1 Timɔtɛ́ɔ 6 - Ɔngana á Kɛ̌kɛ

Tambea á ɓakɔɓɛ ka phɔa ɓakɔta nɛɓɔ

¹ Akeni ɓakɔɓɛ ɓɔbu ɓáɛɓɔ́kɛ ɓakɔta nɛɓɔ ɗoni gea, ɓakpa ɓákabómɛmbɛ ina á Mokonga na ɓɛnjiaga á goisaga nɛsu.

² Ɓakɔɓɛ íɓunde ɓakɔta nɛɓɔ ɓánde ɓaɓêki, ɓákɛ̌ɓɛnjiɛgɛmbɛ ka nyɔngɔ á gea, ɓánde ɓana-amaɓɔ. Akeni ndiu ɓáɛ́bɛɗaneɛgɛ ánjá phɛɛ, ka nyɔngɔ nde ɓakɔta nɛɓɔ ɓánde ɓaɓêki nde Mokonga aekondi. Nyɔngɔ ndɔ unge akeni ɔ́phɛɛ́ na goisaga á ɓakpa.

Goisaga á mbɛa na ɛtɔi á ɗoni

³ Aoɓá nkpa n'agoisigi ɓɔphɛi nɛngbo n'atingani na nyɔngɔ á ɗoni ndea Mɔkɔta nɛsu Yéso Kiísito, na nnde atingani na goisaga nde akeni ka ɓeekea,

⁴ mmbɔ an'ěbeba phɛɛ na nna gǎkɛ koúba kema. Ande nkpa nde ana tambea ájeɗe aopúa na ɓakpa na sani ka phɔa á yɔnga. Nndɔ aobikisa ngíni, sani, mbóma na maca,

⁵ sani nde nna na sungiaga, ɓea ɓabóbó íɓunde ɓáná ye ɔtɔka úba á ɗoni. Ɓakpa ndɔ ɓáokanisia te, ɓeekea á Kiísito, ande aphe á ɛtɔi.

⁶ Eya, ɓeekea á Mokonga ande ɛtɔi ángbó aoɓá nkpa n'ana maseye k'índe aně.

⁷ Cɔ, ɗéɓebiki ka mokonda kángá kema, ɓejande phɔtɔ kángá kema.

⁸ Cɔ, aoɓá na ɓena eea na ngɔ́mbɛ, nndɔ akpeengeani.

⁹ Ɓunde ɓá gǎkɛ okáɓa ɛtɔi, ɓáogua katombaga na tá ka mɛ̌kɔ, ɓáokáɓa mɔphɛ ájeɗe ásii ka kobóbó na ngisa aɓɔ k'otúkɔtúkɔ na ɓúngaga.

¹⁰ Nga, ekondi á imɔna ande cina á ɓojeɗe bui. Ka nyɔngɔ índɔ unge, ɓakpa ɓuangbo ɓáɓúngisi ɓeekea nɛɓɔ, ɓáǒtambisaga sasaɓɔ ka měma phɛɛ.

Pɔ́lɔ aɔmphɛa Timɔtɛ́ɔ

¹¹ Oɓɛ gǎkɛ, nkpa ndea Mokonga, ɓánga kema ndɔ bui. Káɓa ndiu koɗoni, tambea ánjá mosá á Mokonga, ɓeekea á Mokonga, ekondi, phiphia na ɓɔphɔngɔ.

¹² Mǎna emani á ɓeekea ánjá, ódungia ka enda á mɛyɔ. Nga, ka nyɔngɔ índɔ unge Mokonga ɗákɔɔphani mbenɔ nde ɗóɓeeki. Bisa ɓeekea nɛkɔ base mosá á ɓaɗigimisi ɓásii.

¹³ Nekososi mosá á Mokonga, mmbé ande cina á enda bui, na mosá á Kiísito Yéso, mmbé ɗáengekisi koɗoni nɛkɛ mosá á Pɔntíɔ Pilátɔ gea,

¹⁴ amba ɛɔphi nde ɗɔ́ɔ́ki, ɓá nto á koɗoni, kángá kisɛki na ka ɓî Mɔkɔta nɛsu Yéso Kiísito asɛnɛkaeka.

¹⁵ Sɛnɛka ndɔ, aɓande ka mbenɔ nde Mokonga yɛ sasakɛ ɗáangi. Yɛ aámbé ande Mokonga mmbé akeni n'obebɔ, mmbé sasakɛ ande Moamɛ á ɓaamɛ na Mɔkɔta á ɓakɔta.

¹⁶ Yɛ sasakɛ tɔ aámbé kákuwɛeka. Aiki k'owanga nde nkpa nnaɔtɔka n'ambîmisi. Nna na nkpa nde amɔnimbɛmɔnɔ na nna na nkpa nde aɔtɔka n'amɔni. Cɔ, Mokonga áɓɛ na ɓoombia na ɓukpɛkpɛ ka saga na saga, áɓɛ ɓó.

¹⁷ Óngoɗea ɓatɔi á ka mokonda á kɛ̌kɛnde gea, ɓákěbebɛmbɛ, phɔtɔ ɓákáseɓeɛmbɛ ɛtɔi nde nna koiphia ka ujukana. Ɓánseɓeɛ ndiu Mokonga mmbé aosópha kema bubui ka gea te, ɓéɓɛ na maseye ka phɔa í.

¹⁸ Óngoɗea phɔtɔ ɓágeɛ ɓonjánja, ɓábɛ ɓatɔi ka tɔtɔkisa á kema ánjánja, ɓágabɛ na měma ánjá, na ɓábɛɗaneɛgɛ nkumba nɛɓɔ kimoci na ɓakpa ɓuangbo.

¹⁹ Kaɓondɔ unge, ɓábisande ka ɓɔ nkumba ánjá nnde aoiphia k'ésa nde abikaeka ka gea, ɓáɓɛ na enda á ɗoni.

Pɔ́lɔ aɔmɔkɔwa Timɔtɛ́ɔ

²⁰ Cɔ, Timɔtɛ́ɔ, amba ánjá nnde Mokonga ɗákophi. Ɓánga yɔngaga á jǎi-jǎi, nnde atinganigi na ɓɔphɛi á ɗoni. Yɔngaga ndɔ aunge ɓaɓiɓia nɛsu ɓáɔɔphana «úbapha», n'ande mbɛa.

²¹ Nga, ɓakpa ɓuangbo ka nyɔngɔ á ɓɔnɛaga úbapha á mbɛa ndɔ, aunge ɓáɗu moangɔ á ɓeekea. Ambe ɓonjánja-ékondi ndea Mokonga áɓɛ kimoci n'oɓɛ.