1 Timɔtɛ́ɔ 5 - Ɔngana á Kɛ̌kɛ

Etéte á yɔngaga ánjá na ɓakpa

¹ Kómphekeɛgɛmbɛ ngbɛga, ntɔ̌mia ndiu nyɔngɔ ɓea abakɔ. Ɔ́tɔmia phɔtɔ ɓaganda nyɔngɔ ɓea ɓana-amakɔ,

² ɓagbɛga á ɓake ɓea ɓamakɔ, na ɓaseka ɓea ɓ'áwákɔ kángá ɓá na kanisia ájeɗe ka phɔa ɓɔ.

Moangɔ á enga ɓake á kekusa

³ Óengani ɓake á kekusa íɓundɔ ɓáná na ɓakpa ɗoni k'ékombo ka enga aɓɔ.

⁴ A gǎkɛ oɓá nke á kekusa n'ana ɓaniki na ɓasuko, akeni ɓato á k'ékombo nɛkɛ ɓágoɛgɛ tɔtɔkisa á ɓeekea ndea Mokonga ka nyɛ́nyɛa ekuma nɛɓɔ ka phɔa ɓato á k'ékombo nɛɓɔ sasaɓɔ. Ɓáejisiɛ phɔtɔ ɓaɓɔkɔti aɓɔ na ɓatataɓɔ ɓonjánja nde ɗáɓěgi ně nga, nndɔ unge amɓɔngɛi Mokonga.

⁵ Nke á kekusa ímbɔ nna na nkpa ɗoni k'ékombo ka enga akɛ, anseɓei mɔɔ tɔ nɛkɛ Mokonga. Yɛ, aɔmmɛma Mokonga keiphe n'esa kángá ɗeketa na bisa á mɔphɛ akɛ ka Mokonga.

⁶ Nke á kekusa ímbe a gǎkɛ oenda ka tambea ájeɗe, nanga a phɔ́tɔ koenda, a yé ku.

⁷ Nndɔ unge óngoɗea goto ɓake á kekusa ka gea, nkpa káeyeyɛmbɛ mɔnɔ.

⁸ Aoɓá nkpa na káǒamba ɓakpa nɛkɛ na amba phɛɛ ɓato á k'ékombo nɛkɛ, mmbɔ ayé ɓeekea nɛkɛ. Kaɓondɔ, yɛ ande nkpa ájeɗe phɛɛ kɔnyɛ́nya mmbé káɓeeki.

⁹ Ka mɔɔmba á ɓake á kekusa, ɗundua tɔ ina á mmbé ajúsi ɓasaga nkama ngianjaga (60). Akeni phɔtɔ mmbé ɗáɔmani tɔ na mǒko moci.

¹⁰ Ambe ɓakpa ɓáɗigimisɛ gea ékuma nɛkɛ ɗátú ánjá, mmbé ɗáɛmɔtisi ɓ'anakɛ ánjá, ɗáǒsesea ɓakeni, ɗáosokosa ecinji á ɓaɓêki, ɗáǒenga ɓunde ɗáɓáotambaga na gea ekuma ánjánja bui ka enda akɛ bui.

¹¹ Koɗunduɛmbɛ gǎkɛ ina á ɓake á kekusa íɓunde ɓá phɔ́tɔ ɓamponjo nga, mbenɔ nde mɔphɛ aɓɔ aǒkatanisa na Kiísito ɓâ goto okonda ɔmana,

¹² na ɗoa mɔkɔ nɛɓɔ á mosá na Kiísito, ɓáoɓá na ɓojeɗe ka měma.

¹³ Goto, ɓáná na ka kema á gea í, ɓáoga na ɓáɔkɔɓa k'éndu ɗanga-ɗanga, ɓáɔɗɛgia, ɓáongiaga ka nyɔngɔ bui, ɓáɔyɔngaga nyɔngɔ nde ɓákákeni yɔnga í.

¹⁴ Cɔ, nekondi gǎkɛ ɓake á kekusa íɓunde ɓá phɔ́tɔ ɓamponjo, ɓáɔmanɛ, ɓáɛɓɔkɔtɛ ɓaniki, ɓáambɛ endu nɛɓɔ ka gea, ɓaɓiɓia asu ɓákáɓɛmbɛ n'aphe moci nde ɓásóbómande kau.

¹⁵ Negi ɓó nga, ana ka ɓake á kekusa ɓuangbo ɓunde ɓáɓúngigi ka ɓeá á Sɛtáni.

¹⁶ Aoɓá nke mɓêki na a gǎkɛ na ɓake á kekusa k'ékombo nɛkɛ, ambe éambɛ ɓɔ ka gea, kanisa kakumbɛmbɛ ɓoɗoko aɓɔ. Aogea ɓó, kanisa akumbande ye tɔ ɓoɗoko á ɓake á kekusa íɓunde ɓáká ɗoni na ɓakpa k'ékombo ka amba aɓɔ.

Enda á ɓagbɛga á kanisa

¹⁷ Ambe ɓéɗokomisɛ ɓagbɛga íɓunde ɓáoamba kanisa ánjá mɔngɔ iɓɛ, a goto phɛɛ ka ɓunde ɓáɔphɛa na goisaga Nyɔngɔ á Mokonga.

¹⁸ Cɔ, Ɓuku á Mokonga ayɔngi ɓe: «Mbenɔ nde ngɔmbɛ aɔbɛɗanaga ka ɗungua, konimisiɛmbɛ ka gea káeɛmbɛ ka mbó ndɔɔ.» Goto: «Mbɛɗanigi akeni n'ophendɔ nɛkɛ.»

¹⁹ Kóɓeekeɛmbɛ kitɔngi á ngbɛga akoɓa ɓakpa ɓaɓɛ kaɓɛ ɓasaɔ na ɓákáɗigimisi.

²⁰ Ɓunde ɓáogea ɓojeɗe, óphekeaga mosá á ɓakpa ka gea, ɓunɛngbo ɓáɓɛ phɔtɔ na kɔɓɔɓɔkɔ.

²¹ Nekososi base mosá á Mokonga na mosá á Kiísito Yéso, na ɓamalaéka á kanga ɓojeɗe gea, amba ɓɔphɛi ndee: Mbenɔ nde ɔɔbɛɗanaga, bɛɗanaga kángá oɓayɔ, phɔtɔ kángá egami ka nkpa.

²² Nkpa aokonda ɓá mbɛɗanigi ka kanisa, kokamisɛgɛmbɛ bisa á njaga akɔ gǔ akɛ, kǒgamɛmbɛ ɓakpa ka ɓojeɗe nɛɓɔ. Oɓɛ sasakɔ, óamba kángá á ɓojeɗe.

²³ Ka nyɔngɔ á kukuwa á ka sɔphɔ akɔ na ɛlaga á nyama akɔ, kónoɛmbɛ tɔ iɓo, noa phɔtɔ divai ábɔa.

²⁴ Ɓojeɗe ndea ɓakpa ɓuangbo aoúbikana base mosá á tena á nyɔngɔ nɛɓɔ. Cɔ, ɓakpa ɓuangbo gǎkɛ, ɓojeɗe ínɛɓɔ aoúbikana mbusa.

²⁵ A phɔtɔ ɓó k'ékuma ánjá, aoúbikana base. Nanga nɛngbo nna ɔɔnɛkana, aúbikanande tɔ.