1 Yoáni 1 - Ɔngana á Kɛ̌kɛ

Moyo á endisa

¹ Ɓɛɔnɔtɔmia Moyo nde aoendisa nnde ɗátú kpanga nkpangeɔ. Ɗɛ́ɓɛɔ́ki ú, ɓɛ́ɔɔna ú n'íso asu sisasu, ɓeotúmia ú n'íso, ɓéoɓaɓa ú.

² Enda kau áɔɔnisa base, ɓɛ́ɔɔna ú. Ɓende ɓaɗigimisi, ka ɓondɔ unge ɓɛɔnɔtɔmia mbino á enda á mɛyɔ nnde ɗátú bíbí á Abɛ na áɔɔnisa base.

³ Cɔ, nnde ɗɛ́ɓɛɔni na ɔ́ka í, aunge ɓɛnɔtɔ̌mi phɔtɔ ka gea te, ɓɛ́ɔnganɛ na ɓenu ka komunamema nde ɓe kau n'Abɛ, n'Anakɛ Yéso Kiísito.

⁴ Ɓenóɗundui nyɔngɔ nde ka gea te, ɓéɓɛ na maseye phɛɛ.

Tambani k'owanga

⁵ Cɔ, mbino nde ɓɛɔnɔtɔmia n'atóki k'aphenɔkɔ á Yéso Kiísito aungee: Mokonga ande owanga, ka yɛ, kaiphiɔ nna tanda ɓei.

⁶ Aoɓá na ɓɛyɔngi gea te: «Ɓe ka komunamema na yɛ», na ɓeotamba ka kaiphiɔ, ámbé ɓɛyɔngi mbɛa kángá á tɔtɔkisa ɗoni.

⁷ A gǎkɛ oɓá na ɓeotamba k'owanga ɓíndɔ yɛ sisakɛ a k'owanga, ɓe ka komunamema ngǔngu asu. Magia á Anakɛ Yéso, aosokosea ɓojeɗe nɛsu bui.

⁸ Aoɓá na ɓɛyɔngi gea, ɓéké na ɓojeɗe, ande gea, ɓědemi sisasu, ɗoni nna suɓi asu.

⁹ Aoɓá gǎkɛ na ɓekěti tambea asu, Mokonga nto á koɗoni mmbé aɔtɔtɔkisa mɔkɔ nɛkɛ, aímande ɓojeɗe nɛsu bui na sokosea asu.

¹⁰ Aoɓá na ɓɛyɔngi te: «Ɓékégi ɓojeɗe» ámbé ɓengaí Mokonga gea te, ande nto á mbɛa na Nyɔngɔ nɛkɛ nna suɓi asu.