1 Pɛ́tɛɛ 2 - Ɔngana á Kɛ̌kɛ

¹ Cɔ, ɓî aɓó, ɗeketani etéte á ɓojeɗe bui: mbɛa, maibe, nsengo na maca.

² Ɓáni ɓea ɓambɛnjɛ. Ɓíndɔ ɓambɛnjɛ ɓána siki á unga ɛɓɛ, ɓenu phɔtɔ ɓáni na siki á unga ɛɓɛ ánjá á ka měma ka gea ɓɔ́mɔtɛ na ama ka měma n'ande nyɔngɔ á Mokonga.

³ A ɓíndɔ ɓáɗundu suɓi á Ɓuku á Mokonga gea: «Ɗóɓoúbi gea Mɔkɔta aanjánjá.»

Ɓakpa nde ɓána ɓeekea ɓánde ɓea ɛtɛ nde ana enda

⁴ Mbîmisiani Mɔkɔta. Yɛ ande ɛtɛ nde ana enda. Ɛtɛ nde ɓakpa ɗáɓáyé, a ndiu unge Mokonga ɗásɔmbu n'ana kantíti phɛɛ mosá akɛ.

⁵ Ɓenu phɔtɔ, ɓonde ɓea ɓ'ɛtɛ nde ana enda, ambe Mokonga ánɔbɛɗaneɛgɛ ka mɔphɛkɔ éndu á Mokonga á ka měma. Kó unge ɓoɓande ekombo á ɓatoɓeigi-phɛ́a ɓunde ɓáná na ɓojeɗe. Ɓophúiande ɔphɛ́ɔ á ka měma nnde aɔmɓɔngɛa Mokonga k'aphe ndea Yéso Kiísito.

⁶ Ka nyɔngɔ nde Ɓuku á Mokonga ayɔngi ɓe: «Ɗɛ́sɔmbu ɛtɛ á kantíti phɛɛ, nnde nebisande suɓi á Sayúni ɓea ɛtɛ nde aosúkia mɔphɛkɔ. Mmbé aomɓeekea, kákuwɛeka tanda na soni.»

⁷ Cɔ, ka ɓenu íɓunde ɓoɓeeki, ɛtɛ ndɔ ana kantíti phɛɛ. Ka ɓunde gǎkɛ ɓákáɓeeki: «Ɛtɛ nde ɓaphɛki ɗáɓáyé, aunge ande ngeɔ á mɔphɛkɔ.»

⁸ Ɓáɗundu phɔtɔ ɔma nɛngbo gea: «Ɛtɛ ndɔ ande ɛtɛ á ɓɛtɛkisa. Ande ekǒngo á gusisa.» Ɓakpa ndɔ ɗáɓáɓɛtɛkani ka nyɔngɔ nde, ɗáɓáyé ɔ́ka á nyɔngɔ ndea Mokonga, na moangɔ ndɔ tɔ unge Mokonga ɗábisi ka phɔa ɓɔ.

⁹ Cɔ, ɓenu gǎkɛ, ɓonde ɓato á k'ékombo nde Mokonga ɛ̌sɔmbu, n'ekombo á ɓatoɓeigi-phɛ́a ndea Moamɛ, ekuna á ɓato á kanga ɓojeɗe, ɓakpa ndea Mokonga. Yɛ, aámbé ɗánɔɔphani ka toka anu ka kaiphiɔ na ngia anu ka owanga nɛkɛ á ɓoombia ka gea, ɓɔtɔ̌miɛ ekuma nɛkɛ á ketangaɔ.

¹⁰ Kala, ɗóɓókótú ɓato á k'ékombo ndea Mokonga, kɛ̌kɛnde, ɓo ye tɔ ekombo nɛkɛ. Kala, Mokonga ɗákáonókuia ngomi, kɛ̌kɛnde gǎkɛ, a ye tɔ onókuia ngomi.

