1 Ɓatɛsalɔníka 5 - Ɔngana á Kɛ̌kɛ

¹ Cɔ, ɓaya, kátókeni gea te, ɓénoɗunduiɛ nyɔngɔ á engekisa á esa na matú á ja á Mɔkɔta.

² Nga, ɓo ye oúba gea, esa ndɔ abikaeka ɓea nkukuɓa n'aoɓúna endu kǐpha, mɛna-endu na káúbi mosá.

³ Mbenɔ á ja akɛ, ɓáyɔngande te: «Ɓena ɓujɛjɛ, ɓɛphɔngi phio!» Motúkɔtúkɔ â gǎkɛ ǒdonda mɔngɔ moci. Kaɓɛ́ku na mmbé ateande. Esa á ja á Mɔkɔta aɓande ɓea ɓoaé n'andondi ama-kaeme.

⁴ Ɓaya, ɓenu gǎkɛ, ɓókó ɓea ɓakpa nde ɓá ka keiphe, ɓea ɓakpa nde esa á ja á Mɔkɔta ědondande ɓea nkukuɓa.

⁵ Ɓo ndiu ɓato á esa, ɓato á sɔmani. Ɓéké ɓato á kǐpha na ɓato á kaiphiɔ.

⁶ Kaɓondɔ, ɓókoyengiɛmbɛ. Koɗani ndiu iso, ɓóɛngɛphɛ.

⁷ Nga, kǐpha aunge ɓakpa ɓáoɗa, ɓunɛngbo makana áɔ̌bɛɗa.

⁸ Ɓesu gǎkɛ, ɓende ɓato á sɔmani. Kaɓondɔ, ɓékéyengiɛmbɛ. Ande gea te, ɓeekea n'ekondani nɛsu ákengeanɛ na ngɔ́mbɛ á k'égogo ndea nto-émani, nnde ɓáɓɔngisigi na ngɔa. Nseɓeɔ nɛsu á ɓoamia á ka měma, áɓɛ phɔtɔ ɓea kúku á ngɔa nɛkɛ.

⁹ Nga, Mokonga ɗákásɔɔphani gea, esúia nɛkɛ ásóguiɛ. Ɗásɔɔphani ndiu gea, ɓéɓɛ na ɓoamia á ka měma, ka nyɔngɔ ékuma ndea Mɔkɔta nɛsu Yéso Kiísito.

¹⁰ Nga yɛ, ɗásókui ka gea te, ɓéikɛ kimoci na yɛ, kaɓɛ na ɓesí, kaɓɛ na ɓe phɔ́tɔ ka mokonda k'ésa á ja akɛ.

¹¹ Cɔ, phiphisanani měma, gbagisanagani, ɓíndɔ ɓo ye tɔ ogea kɛ̌kɛnde.

Ɓɔphɛi ɗanga-ɗanga á ka sungiaga á ɓaoɓa

¹² Ɓaya, ɓɛnɔmɛmi, ɔ́ɓɔ́kani ɓakpa nde ɓáɔmbɛɗaneaga Mokonga akpɛ ka ɔlɔ anu. Nga, Mokonga ěbisi gǔ anu ka phɛá anu.

¹³ Óɗokomisani, ókondagani ka nyɔngɔ ékuma nɛɓɔ k'ína á Mɔkɔta. Ikani ka ɓujɛjɛ sɔsɔɓɛ anu.

¹⁴ Ɓaya, ɓenóɗengemisigi, ókeagani ɓakpa nde ɓáná ɔbɛɗa ka kema, ógbagisagani ɓato á kɔɓɔɓɔkɔ, óengani ɓakusi. Óphiphiani ɓakpa ɓɔbu.

¹⁵ Óengani phɛɛ gea, nkpa kansikisiɛ mɔnɔ dakɛ ɓojeɗe. Ɓógeanɛ ndiu ɓonjánja. Geani phɔtɔ ɓó ka ɓakpa ɓɔbu.

¹⁶ Ɓáni na maseye esa bui,

¹⁷ mɛmani Mokonga kángá ɗeketa,

¹⁸ nségani ka nyɔngɔ nɛnu bui. Nga, nyɔngɔ ndɔ ande mɔphɛ á Mokonga ka ɓenu ɓunde ɓɔɔngani na Yéso Kiísito.

¹⁹ Ɓókóimisiɛ mɔnɔ ekuma ndea Měma á kanga ɓojeɗe.

²⁰ Ɓókótondiɛ mɔnɔ ɓɔphɛi ndea ɓaɔtu-nyɔngɔ ndea Mokonga.

²¹ Ɛnjiani phɔ́ ɓɔphɛi bui mosá, mpɔ, ɓóoamba nnde aánjá.

²² Téani ɓojeɗe bui.

²³ Mokonga, Mɛna-ɓujɛjɛ, ánophɛ měma ánjá phɛɛ, áambɛ enda anu bui, ka gea, měma anu, úbapha anu na nyama anu, áikɛ kángá á ɓojeɗe na ka ɓî Mɔkɔta nɛsu Yéso Kiísito asɛnɛkaeka.

²⁴ Mokonga, mmbé anɔɔphani, atɔtɔkisande nyɔngɔ ndɔ bui, ka nyɔngɔ nde, nnaotinganisa mɔkɔ nɛkɛ.

²⁵ Ɓaya, mɛmani Mokonga ka phɔasu.

²⁶ Kotoanagani k'ína á Mɔkɔta.

Mɔkɔ

²⁷ Cɔ, nɛnɔɔkusigi k'ína á Mɔkɔta, tangani ɓaoɓa nde, mosá á ɓaɓêki ɓɔbu.

²⁸ Ɓonjánja-ékondi ndea Mɔkɔta nɛsu Yéso Kiísito, áɓɛ na ɓenu.