1 Pɛ́tɛɛ 1 - Ɔngana á Kɛ̌kɛ

Nsesɔ

¹ Eme Pɛ́tɛɛ, nteki nde ɓa Yéso Kiísito, aámbé neɗundu ɓaoɓa ndee. Neɗundu ka ɓakpa nde Mokonga ɛ̌sɔmbu, ɓunde ɗáɓáphanjekani na ɓáoenda ɓea ɓakɛni ka ntanga-nji á ka Pɔ́ntɔ, Galatía, Kapadɔkía, Asía, na Bitinía.

² Abɛ Mokonga ɗánɔsɔmbu mosá ka ɓeana na moangɔ nɛkɛ. Áonóbisa ɓato á Mokonga kángá ɓojeɗe ka ɓukpɛkpɛ á Měma akɛ ka gea, ɓɔ́mɔ́kɛ Yéso Kiísito na magia akɛ ánosokoseɛ. Cɔ, ɓonjánja-ékondi ndea Mokonga na ɓujɛjɛ áɓikɛ gǔ anu.

Nseɓeɔ nde nna na sungiaga

³ Ɓémbebɛni Mokonga, Aba-Mɔkɔta nɛsu Yéso Kiísito! Ka nyɔngɔ á ɓongbóngbó á ngomi nɛkɛ aunge ɓɛɓɔkɔtɛani goto mɔngɔ á koiɓɛ, ka jujúkisa á Yéso Kiísito ka kukuwa sɔsɔɓɛ á ɓasí. Kaɓondɔ unge ɓena nseɓeɔ nde ana enda,

⁴ na ɓondea á ɓotukɔ nde Mokonga anóbisíí na koba nnde nnaoújukana, nnaɔjɔɔkana, nnaoɓuɓia.

⁵ Na ɓenu sasanu akoɓá na ɓoɓeeki, Mokonga mɛna-ɓukpɛkpɛ áonóamba ka amisa anu. Ɓoamia ndɔ aɔnɛkanande base ka mbenɔ á sungiaga á mokonda.

⁶ Ka nyɔngɔ índɔ bui unge, ɓáni na maseye phɛɛ, nanga kɛ̌kɛnde akeni ɓóɓɛ suɓi á tombaga ɗanga-ɗanga ka mbenɔ ábɔa.

⁷ Tombaga ndɔ ande ka gea, ɓáengekisɛ ɓeekea nɛnu ka gea áúbikanɛ gea, ande á ɗoni. Láté ande kema nde aoújukana, ɓá gǎkɛ otoɓoa ú ka engekisa ɓonjánja í. Ɓeekea nɛnu a phɔtɔ ɓó. Ana kantíti kɔnyɛ́nya láté, akeni gǎkɛ ɓáengekisɛ ú. Ka nyɔngɔ índɔ unge ɓeɓande n'obebɔ, ɓoombia na ɓokutú mbenɔ nde Yéso Kiísito asɛnɛkaeka.

⁸ Cɔ, ɓonkondi Yéso, nanga ɗɔ́ɓɔ́kɔ́mɔni ka yɛ. Ɓomɓeeki, nanga kɛ̌kɛnde ɓɔ́kɔ́ɔmɔna. Kaɓondɔ unge ɓotúmi na maseye ángbó phɛɛ, nnde nkpa nnaɔtɔka n'atɔ̌mi ú.

⁹ Ɓona maseye ndɔ ka nyɔngɔ nde, ɓooama ka měma. Nndɔ unge ande cina á ɓeekea nɛnu.

¹⁰ Ɓaɔtu-nyɔngɔ ndea Mokonga ɗáɓákaɓi bîbíbí na ianaga ka nyɔngɔ á ɓoamia ndɔ, ɓáɔɔtɔa nyɔngɔ ka phɔa egabɔ nde ɗóɓotú ɓato á tɔá í.

¹¹ Měma á Kiísito ɗátú suɓi aɓɔ, ɗáɛtɔ̌mi mosá gea, Kiísito atambagaeka na mbusa á tambaga, atɔaeka ɓoombia. Ɓaɔtu-nyɔngɔ ndɔ ɗáɓákaɓi engekisa á mbenɔ na etéte sina nde kema ndɔ bui atɔtɔkɛanaeka.

