1 Yoáni 3 - Ɔngana á Kɛ̌kɛ

Ɓende ɓana-Mokonga

¹ Cɔ, ɔnani phɔ́ ɓî Abɛ Mokonga asokondi! Aɔsɔɔphana ɓ'anakɛ, n'ande ɗoni ɓende ɓana-Mokonga. Ɓato á ka mokonda ɓáná gǎkɛ osoúba ka nyɔngɔ nde, ɓánáomúba Mokonga.

² Ɓadani ékondi, kɛ̌kɛnde ɓe ye tɔ ɓana-Mokonga. Yɛ kásophangimbɛ gǎkɛ base, ámbé ɓeɓáeka ɓo. Nnde ɓeúbi, ande gea te, mbenɔ nde Kiísito asɛnɛkande, ɓéɓande ɓea yɛ nga, ɓɛmɔnande ɓíndɔ aɔ.

³ Nkpa buakɛ mmbé ana nseɓeɔ ndɔ ka Kiísito, ěsokosei ɓíndɔ Kiísito a kau.

⁴ Mmbé aogea ɓojeɗe, aoɓúna ɛɔphi ndea Mokonga. Nga, gea á ɓojeɗe, ande ɓúna á ɛɔphi.

⁵ Ɓooúba gea, Kiísito ɗábiki ka íma á ɓojeɗe ndeasu na nna tanda na ɓojeɗe suɓi akɛ.

⁶ Kaɓondɔ, nkpa nde aɔngani na yɛ, aɗeketi gea á ɓojeɗe. Mmbé a gǎkɛ ɔsɛkisia gea á ɓojeɗe, kámɔni tanda na úba akɛ.

⁷ Ɓaniki amɔ, nkpa kanódemɛmbɛ! Nkpa nde aɔtɔtɔkisa koɗoni, ande nto á koɗoni ɓea Yéso Kiísito.

⁸ Mmbé a gǎkɛ ogea ɓojeɗe, ande nkpa ndea Nketi. Nga, Nketi ɗági ɓojeɗe kpanga conjá á mokonda. Kaɓondɔ unge, Muna-Mokonga ɗásɛnɛki ka túkatúka ekuma ndea Nketi.

⁹ Nkpa buakɛ mmbé ande muna-Mokonga, nna ye ogea ɓojeɗe. Nga, nyɔngɔ á Mokonga aiki suɓi akɛ ɓea mbó. Nna ye ɔtɔka n'atútuisi gea á ɓojeɗe ka nyɔngɔ nde ande muna-Mokonga.

¹⁰ Aphe á uba ɓana-Mokonga na ɓana-nketi aungee: Nkpa nde nnaotamba k'aphe á koɗoni na nnaonkonda dakɛ, aámbé nna muna-Mokonga.

Akeni ekondi áɓɛ sɔsɔɓɛ anu

¹¹ Cɔ, nyɔngɔ nde ɗɔ́ɓɔɔ́ki kpanga nkpangeɔ aungee: Ɓékondanɛni ngǔngu asu.

¹² Ɓékéɓɛmbɛ ɓea Kaína, mmbé ɓa Nto-ajeɗe, ɓî ɗámmowe muna-amakɛ. Ɗámmowe ka ɓo? Ka nyɔngɔ nde tambea á Kaína ɗátú ájeɗe, nnde á muna-amakɛ gǎkɛ ɗátú á koɗoni.

¹³ Ɓaya, kaɓɛ ɓato á ka mokonda na ɓánokangei, ɓókotangaɛgɛmbɛ.

¹⁴ Ɓeoúba gea, ɓɛnyɛ́nyi ka kukuwa, ɓéongia ka enda á mɛyɔ ka nyɔngɔ nde, ɓěkondi ɓadasu. Mmbé nna n'ekondi a phɔ́tɔ suɓi á kukuwa.

¹⁵ Mmbé ankangei muna-amakɛ, ande nto á kaiso. Ɓo phɔtɔ oúba gea te, nto á kaiso nna na enda á mɛyɔ suɓi akɛ.

¹⁶ Ɓeoengekisa ekondi ka nyɔngɔ ndee: Kiísito ɗábisi enda akɛ ka ɓesu. Ɓesu phɔtɔ, akeni ɓébisɛ enda asu ka bɛɗaneaga ɓadasu.

¹⁷ Aoɓá nkpa n'ana ɛtɔi ka mokonda ndee, áɔmɔna dakɛ n'ana ɓuyɛnɛ, áonɗakea měma. Cɔ, mmbɔ aɔtɔka n'agi te ankondi Mokonga?

¹⁸ Ɓaniki amɔ, ekondi nɛsu kaɓɛ mɔnɔ tɔndɔ á k'aphenɔkɔ na yɔngaga á jǎi-jǎi. Akeni gǎkɛ ekondi nɛsu áɓɛ á ɗoni, nnde aoúbikana ka tambea asu.

¹⁹ K'índɔ unge ɓeúbande gea, ɓende ɓato á ɗoni. Mpɔ, měma asu áɔphɔnga mosá á Mokonga.

²⁰ Nga, nanga měma asu ásɔtɔnga, yɛ aangbóngbó kɔnyɛ́nya měma asu, aoengekisa kema bui.

²¹ Ɓadani ékondi aoɓá měma asu na nnaɔsɔtɔnga ande gea, ɓena nseɓeɔ mosá á Mokonga.

²² Yɛ aosopha kema bui nde ɓɛɔmɛma, ka nyɔngɔ nde, ɓeoamba ɛɔphi nɛkɛ, na tɔtɔkisa á kema nde amɓɔngɛi.

²³ Ɛɔphi nɛkɛ aungee: Ɓéɓeekeɛ ina á Anakɛ Yéso Kiísito, na kondana ngǔngu asu ɓíndɔ ɗásósosi.

²⁴ Mmbé aoamba ɛɔphi nɛkɛ, ɓáɔngani na yɛ. Cɔ, ɓeoúba gea, ɓɛɔngani na yɛ ka nyɔngɔ nde, asóphi egabɔ á Měma á kanga ɓojeɗe.