1 Yoáni 2 - Ɔngana á Kɛ̌kɛ

Kiísito abiki osógama

¹ Ɓaniki amɔ, nenóɗundui nyɔngɔ nde ka gea, ɓókógeɛ mɔnɔ ɓojeɗe. A gǎkɛ oɓá, ka ɓakpa n'agi ɓojeɗe, ɓena ngami mosá á Abɛ n'ande Yéso Kiísito, Nto á koɗoni.

² Nga, Yéso sasakɛ ɗěbisi ka phɛ́a ka gea, Mokonga áímɛ ɓojeɗe nɛsu. Nna tɔndɔ ɓojeɗe nɛsu sisasu, phɔtɔ nnde á ka mokonda bui.

³ Aoɓá na ɓeoamba ɛɔphi ndea Mokonga, mpɔ ɓéoɗigimisa gea, ɓemúbi yɛ.

⁴ Mmbé ayɔngi gea: «Nemúbi», na nna gǎkɛ oamba ɛɔphi nɛkɛ, ande nto á mbɛa, ɗoni nna suɓi akɛ.

⁵ Mmbé a gǎkɛ oamba nyɔngɔ ndea Mokonga, ekondi nɛkɛ atɔtɔkɛani ɗoni á ɗoni ka yɛ. K'índɔ unge ɓeoúba gea, ɓɛɔngani na Mokonga.

⁶ Cɔ, mmbé agi gea, aɔngani na yɛ, akeni tambea akɛ ákengeanɛ n'índe á Yéso.

Ɛɔphi á kɛ̌kɛ

⁷ Ɓadani ékondi, kénoɗundui ɛɔphi á kɛ̌kɛ. A ndiu ɛɔphi á kala, nndɔ ɗɔ́ɓɔtɔí kpanga nkpangeɔ. Ɛɔphi á kala ndɔ ande nyɔngɔ nde ɗɔ́ɓɔɔ́ki ye.

⁸ Ɛɔphi nde nenóɗundui ande gǎkɛ tɔ á kɛ̌kɛ, nnde ɗoni í aɔnɛkani base suɓi á Kiísito na suɓi anu nga, kaiphiɔ age, owanga á ɗoni a ye ɔbɛnya.

⁹ Mmbé agi te aiki k'ówanga n'ankangei muna-amakɛ, yɛ a phɔ́tɔ ka keiphe.

¹⁰ Mmbé ankondi muna-amakɛ, yɛ aámbé aiki k'ówanga. Nna n'ephiphi nde amɓɛtɛkisande.

¹¹ Mmbé ankangei gǎkɛ muna-amakɛ, a ka keiphe. Aotamba suɓi í kángá á úba ɔma nde aoga nga, kaiphiɔ aɗaki iso akɛ.

Ɓókókondɛmbɛ mokonda

¹² Ɓaniki amɔ, nenóɗundui ka nyɔngɔ nde, Mokonga aími ɓojeɗe nɛnu k'ína á Yéso Kiísito.

¹³ Ɓ'abɛ, nenóɗundui ka nyɔngɔ nde, ɓomúbi mmbé ɗátú kpanga nkpageɔ. Ɓaganda, nenóɗundui ka nyɔngɔ nde, ɗóɓonkíndí Nto-ajeɗe.

¹⁴ Ɓaniki amɔ, nenóɗundui ka nyɔngɔ nde, ɓomúbi Abɛ. Ɓ'abɛ, nenóɗundui ka nyɔngɔ nde, ɓomúbi mmbé ɗátú kpanga nkpangeɔ. Ɓaganda, nenóɗundui ka nyɔngɔ nde, ɓona ɓukpɛkpɛ, nyɔngɔ á Mokonga a suɓi anu na ɗóɓonkíndí Nto-ajeɗe.

¹⁵ Cɔ, ɓókókondɛmbɛ mokonda na konda á kema nde a suɓi í. A gǎkɛ oɓá nkpa n'akondi mokonda, ande gea te, kánkondi Abɛ.