¹² Mokonga ɗéúbisi gea te, mbino ndɔ ɗákátú ka phɔaɓɔ sasaɓɔ, ɗátú ndiu ka phɔanu. Cɔ, kɛ̌kɛnde, ɓatɔmi Mbino-Ánjá ɗáɓánɔ́tɔ̌mi mbino ndɔ na ɓukpɛkpɛ á Měma á kanga ɓojeɗe, mmbé Mokonga ɗánteki ka toka na koba. Ɓamalaéka ɓɔ sasaɓɔ ɓákondi phɔtɔ úba á mbino ndɔɔ.

Enda á kanga ɓojeɗe

¹³ Kaɓondɔ, ɓɔngisiagani měma anu k'ékuma. Ɛ́ngɛphani, seɓeani ɓonjánja-ékondi nde ɓánophande k'ésa á sɛnɛka á Yéso.

¹⁴ Mɔ́kani Mokonga ɓíndɔ ɓaniki ɓáɔ̌ɓɔ́ka ɓaɓɔkɔti aɓɔ, ɓókóɓeɛmbɛ mɔphɛ nɛnu á kala mbenɔ nde ɗóɓokóoúba nyɔngɔ á Mokonga.

¹⁵ Cɔ, ɓáni ndiu ɓato á Mokonga kángá ɓojeɗe ka tambea anu bui, ɓíndɔ Mokonga, mmbé anɔɔphani, ande nto á kanga á ɓojeɗe.

¹⁶ A ɓíndɔ ɓáɗundu suɓi á Ɓuku á Mokonga: «Ɓáni ɓato á Mokonga kángá ɓojeɗe nga, eme nende nto á kanga á ɓojeɗe.»

¹⁷ Cɔ, akoɓá k'ɛ́mɛmi nɛnu na ɓɔɔmɔphana Mokonga «Abɛ», mmbé aotena nyɔngɔ á nkpa buakɛ kángá oɓayɔ, ka ɓeana na tambea akɛ, tambeani na kɔɓɔɓɔkɔ ka Mokonga ka mbenɔ nde ɓo phɔ́tɔ ka mokonda.

¹⁸ Cɔ, ɓooúba etéte á ophendɔ nde Mokonga ɗáphendi ka phɔa anu ka tokisa anu ka tambea á jǎi-jǎi nde ɓatatanu ɗáɓánoɗeketei. Ɗákági ɓó na kema nde aoújukana ɓea, láté na imɔna.

¹⁹ Ophendɔ a ka phɔa anu a ndiu á kema á esombi akpɛ ande gea, magia á Kiísito. Yɛ, ɗákú ɓea muna-mɔgɔgɔ ɔ́phɛɔ, mmbé ɗákátú na kiɗɔti na ɓojeɗe.

²⁰ Mokonga ɗánsɔmbu mosá á conjá á mokonda, kɛ̌kɛnde amúbisi kanu base, ka mbenɔ á sungiaga á mokonda.

²¹ Ka nyɔngɔ á Kiísito unge ɓomɓeeki Mokonga, mmbé ɗánjujúkisi ka kukuwa sɔsɔɓɛ á ɓasí na áomopha ɓoombia. Ka nyɔngɔ índɔ unge mɓeekeani Mokonga na bisa á nseɓeɔ nɛnu ka yɛ.

²² Ɓá ye nosokosei ka nyɔngɔ á ɓeekea anu ɗoni. Ka nyɔngɔ índɔ unge ɓoókondi ɓadanu ɓaɓêki kángá maibe. Cɔ, kóndanagani sɔsɔɓɛ anu phɛɛ na měma anu bui.

²³ Cɔ, ɓɔɓɔkɔtɛani mɔngɔ á koiɓɛ, nna ka mbó á kokpa nnde aokuwa, a ndiu ka mbó nde nnaokuwa, ande gea, nyɔngɔ á Mokonga nnde aoenda mɛyɔ.

²⁴ Nga, ɗáɓáɗundu suɓi á Ɓuku á Mokonga ɓe: «Ɓakpa ɓɔbu ɓá ɓea ɔphɔ, ɓoombia nɛɓɔ bui a ɓea maya á ɔphɔ. Ɔphɔ áɔɔmɔkaka, maya áotitikana.

²⁵ Nyɔngɔ á Mɔkɔta a gǎkɛ oenda mɛyɔ.» Cɔ, nyɔngɔ nde, ande á Mbino-Ánjá nde ɗáɓánɔphɛí.