1 Pɛ́tɛɛ 3 - Ɔngana á Kɛ̌kɛ

Ɓɔphɛi ka ɓake na ɓamunyaɓɔ

¹ A phɔtɔ ɓó ka ɓenu ɓake, ɔ́ɓɔ́kani ɓamunyanu. Nga, nanga ka ɓɔ sɔsɔɓɛ aɓɔ ɓákáoɓeekea nyɔngɔ á Mokonga, ɓǒɓoteande ka tambea anu ánjá kángá ngoɗea aɓɔ ka nyɔngɔ,

² nga, ɗáɓáɔni tambea anu n'ánjá na ɓî ɓǒɗokomisa.

³ Ɛtɔnda ínɛnu kaɓɛmbɛ ka nsɛngɛ ɓea: oka á sekamɔ̌ na ɔ́la á mbanga á láté na bɔngɔ ánjá.

⁴ Ɛtɔnda ínɛnu áɓɛ ndiu á ka měma, nnde nnaoújukana. Akeni ɛtɔnda ndɔ átókɛ ka měma áɔɗɛ̌ na aphɔngɔ, nnde ana kantíti ásii k'íso á Mokonga.

⁵ Kala, ɓake íɓunde ɗáɓáomɓánga Mokonga na seɓea akɛ, ɗáɓɛ̌tɔndi ka nyɔngɔ á ɔ́ka ɓamunyaɓɔ.

⁶ A tɔ ɓíndɔ Sála ɗáɔmɔ́ka Abalaámu, áɔmɔphana «mɔkɔta». Kɛ̌kɛnde, ɓonde ɓaseka nɛkɛ, aoɓá na ɓoogea ánjá, kángá á kɔɓɔɓɔkɔ á kema.

⁷ Ɓenu phɔtɔ ɓǒko, ikani na ɓake ɓánu ka ɔ́kana ánjá, na ɓooúba gea, ɓáɔlɔmani kɔnɔnyɛ́nya. Ambe ɓóoɗokomisɛ nga, ɓɔ ɓátɔande egabɔ á enda á ɗoni ɓea ɓenu. Geani ɓó ka gea, ka kema kaɗakɛmbɛ ɛmɛmi nɛnu.

Ambe ɓaɓêki ɓágeɛ ánjá, nanga ɓátambaga

⁸ Ka sungiaga, ɓáni ɓenu ɓɔbu na kanisia mo na měma mo. Kondanani ɓea ɓato á komunamema, ɓáni na měma ánjá, n'ědidisa sɔsɔɓɛ anu.

⁹ Ɓókosikisianɛmbɛ ɓojeɗe ka ɓojeɗe, na mbóma ka mbóma. Sikisianani ndiu nyɔngɔ ánjá nga, ka nyɔngɔ índɔ unge Mokonga ɗánɔɔphani, ka gea, abisande njaga akɛ gǔ anu.

¹⁰ Nga, ɗáɓáɗundu suɓi á Ɓuku á Mokonga ɓe: «Mmbé akondi enda ánjá na ɔna esa á ɓɔjɛmɛ, akeni áambɛ eɗáka akɛ na ɓojeɗe, aphenɔkɔ akɛ kayɔngɛmbɛ mbɛa.

¹¹ Áɗeketɛ ɓojeɗe, ágeɛ ánjá. Ákaɓɛ ɓujɛjɛ, ásuiɛ kaɓa í ɗoni.

¹² Nga, iso á Mɔkɔta aɔ̌ɔnjia ɓato á ɗoni. Aphéngi kecue akɛ ka ɔ́ka ɛmɛmi nɛɓɔ. Mɔkɔta nna gǎkɛ ɔtɔka n'aɔ́kani na ɓakpa nde ɓáogea ájeɗe.»

¹³ Aoɓá na ɓosui gea ánjá, ani mmbé anógeande ájeɗe?

¹⁴ Cɔ, nanga ɓótótambaga ka nyɔngɔ nde ande á ɗoni, ɓotóɓande na maseye. Ɓókǒɓángɛmbɛ ɓakpa, ɓókóagatanɛmbɛ ka měma.

¹⁵ Nɗokomisani ndiu Kiísito ka měma anu ɓea Mɔkɔta nɛnu. Aoɓá na ɓáonóúsia cina á nseɓeɔ nɛnu ka Kiísito, ɓáni tɔ mbenɔ bui na nyɔngɔ á sikisia aɓɔ.

¹⁶ Geani tɔ ɓó na měma aphɔngɔ na ɓánga. Ɓáni na měma ánjá. Nanga ɓakpa ɓánɔtɔnga ka mbɛa na bóma anu ka nyɔngɔ á tambea anu ánjá ɓî ɓonde ɓakiísito, ɓákuwande na soni.

¹⁷ Nga, ambe tambaga n'ogea kema ánjá, aoɓá nndɔ n'ande mɔphɛ á Mokonga, na kótambigi ka nyɔngɔ á gea kema ájeɗe.

Yéso Kiísito akíndí kukuwa

¹⁸ Cɔ, Kiísito yɛ sasakɛ, ɗátambigi phɔtɔ mɔngɔ ímoci tɔ ka nyɔngɔ á ɓojeɗe nɛsu. Yɛ, nto á koɗoni, ɗáku ka nyɔngɔ á ɓunde ɓáná ɓato á koɗoni ka gea, ánophangiɛ aphe á gǎ mɔtɛ á Mokonga. Ɗáku kukuwa á ka nyama, Měma á kanga ɓojeɗe â gǎkɛ onjujukisa ka kukuwa.

¹⁹ Ka ɓukpɛkpɛ á Měma á kanga ɓojeɗe ndɔ, aunge ɗáge phɔtɔ ɔtɔmia nyɔngɔ á ɓoamia á ka měma nde ɗá ka mekakɔ.

²⁰ Ɓato á mekakɔ ndɔ ɓánde ɓundɔ ɗáɓákámɓeeki Mokonga, kala ɓî Mokonga ɗátú na měma éndǎ ka ɓɔ, ka matú ndɔ Nɔ́a ɗáɔsɛka koko ángbó. Ɓakpa ɓábɔa tɔ, ka ɓɔbu ngianjaga isaɔ (8), ɓáunge ɗáɓáami ka iɓo.

²¹ Iɓo ndɔ, ande mphangiɔ á oɓatisɔ, nnde aonóamisa ka měma kɛ̌kɛnde. Oɓatisɔ ndɔ, nna nyɔngɔ á sokosa nkiki á ka nyama, a ndiu nyɔngɔ á ɓeekea mɔphani ndea Mokonga na měma á sokosea. Oɓatisɔ ndɔ, anoamisi ka měma ka nyɔngɔ á jujúka á Yéso Kiísito ka kukuwa.

²² Yɛ, Yéso aámbé ɗáge na koba, aiki ka njaga á mǔku á Mokonga, na ana kɔkɔta gǔ á ɓamalaéka, ɓamɛna-kɔkɔta na ɓamɛna-ɓukpɛkpɛ á na koba.