1 Pɛ́tɛɛ 5 - Ɔngana á Kɛ̌kɛ

Ɓɔphɛi ka ɓagbɛga á kanisa

¹ Cɔ, kɛ̌kɛnde nɛɔ̌phɛa ɓadani ɓagbɛga á kanisa nde ɓá ka ɔlɔ anu. Eme nende phɔtɔ ngbɛga ɓea ɓɔ. Nende nɗigimisi á tambaga ndea Kiísito, neɓande na ka ɓoombia nde asɛnɛkande.

² Ambani etuge ndea Mokonga nnde ɗánóphi kángá sosea anu. Ambani ndiu ú na měma ánjá ɓíndɔ Mokonga akondi. Bɛɗanagani kángá mɔphɛ á tɔá ka ɓojeɗe, óyameani ndiu k'ékuma na měma ékondi.

³ Ɓókobɛɗaneɛgɛmbɛ kɔkɔta gǔ á ɓunde Mokonga ɗánóphi ka amba aɓɔ, ɓáni ndiu mphangiɔ ka ɓɔ.

⁴ Mbenɔ ndɔ Mɔkɔta á ɓaambi-etuge asɛnɛkande, ɓɔtɔande kuku á ɓoombia nde ɓonjánja í nna osía.

⁵ A phɔtɔ ɓó ka ɓenu ɓaganda na ɓaseka, ɔ́ɓɔ́kani ɓagbɛga á kanisa. Ɓenu ɓɔbu ka tambea anu, ódidisani nkpa moci ka dakɛ nga, Ɓuku á Mokonga ayɔngi gea: «Mokonga nnaogamana na ɓato á ɓemboko, a ndiu ǒɓopha ɓato á édidisa ɓonjánja-ékondi nɛkɛ.»

⁶ Cɔ, ódidisani kusi á njaga á ɓukpɛkpɛ ndea Mokonga ka gea ánotáisɛ ka mbenɔ nde akeni.

⁷ Phombeani tambaga á ka měma anu bui mɔtɛ-akɛ nga, aonóamba.

⁸ Kóɗani iso, ɓókoyengiɛmbɛ! Mɓiɓia nɛnu nketi aotimba ɓea simba n'aɔgɔuma ka kaɓa ani mmbé aongoa.

⁹ Ɓókogamanɛ na yɛ, kakamanani ka ɓeekea. Úbani gea ɓadanu ɓaɓêki ka mokonda bui ɓá tɔ ka tambaga ndɔɔ.

¹⁰ Mokonga mɛna-ɓonjánja-ékondi bui, ɗánɔɔphani ka gea te ɓóɓɛ kimoci na yɛ ka ɓoombia mɛyɔ ka jukana anu na Kiísito. Cɔ, mbusa á tambaga anu ka mbenɔ ábɔa, anóconjande goto, anóphande ɓukpɛkpɛ, anógbagisagande ka měma, áonópha ésimbia.

¹¹ Ɓukpɛkpɛ ande akɛ esa bui! Áɓɛ ɓó.

Nyɔngɔ á ka sungiaga na mɔkɔ

¹² Síla, ɗámoengi ka ɗundua á ɓaoɓa ángbí ndee. K'éme, ande mɓêki ímbe ɓa á ɗoni. Ɗénóɗundui ú ka gbagisaga anu na engekisa anu gea ɓonjánja-ékondi ndea Mokonga nnde ande á ɗoni ɓókoɗeketɛmbɛ.

¹³ Ɓato á ka kanisa á Babɛ́li ɓunde Mokonga ɛ̌sɔmbu ɓea ɓenu, ɓánósesi. Málikɔ miki nɛmɔ á ka měma anósesi phɔtɔ.

¹⁴ Seseanani k'ékondi á komunamema. Ɓáni na ɓujɛjɛ ɓenu ɓɔbu íɓunde ɓo kimoci na Kiísito.