1 Pɛ́tɛɛ 4 - Ɔngana á Kɛ̌kɛ

Ɓaɓêki ɓákatani na ɓojeɗe

¹ Cɔ, ka nyɔngɔ nde Kiísito ɗátambigi ka nyama akɛ, ɓenu phɔtɔ, ókakamisani ka ɓá na mɔphɛ nde ɗátú ně. Nga, nkpa nde atambigi ka nyama akɛ, akatani na ɓojeɗe ɗoni.

² Kpangá á kɛ̌kɛnde, ka mbenɔ nde anójiganei ka enda anu ka mokonda, tambeani ɓíndɔ Mokonga akondi, kángá tambea ndiu ɓíndɔ měma á kokpa akondi.

³ Eya, kala, ɗɔ́ɓɔtɔtɔkisi ka mbenɔ ásii mɔphɛ á ɓakpa nde ɓákáomúba Mokonga. Tambea anu ɗátú á ɓato á mambɔ, mɔphɛ ájeɗe, ɛbɛɗi á makana, osǎ, ɓoita á makana phɛɛ na ɗokomisa á ɓamokonga á mbɛa.

⁴ Cɔ, kɛ̌kɛnde, ɓakpa nde ɓákáomúba Mokonga ɓáotangaaga nga, ɓókó ye kimoci na ɓɔ k'aphe á nyɔngɔ ájeɗe-jeɗe. Ka nyɔngɔ índɔ unge ɓáonóbóma.

⁵ Ɓɔ, ɓáyɔngande gǎkɛ nyɔngɔ nɛɓɔ mosá á Mokonga, mmbé a ye n'ɛ̌ɓɔngisigi ka tena nyɔngɔ á ɓakpa nde ɓáku na ɓunde ɓáoenda.

⁶ Ka nyɔngɔ índɔ unge ɗáɓátɔ̌mi phɔtɔ Mbino-Ánjá ka ɓakpa nde ɓáku. Ɗáɓáteni nyɔngɔ nɛɓɔ ɓea ɓakpa ɓɔbu. Kɛ̌kɛnde gǎkɛ, ɓáɔtɔka na ɓáendi ka ɓukpɛkpɛ á Měma á kanga ɓojeɗe ɓíndɔ Mokonga akondi.

Egabɔ ɗanga-ɗanga ndea Měma á kanga ɓojeɗe

⁷ Cɔ, sungiaga á kema bui a ye tɔ bíbí. Kaɓondɔ, koɗani iso na ɓáni na kɔɓɔɔngɛ ka gea, ɓóɓɛ na ɓukpɛkpɛ á mɛma á Mokonga.

⁸ Mosá á kema bui, ɓáni n'ekondi sɔsɔɓɛ anu phɛɛ nga, ekondi aogbukumia ɓojeɗe ásii.

⁹ Seseanagani kángá á ngɔngɔnaga.

¹⁰ Ambe nkpa na nkpa ábɛɗaneɛgɛ egabɔ nde Mokonga ɗámophi, ka ɓonjánja á ɓakpa ɓunɛngbo. Kaɓondɔ unge, ɓoɓande ɓaambi ɓánjá á egabɔ ɗanga-ɗanga nde Mokonga ɗánóphi.

¹¹ Nkpa nde aɔphɛa, á phɛɛ́ tɔ nyɔngɔ nde Mokonga ɗáyɔngi. Nkpa nde aɔbɛɗanaga, ábɛɗanɛgɛ tɔ ka ɓukpɛkpɛ nde Mokonga ɗámophi. Kaɓondɔ, kema bui nde ɓoogea ɓámbebɛ Mokonga kau k'aphe ndea Yéso Kiísito, mmbé ana ɓoombia na kɔkɔta k'ésa bui! Áɓɛ ɓó.

Mokiísito na tambaga

¹² Ɓadani ékondi, ɓókotangaɛgɛmbɛ ɔna á ɓî ɓo suɓi á nsa á tombaga, ɓea kema nde kátókeni donda anu.

¹³ Cɔ, ɓáni ndiu na maseye ka ɓá anu na ka gbútuka á tambaga ndea Kiísito, ka gea, ɓenu phɔtɔ ɓótúmɛ na maseye phɛɛ mbenɔ nde aphangiande ɓoombia nɛkɛ base ka nkpa buakɛ.

¹⁴ Ɓonde ɓato á maseye aoɓá na ɓáonóbóma ka nyɔngɔ á ina á Kiísito nga, Měma á ɓoombia, ande gea Měma á Mokonga aiki suɓi anu.

¹⁵ Ka ɓenu moci katambɛgɛmbɛ ɓea nto á kaiso, ɓea nkukuɓa, ɓea nkpa nde agi ájeɗe na ɓea nkpa n'ěngisi ka nyɔngɔ á nkpa ɓaangbo.

¹⁶ Nkpa a gǎkɛ otambaga ka nyɔngɔ nde ande mokiísito, kakuwɛmbɛ na soni, ámbebɛ ndiu Mokonga ka ɓa akɛ na ina ndɔɔ.

¹⁷ Cɔ, mbenɔ á tena nyɔngɔ a bîmani. Aoɓá tena á nyɔngɔ n'akpangi ka ɓesu ɓato á Mokonga, sungiaga í aɓande ɓoni ka ɓunde ɓáoyá ɓeekea á Mbino-Ánjá ndea Mokonga?

¹⁸ Aɓíndɔ Ɓuku á Mokonga ayɔngi: «Aoɓá nto á koɗoni n'aami k'akpɛ, aɓáeka ɓoni ka nkpa nde ka ɓeeki na nto á ɓojeɗe?»

¹⁹ Cɔ, ɓakpa nde ɓáotambaga ka nyɔngɔ á tɔtɔkisa á mɔphɛ ndea Mokonga, ɓátútuisɛ tɔtɔkisa á kema ánjá. Ɓábisɛ phɔtɔ měma aɓɔ ka njaga á Mokonga mmbé ěconji. Yɛ, ande mmbé nnaotinganisa mɔkɔ nɛkɛ.