1 Timɔtɛ́ɔ 1 - Ɔngana á Kɛ̌kɛ

Nsesɔ

^1-2 Ka Timɔtɛ́ɔ miki nɛmɔ á ɗoni suɓi á ɓeekea samba. Eme Pɔ́lɔ nteki nde ɓa Yéso Kiísito, ka kɔkɔta ndea Mokonga Namisi nɛsu, n'índe á Yéso Kiísito mmbé ɓenseɓei, eme aámbé nekoɗundui ɓaoɓa ndee. Ambe Abɛ Mokonga na Mɔkɔta nɛsu Yéso Kiísito ákophɛ ɓonjánja-ékondi, áokuiɛ ngomi na ákophɛ ɓujɛjɛ.

Ɓókoɓeekeɛmbɛ ɓɔphɛi á mbɛa

³ Ɓî ɗétúoga na Makɛdɔnía, ɗékongonɗi gea, óikɛ ka Ɛphɛ́sɔ. Kó, óimisiɛ ɓakpa nde ɓáogoisaga ɓɔphɛi á mbɛa.

⁴ Óngoɗeɛ phɔtɔ gea, ɓákábisɛmbɛ kanisia aɓɔ ka nyɔngɔ á egani á jǎi-jǎi, na nnde á cɔca cina á ɓatataɓɔ. Nndɔ aikíí tɔ kampápa á jǎi. Nnaoenga ka tútuisa moangɔ á ɓoamia nnde atóki ka Mokonga, nnde aúbikani ka nyɔngɔ á ɓeekea.

⁵ Cɔ, cina á ɓɔphɛi nɛmɔ wani, ande bikisa ékondi nde aotóka suɓi á měma ánjá, úbapha ánjá na ɓeekea nde nna na maibe.

⁶ Ɓakpa ɓunɛngbo ɗáɓáɗú gǎkɛ aphe ndɔɔ, ɓáoɓúngaga ka ɓeá nyɔngɔ á jǎi-jǎi.

⁷ Ɓáokonda gea, ɓáɓɛ ɓea ɓagoisigi-ɛɔphi ndea Mósa. Ɓáná gǎkɛ oúba nnde ɓáɔyɔnga, kaɓɛ nnde ɓáogoisaga na ɓukpɛkpɛ.

⁸ Ɓeoúba gea, ɛɔphi ndea Mósa aánjá, aoɓá na ɓɛbɛɗi ɓíndɔ akeni.

⁹ Ɓê phɔtɔ oúba gea, ɛɔphi ndɔ nna ka ɓato á ɗoni, a ndiu tɔ ka ɓakpa nde ɓáogea ɓojeɗe, ɓunde ɓáoɓúna ɛɔphi, ɓunde ɓákáomɓánga Mokonga, ɓato á ɓojeɗe na ɓunde ɓáɔjɔɔkisa kema ánjá nɛkɛ. Ɛɔphi ndɔ a phɔtɔ ka ɓunde ɓáǒma ɓ'abaɓɔ, ɓ'amaɓɔ na ɓato á kaiso,

¹⁰ ɓato á iɛɓɛ, ɓǒko íɓunde ɓáoɗaga na ɓadaɓɔ ɓǒko, ɓasombisigi ɓakɔɓɛ, ɓato á mbɛa, na ɓakpa nde ɓáɔɔpha ka mbɛa, na ɓunde ɓákáoɓeekea ɓɔphɛi á kanga ɓojeɗe.

¹¹ Ɓɔphɛi ndɔ a suɓi á Mbino-Ánjá nnde ɗámopi nɛ́tɔ̌miɛgɛ ú, n'atóki ka Mokonga, mɛna-ɓoombia na ɓonjánja.

Pɔ́lɔ ansegi Mokonga

¹² Nembebi gǎkɛ Yéso Kiísito Mɔkɔta nɛsu, mmbé ɗámopi ɓukpɛkpɛ á bɛɗanaga ekuma nɛkɛ. Aúbi gea, nekeni bɛɗaneaga akɛ, ka nyɔngɔ índɔ unge, amobisi k'ékuma nɛkɛ.

¹³ Nanga mosá ɗétú ombóma Mokonga, néontambisaga, néoɓá nto á kampápa mosá akɛ, kíndɔ bui â gǎkɛ tɔ omokuia ngomi nga, ɗébóbóki ka kanga á ɓeekea akɛ.

¹⁴ Eya, Mɔkɔta nɛsu aɓikisi phɛɛ ɓonjánja-ékondi nɛkɛ k'éme. Ɗámopi ɓeekea na ekondi nde atóki ka ɔngana ani na Kiísito.

¹⁵ Nyɔngɔ á ɗoni nde akeni na ɓeekea í aungee: Ambe ɓakpa ɓɔbu ɓáɓeekeɛ phɔtɔ gea, Kiísito Yéso ɗábiki ka mokonda k'aphe á amisa á ɓato á ɓojeɗe. Eme nende nto á ɓojeɗe á k'ama mosá-mosá ka ɔlɔ aɓɔ.

¹⁶ Kaɓondɔ unge, Mokonga ɗámokui gǎkɛ ngomi. Cɔ, Kiísito Yéso ɗámophiphíí phɛɛ eme nto á ɓojeɗe á k'ama mosá-mosá ka ɔlɔ á ɓato á ɓojeɗe. Nndɔ ande mphangiɔ ka ɓunde ɓámɓeekeande ka gea, ɓáendɛ mɛyɔ kimoci na Mokonga.

¹⁷ Cɔ, ka Moamɛ á mɛyɔ, mmbé nnaokuwa, mmbé ɓákáɔmɔna, Mokonga ímbé nna na dakɛ ɓea yɛ, ambe áɓɛ n'obebɔ na ɓoombia ka saga na saga! Áɓɛ ɓó.

¹⁸ Cɔ, Timɔtɛ́ɔ, mukuamɔ ɓa ka měma, nekobisíí ɓɔphɛi ndɔ ɓíndɔ ɓaɔtu-nyɔngɔ ndea Mokonga ɗáɓáɔtu mosá ka phɔakɔ. Ambe nyɔngɔ nde ɗáɓáɔtu unge áɓɛ ɓukpɛkpɛ nɛkɔ suɓi á emani ánjá nde o kau,

¹⁹ ka amba ɓeekea na úbapha ánjá. Ɓakpa ɓunɛngbo ɓáyé kanisia á ka měma aɓɔ, ɓâ gǎkɛ oɓúngisa ɓeekea nɛɓɔ.

²⁰ Imɛnɛ́ɔ na Alɛkisándɛɛ ɓá sɔsɔɓɛ aɓɔ. Kaɓondɔ, ɗébisi ɓakpa ndɔ ka njaga á Sɛtáni ka gea, ɓákámbómɛmbɛ ye Mokonga.