1 Yoáni 4 - Ɔngana á Kɛ̌kɛ

Měma á Mokonga na měma á mbɛa

¹ Ɓadani ékondi, ɓókǒɓeekeɛmbɛ ɓundɔ ɓáogea, ɓána Měma á Mokonga. Akeni ɓɔ́cɔcɛ ka ɗigimisa mmbe měma kau atóki mɔtɛ á Mokonga. Nga, ɓaɔtu-nyɔngɔ á mbɛa ɓáɓiki phɛɛ ka mokonda.

² Cɔ, ɓɔɔtɔka ɗigimisa Měma á Mokonga ɓe: Nkpa buakɛ mmbé aɓeeki gea Yéso Kiísito aɓɔkɔtɛani na nyama á kokpa, ana Měma á Mokonga.

³ Nkpa nde káɓeeki gǎkɛ ɓó, nna na Měma á Mokonga. Měma nde a gǎkɛ ně ande á koɓiɓia ka Kiísito. Ɗɔ́ɓɔɔ́ki gea, mɓiɓia ndɔ aobika, na kpanga kɛ̌kɛnde a ye tɔ ka mokonda.

⁴ Ɓaniki amɔ, ɓana-Mokonga, ɓǒkíndí ye tɔ ɓaɔtu-nyɔngɔ á mbɛa ndɔ, ka nyɔngɔ nde Měma nde a suɓi anu, anyɛ́nyi nnde á ka mokonda.

⁵ Ɓaɔtu-nyɔngɔ á mbɛa ɓánde ɓato á ka mokonda. Ka nyɔngɔ índɔ unge yɔnga nɛɓɔ a tɔ á ka mokonda, ɓáɔyɔnga na ɓato á ka mokonda ɓáɔ̌ɓɔ́ka.

⁶ Ɓesu gǎkɛ, ɓende ɓakpa ndea Mokonga. Nkpa nde aomúba yɛ, aɔsɔɔ́ka. Mmbé nna gǎkɛ nkpa ndea Mokonga, nnaɔsɔɔ́ka. K'índɔ unge ɓeoɗigimisa Měma á Mokonga ɗoni, na měma índe ana kisɛki.

Mokonga ande cina á ekondi

⁷ Ɓadani ékondi, ɓékondanɛni nga, Mokonga ande cina ékondi. Nkpa buakɛ mmbé ana ekondi ande muna-Mokonga na amúbi Mokonga.

⁸ Nkpa nde nna n'ekondi, nnaomúba Mokonga nga Mokonga ande ekondi.

⁹ Ɔ́nani ɓî Mokonga ɗáɔnisi ekondi nɛkɛ ka ɓesu: Ɗánteki ngɔmu nɛkɛ ka mokonda ka gea te, ɓéɓɛ na enda á mɛyɔ ka phɔakɛ.

¹⁰ Nndɔ unge ande ekondi: Nna ɓesu ɓáunge ɗéɓenkondi Mokonga, yɛ ndiu aámbé ɗásokondi, áonteka Miki-mǒko nɛkɛ, áɓɛ ɓea nyama á phɛ́a, ka íma á ɓojeɗe nɛsu.

¹¹ Ɓadani ékondi, ɓî Mokonga ɗásokondi, akeni phɔtɔ ɓesu ɓékondanɛni.

¹² Nna tanda na nkpa nde amɔnimbɛmɔnɔ Mokonga. Aoɓá na ɓeokondana, Mokonga aiki suɓi asu na ekondi nɛkɛ atɔtɔkɛani ka ɓesu.

¹³ K'índe unge ɓeoúba gea te, ɓeiki suɓi á Mokonga, yɛ áoika suɓi asu: Ɗásophi Měma akɛ.

¹⁴ Ɓesu, ɗɛ́ɓɛɔni na ɗigimisa gea, Abɛ ɗánteki Miki-mǒko nɛkɛ áɓɛ Namisi á mokonda.

¹⁵ Nkpa buakɛ mmbé aɓeeki gea te, Yéso ande Muna-Mokonga, Mokonga aiki suɓi akɛ, yɛ áoika suɓi á Mokonga.

¹⁶ Ɓesu, ɓeúbi na ɓeekea gea, Mokonga asókondi. Yɛ, ande ekondi. Nkpa nde ana ekondi ka enda akɛ, aiki suɓi á Mokonga na Mokonga áoika suɓi akɛ.

¹⁷ Aoɓá ekondi á ɗoni á ɗoni n'aɔnɛkana sɔsɔɓɛ asu, ɓeɓande na nseɓeɔ k'ésa á tena nyɔngɔ nga, enda asu ka mokonda ndee, akengeani na nnde á Yéso Kiísito.

¹⁸ Suɓi ékondi, kɔɓɔɓɔkɔ nna ɓei. Nga, ekondi á ɗoni á ɗoni aophaphea kɔɓɔɓɔkɔ nga, kɔɓɔɓɔkɔ a ka nkpa nde aoɓondea tambaga. Mmbé ana kɔɓɔɓɔkɔ, ekondi kátɔtɔkɛanimbɛ suɓi akɛ.

¹⁹ Ɓesu, ɓeokondana ka nyɔngɔ nde, Mokonga ɗásokondi mosá.

²⁰ Aoɓá nkpa n'agi te: «Nenkondi Mokonga», n'aonkangea muna-amakɛ, ámbé ande nto á mbɛa. Nga, aoɓá nkpa na kánkondi muna-amakɛ mmbé áɔmɔna, kátɔkɛku n'ankondi Mokonga mmbɔ nnaɔmɔna.

²¹ Ɛɔphi nde Yéso ɗásóphi aungee: Mmbé ankondi Mokonga, akeni phɔtɔ, ánkondɛ muna-amakɛ.