1 Timɔtɛ́ɔ 4 - Ɔngana á Kɛ̌kɛ

Óengani na ɓɔphɛi á mbɛa

¹ Cɔ, Měma á Mokonga ayɔngi base gea, ka mbenɔ á sungiaga, ɓakpa ɓunɛngbo ɓáɗeketande ɓeekea, ɓáǒɓea ɓaketi na ɓɔphɛi nɛɓɔ á mbɛa.

² Ɓáedemisande na ɓato á maibe, na ɓato á mbɛa íɓunde měma aɓɔ aújúkani ɓea kema nde ɓátoɓu na ngɔa nde atóki suɓi á nsa.

³ Ɓakpa ndɔ ɓáoimisia eyamani, ɓá phɔtɔ oimisia eaga eea nɛngbo nnde Mokonga ɗáconji gǎkɛ ú ka gea, ɓaɓêki ɓunde ɓáoúba ɗoni ɓáeɛ ú na beba á Mokonga k'ɛ́mɛmi.

⁴ Cɔ, kema bui nde Mokonga ɗáconji aánjá, nna na kau nde akeni tâ í, ambe ɓénsegɛ gǎkɛ Mokonga mbenɔ nde ɓeoea ú

⁵ nga, nyɔngɔ á Mokonga n'ɛmɛmi áɔɓɔngisia eea bui mosá á Mokonga.

Mbɛɗanigi anjánjá ndea Kiísito Yéso

⁶ Cɔ, kangoɗea á ɓadakɔ nyɔngɔ ndɔ base, oɓande mbɛɗanigi anjánjá ndea Kiísito Yéso, mmbé enda akɛ aoɓea nyɔngɔ á ɓeekea na ɓɔphɛi ánjá nde ɗótétemisi.

⁷ Kóɓeekeɛmbɛ gǎkɛ egani á jǎi-jǎi, na nnde atingani na moangɔ á ɓeekea. Ókakamisa ka tambea ánjá mosá á Mokonga.

⁸ Eya, ékakamisa ka kema á ka nyama, a gǎkɛ na kantíti ka kema ábɔa. Tambea ánjá mosá á Mokonga, aunge a ndiu na kantíti ka kema bui nga, k'índɔ unge ɓena mɔkɔ á enda ka matú nde na ka matú nde abikande.

⁹ Nndɔ ande nyɔngɔ á ɗoni nnde akeni ka ɓakpa ɓɔbu ɓeekea í.

¹⁰ Cɔ, kaɓɛ na ɓeotambaga na ɓeomana, ande ka gea, ɓebisi nseɓeɔ nɛsu ka Mokonga mmbé ana enda, mmbé ande Namisi á ɓakpa ɓɔbu na Namisi phɛɛ á ɓunde ɓáɓeeki.

¹¹ Cɔ, óngoɗea na goisaga á ɓakpa nyɔngɔ ndɔ bui.

¹² Ambe nkpa kakɔɓɛnjiɛgɛmbɛ ka nyɔngɔ nde onde moganda. Óɓɛ ndiu mphangiɔ ka ɓaɓêki, ka ɛyɔngi akɔ, tambea akɔ, k'ékondi, ɓeekea, na ka enda akɔ ánjá.

¹³ Suia tanga á Ɓuku á Mokonga mosá á ɓakpa, gbagisaga aɓɔ ka měma na goisaga aɓɔ, na ka ɓî ne kiɗiande.

¹⁴ Kɔɓɛnjiɛgɛmbɛ bɛɗaneaga á egabɔ á Měma á Mokonga nnde asuɓi akɔ, nnde ɗɔ́tɔi ɓî ɓaɔtu-nyɔngɔ ndea Mokonga ɗáɓáyɔngi ka phɔakɔ, na ɓî ɓagbɛga ɗáɓákobisíí njaga.

¹⁵ Cɔ, bisa měma akɔ k'índɔ bui netóki ka yɔnga í, óyamea buakɔ k'ékuma nɛkɔ mpɔ, ɓakpa ɓáɔnande gea, ootútuisa ekuma.

¹⁶ Cɔ, oɓɛ óenga sasakɔ, ka tambea akɔ na ɓɔphɛi nɛkɔ, ótétemanɛ kau. Nga, oogea ɓó, ǒamisande sasakɔ na amisa á ɓundɔ ɓáɔkɔɔ́ka.