Enda á ɓabɛɗanigi ndea Mokonga

¹¹ Ɓadani ékondi, ɓonde ɓakɛni na ɓato á motô ka mokonda ndee. Kaɓondɔ unge nɛnɔ́phɛí gea, teani mɔphɛ ájeɗe, nnde aomana na měma anu.

¹² Tambeani ánjá ka ɔlɔ á ɓakpa nde ɓánáomúba Mokonga. Kaɓondɔ, nanga ɓáyɔnga mbɛa ka phɔa anu gea, ɓoogea ájeɗe, ɓáɔnande ekuma nɛnu ánjá, ɓánɗokomisande Mokonga k'ésa nde abikande.

¹³ Ɔ́ɓɔ́kani ɓakɔta ɓɔbu á ka mokonda ka nyɔngɔ nde, ɓomɓeeki Mɔkɔta: Kaɓɛ moamɛ mmbé ana kɔkɔta gǔ á ɓakpa ɓɔbu,

¹⁴ kaɓɛ ɓakɔta á ntanga-nji, ɓunde aéteki ka tambisaga á ɓakpa nde ɓáogea ájeɗe na sega á ɓunde ɓáogea ánjá.

¹⁵ Ɓondɔ unge Mokonga akondi gea, ɓógeɛ ɓonjánja, ka gea te, ɓabóbó na ɓato á jǎi-jǎi ɓáphɔngɛ.

¹⁶ Tambeani ɓea ɓakpa nde ɓátóki ka kɔkɔɓɛ, a gǎkɛ oɓá n'a ɓó, nndɔ kaɓɛmbɛ aphe á gbukumia á ɓojeɗe. Tambeani ndiu ɓíndɔ akeni ka ɓabɛɗanigi ndea Mokonga.

¹⁷ Óɗokomisani ɓakpa ɓɔbu, ókondani ɓadanu ɓaɓêki, mɓángani Mokonga, nɗokomisani moamɛ.

Mphangiɔ á Kiísito

¹⁸ Ɓenu ɓabɛɗanigi, ɔ́ɓɔ́kani ɓakɔta nɛnu na ɓánga aɓɔ. Nna tɔndɔ ɓunde ɓá ɓánjá na ɓá aphɔngɔ, phɔtɔ na ɓunde ɓá akae.

¹⁹ Aánjá mosá á Mokonga mbenɔ nde ɓoophiphia tambaga nde ɓókótókeni ně ka nyɔngɔ á ɓeekea á Mokonga.

²⁰ Ana obebɔ sina aoɓá na ɓophiphíí tambaga ka nyɔngɔ nde ɓogi ájeɗe? A gǎkɛ oɓá na ɓophiphíí tambaga ka nyɔngɔ nde ɓogi kema ánjá, nndɔ amɓɔngɛi Mokonga.

²¹ Ka nyɔngɔ índɔ unge Mokonga ɗánɔɔphani nga, Kiísito ɗátambigi phɔtɔ ka phɔa anu, áonóɗeketea mphangiɔ ka gea, ɓóɓeɛ angá akɛ.

²² Yɛ, ɗákági tanda ɓojeɗe, na ɗákáyɔngi tanda mbɛa.

²³ Cɔ, mbenɔ nde ɗáɓámbómi, kěsikisiɛ mbóma. Mbenɔ nde ɗáɓántambisigi, kěɓángisɛ tanda ɓakpa. Ɗébisi ndiu sasakɛ ka njaga á Mokonga mmbé aotena nyɔngɔ na koɗoni.

²⁴ Yɛ sasakɛ, ɗákumbi ɓojeɗe nɛsu ka nyama akɛ gǔ á moyangɔ gea te, ɓékuwɛ ka nyɔngɔ á ɓojeɗe, na ɓéendɛ ka nyɔngɔ á koɗoni. Nga, ka nyɔngɔ á aphɛphɔa nɛkɛ aunge ɓoami.

²⁵ Cɔ, ɗóɓotú ɓea ɓamɔgɔgɔ na ɓáɓúngigi, kɛ̌kɛnde gǎkɛ, ɓosikianigi ka mɓondigi nɛnu, n'ande nambi á měma anu.