1 Timɔtɛ́ɔ 2 - Ɔngana á Kɛ̌kɛ

Ambe ɓakiísito ɓámɛmɛ Mokonga ka phɔa ɓakpa ɓɔbu

¹ Mosá á kema bubui, nɛnɔ́phɛí ɓe: mɛmani Mokonga ka phɔa á ɓakpa ɓɔbu, ɓónɗengemisɛgɛ, na ɓónsegɛ ka phɔaɓɔ.

² Mɛmani phɔtɔ ka ɓaamɛ na ɓakɔta ɓɔbu á ka nji ka gea te, ɓéikɛ ka ɓujɛjɛ, ɓéɓɛ tɔ ɓato á ɓonjánja na ɓánga á Mokonga.

³ Nndɔ unge aánjá na amɓɔngɛi Mokonga, Namisi nɛsu.

⁴ Nga, yɛ akondi ɓakpa ɓɔbu ɓáamɛ ka měma, ɓáúbɛ ɗoni.

⁵ Mokonga a tɔ mo. Mɔɔnganisi á ɓakpa na Mokonga a tɔ mo, n'ande nkpa, Kiísito Yéso,

⁶ mmbé yɛ sasakɛ ɗábisi enda akɛ ka phɛ́a, ka nyɔngɔ á amisa á ɓakpa ɓɔbu. Nndɔ unge aɗigimisi ka mbenɔ nde Mokonga ɗábisi gea, akondi amisa á ɓakpa ɓɔbu.

⁷ Ka nyɔngɔ índɔ unge Mokonga ɗámobisi ntɔmigi-mbino na nteki, ka goisaga ɓunde ɓáná Ɓayúda nyɔngɔ á ɓeekea na ɗoni. Kɛ́ɔyɔnga mbɛa, ne tɔ ɔyɔnga ɗoni.

Tambea nde akeni ka ɓǒko na ɓake ka kanisa

⁸ Cɔ, nekondi phɔ́ gea, ɓǒko ɓámɛmɛ k'ɔ́ma bui na ɓámɛsi njaga. Akeni ɓágeɛ ɓó na měma ánjá kángá á ɓɛí na sani.

⁹ Nekondi goto gea, ɓake ɓáɔ́lɛ ngɔ́mbɛ ɓíndɔ akeni. Ɓákaɔ́lanɛgɛmbɛ na ɓemboko, ɓáokɛ́ sekamɔ̌ ɓíndɔ akeni, ɓákáɛtɔndɛmbɛ na kema nde ɓáɓɔngisigi na láté na nnde a n'esombi akpɛ, ɓákaɔ́lɛ phɔtɔ ngɔ́mbɛ nde ana esombi akpɛ.

¹⁰ Ɓáɛtɔndɛ ndiu na tambea ánjá nnde akeni ka ɓake íɓunde ɓáokáɓa beba á Mokonga.

¹¹ Akeni ɓake ɓáɔ́kɛ ɓɔphɛi na ɓákɔɓi, na ɓátɔtɔkisɛ ɓɔphɛi kau.

¹² Kékondi gea, ɓake ɓáɛphɛɛ́ ɓǒko, ɓákáɓɛ mɔnɔ na kɔkɔta gǔ aɓɔ. Ɓádakanɛ ndiu, phio!

¹³ Nga, Mokonga ɗánconji Adámu mosá, mpɔ Awa.

¹⁴ Nna Adámu aámbé ɗáedemisi, nke ndiu aámbé ɗáedemisi, mbusa í, áotingiaga ɛɔphi ndea Mokonga.

¹⁵ Cɔ, ɓake ɓáamande ka měma ka nyɔngɔ á ɛɓɔkɔti, aoɓá na ɓátútuisi ɓeekea, ekondani, na měma á ɓonjánja.