1 Timɔtɛ́ɔ 3 - Ɔngana á Kɛ̌kɛ

Tambea á ɓaámbi-kanisa

¹ Nyɔngɔ á ɗoni aungee: Aoɓá nkpa n'aokonda ekuma á ɓá nambi-kanisa, akondi ekuma ánjá.

² Cɔ, akeni nambi-kanisa áɓɛ kángá á nyɔngɔ ájeɗe. Áɓɛ tɔndɔ na nke moci, áambɛ tambea akɛ ánjá sasakɛ, áɓɛ múbaphi, áɓɛ na měma ánjá, áɓɛ nsesi-ɓakɛni na ngoisigi anjánjá.

³ Kaɓɛmbɛ nto á ɛbɛɗi á makana na nkae. Áɓɛ ndiu nto-aphɔngɔ na ɓujɛjɛ. Kaɓɛmbɛ nkondi imɔna phɛɛ.

⁴ Áangɛ endu nɛkɛ ánjá, ɓaniki nɛkɛ ɓáɔ́kɛ ɓɔphɛi nɛkɛ ɗoni.

⁵ Cɔ, aoɓá nkpa na káoúba angá ekombo nɛkɛ ánjá, aangande kanisa ndea Mokonga ɓo?

⁶ Kaɓɛmbɛ mokiísito á kɛ̌kɛ, ámbé aebebande, mbusa í, Mokonga áotena nyɔngɔ nɛkɛ akpɛ ɓíndɔ á nketi.

⁷ Goto, ɓunde ɓáná ɓakiísito ɓádigimisɛ nyɔngɔ nɛkɛ ánjá ka gea, ɓákámɓɛnjiɛgɛmbɛ na tá ka mɛ̌kɔ ndea nketi.

Tambea á ɓabɛɗanigi ndea ka kanisa

⁸ Ɓabɛɗanigi ndea ka kanisa ɓáɓɛ phɔtɔ ɓakpa nde ɓákeni na ɔ́ka aɓɔ, ɓato á ɗoni, ɓákáɓɛmbɛ ɓanu-makana phɛɛ, ɓákakáɓɛmbɛ imɔna ka maibe-maibe.

⁹ Akeni ɓáambɛ ɓeekea á ɗoni na měma ánjá.

¹⁰ Mosá á bisa á ɓabɛɗanigi ndea ka kanisa, akeni phɔ́ ɔnjia tambea aɓɔ bîbíbí. A ye oɓá na ɓáká na nyɔngɔ á sɛka aɓɔ, mpɔ, ɓáoɓá ɓabɛɗanigi ka kanisa.

¹¹ A phɔtɔ ɓó ka ɓake, ɓáɓɛ ɓakpa nde ɓákeni na ɔ́ka aɓɔ, ɓákáɓɛmbɛ n'ɛsɔ ájeɗe-jeɗe, ɓáambɛ tambea aɓɔ ánjá sasaɓɔ na ɓáɓɛ ɓato á ɗoni ka kema bui.

¹² Ɓabɛɗanigi ndea ka kanisa ɓáɓɛ tɔ na ɓake moci-moci. Ɓáɓɛoanga ekombo nɛɓɔ bui ánjá, ɓaniki na ɓakpa ɓɔbu ɓunde ɓá k'éndu nɛɓɔ.

¹³ Kaɓondɔ, ɓabɛɗanigi ɓánjá, ɓáɓánde na ɓophombia, ɓáɓánde phɔtɔ na nseɓeɔ akpɛ ka ɓeekea nɛɓɔ k'ína á Kiísito Yéso.

Kema ángbó á ɓɔsɔmɛa

¹⁴ Nekoɗundui ɓaoɓa nde, nanga néseɓea bika mɔtɛ-akɔ kɛ̌kɛnde.

¹⁵ Cɔ, ne gǎkɛ koiphia kángá kiɗia, ɓaoɓa nde aoengande ka tambea akɔ sɔsɔɓɛ ékombo ndea Mokonga. Ekombo ndɔ ande kanisa ndea Mokonga mmbé aoenda, ande ngeɔ na cina á ɗoni.

¹⁶ Ɓɔphɛi á ɗoni ndɔ ande kema á ɓɔsɔmɛa, nnde Mokonga aúbisi, n'ande ángbó phɛɛ, nnde nkpa nnaɔtɔka n'ayé! Kiísito ɗásɛnɛki n'ande nkpa, Měma á Mokonga ɗánɗigimisi gea ande nto á ɗoni. Ɓamalaéka ɗáɓámɔni. Ɓakpa ɗáɓátɔ̌migi nyɔngɔ nɛkɛ k'ékuna bui. Ɓámɓeeki k'ɔ́ma bui. Mokonga ɗántáisi ka ɓoombia na koba.