisɛ tɔndɔ ka kema nde Mɔkɔta agi ka yɛ.»

¹⁸ Nga, nkpa nde aǒɗokomisa sasakɛ, nna aámbé Mɔkɔta amɓeeki. A ndiu nkpa nde Mɔkɔta sasakɛ anɗokomisi.