¹⁶ Nga, kema bui á ka mokonda, kaɓɛ mɔphɛ á tɔtɔkisa siki á ka nyama, konda nnde iso aɔni, ébeba na kema á ka mokonda, nndɔ bui nnaotóka mɔtɛ á Abɛ, a ndiu otóka ka mokonda.

¹⁷ Mokonda aɔnyɛ́nya na mɔphɛ á kema bui nde a suɓi í. Nkpa nde a gǎkɛ ɔtɔtɔkisa mɔphɛ ndea Mokonga, aendande mɛyɔ.

Ɓaɓiɓia ndea Kiísito

¹⁸ Ɓaniki amɔ, mbenɔ á sungiaga ungee. Ɗɔ́ɓɔɔ́ki gea te, Mɓiɓia á Kiísito aobika. Ɓaɓiɓia akɛ ɓá ye sɛnɛki ye tɔ ɓásii na ɓeúbi gea, ɓe ye tɔ ka mbenɔ á sungiaga.

¹⁹ Ɓaɓiɓia ndɔ, ɗáɓátókei mɔtɛ-asu, ɗáɓákátú gǎkɛ ɓunɛsu. Ɗáɓátúoɓá ɓunɛsu, ámbé ɗáɓáiki kimoci na ɓesu. Ɓásoɗeketi gǎkɛ ka gea te, áubikanɛ base gea, ɗáɓákátú ɓunɛsu.

²⁰ Cɔ, Kiísito ɗánóphi ɓenu Měma á kanga ɓojeɗe ka gea, ɓenu ɓɔbu ɓóúbɛ ɗoni.

²¹ Ɓî nenóɗundui, nna ka nyɔngɔ nde ɓókóoúba ɗoni, a ndiu ka nyɔngɔ nde ɓooúba gea, mbɛa nnaotóka ka ɗoni.

²² Cɔ, ani mmbé ande nto á mbɛa? Ande mmbé aɔyɔnga te, Yéso nna Kiísito. Yɛ aámbé ande mɓiɓia á Kiísito. An'yé Abɛ n'Anakɛ mɔngɔ ímoci.

²³ Ande gea te, nkpa nde an'yé Anakɛ, an'yé phɔtɔ Abakɛ. Mmbé amɓeeki gǎkɛ Anakɛ, amɓeeki phɔtɔ Abakɛ.

²⁴ Aoɓá nyɔngɔ nde ɗɔ́ɓɔɔ́ki kpanga nkpangeɔ n'aiki suɓi anu, ɓɔɔnganande phɔtɔ n'Anakɛ n'Abakɛ.

²⁵ Mɔkɔ nde yɛ sisakɛ asɔɔku ande enda á mɛyɔ.

²⁶ Cɔ, nenóɗundui ɓoabi nde ka nyɔngɔ á ɓunde ɓáokáɓa dema anu.

²⁷ Ɓî ɓo ye tɔi Měma á Mokonga nnde a suɓi anu, ɓókó ye gǎkɛ na siki á ngoisigi ɓaangbo. Nga, Měma á Mokonga aonógoisaga kema bui. Goisaga nɛkɛ ande á ɗoni, nna á mbɛa. Kaɓondɔ, ɔnganani na Kiísito ɓíndɔ Měma á Mokonga atónogoisigi.

²⁸ Cɔ, ɓaniki amɔ! Kɛ̌kɛnde ikani suɓi á ɔngana na Kiísito ka gea te, esa nde asɛnɛkaeka, ɓéoɓá na nseɓeɔ kángá á kuwa na soni mosá akɛ ka bika akɛ.

²⁹ Ɓî ɓooúba gea Kiísito ande nto á koɗoni, akeni ɓóúbɛ phɔtɔ gea, nkpa buakɛ mmbé aogea kema ka koɗoni ande muna-Mokonga.