1 Ɓatɛsalɔníka 4 - Ɔngana á Kɛ̌kɛ

Tambea nde amɓɔngɛi Mokonga

¹ Cɔ, ɓaya, ka sungiaga, ɓɛnɔphɛí ye nyɔngɔ á tambea nde aɔmɓɔngɛa Mokonga. Ɗoni, ɓotambi tɔndɔ ɓó. Kɛ̌kɛnde gǎkɛ, ɓɛnɔmɛmi na ɗengemisaga anu k'ína á Mɔkɔta Yéso gea, ɓótetemisɛ phɔtɔ tambea ndɔ ánjá phɛɛ.

² Cɔ, ɓoúbi ye ɓɔphɛi nde ɗéɓenóngoɗi k'ína á Mɔkɔta Yéso.

³ Nga, Mokonga akondi gea, ɓóɓɛ ɓakpa ɓ'ánjá phɛɛ, ɓóɓangɛ iɛɓɛ,

⁴ ɓóikɛ ndiu na ɓake ɓ'anu ka ɓonjánja ɓíndɔ akeni,

⁵ kángá á mɔphɛ ájeɗe ɓotea anu ɓea ɓakpa nde ɓánáomúba Mokonga.

⁶ Kaɓondɔ, nkpa kangeɛ mɔnɔ dakɛ mokiísito ájeɗe ka nyɔngɔ ndɔ nga, Mɔkɔta atenande nyɔngɔ ndea ɓakpa ndɔ akpɛ. A tɔ ɓíndɔ ɗéɓenóngoɗi na phɛá anu kala.

⁷ Nga, Mokonga ɗákásɔɔphani ka nyɔngɔ á iɛɓɛ, asɔɔphani ndiu gea, ɓéɓɛ ɓakpa nɛkɛ ɓ'ánjá phɛɛ.

⁸ Cɔ, nkpa nde ayé ɓɔphɛi ndɔ, kán'yé nkpa nde amphɛí, an'yé ndiu Mokonga, mmbé asóphi Měma nɛkɛ.

⁹ Cɔ, ka nyɔngɔ ékondani, ké na nyɔngɔ á ɗunduia anu. Nga, Mokonga sasakɛ, ɗánóphangí aphe ndɔ kala.

¹⁰ Eya, ɓǒkondi ɓato á Mokonga ɓɔbu, ɓunde ɓá ka ntanga-nji á ka Makɛdɔnía bui. Ɓaya, ɓɛnɔphɛí gǎkɛ gea, ɓósuiɛ phɔtɔ ekondi ndɔ phɛɛ.

¹¹ Suiani phɔtɔ ika ka ɓujɛjɛ. Ɓókongiɛ mɔnɔ ka nyɔngɔ ndea ɓakpa ɓuangbo. Tétemisani ndiu ekuma á ka njaga anu sasanu. Nyɔngɔ ndɔ a tɔ ɓíndɔ ɗéɓenóngoɗi.

¹² Ɓo ye otétemisa ekuma á ka njaga anu sasanu, ɓókóoɗokomaneɛku ye ɓakpa. Ɓakpa nde ɓákámɓeekimbɛ Kiísito, ɓâ phɔtɔ onóbeba.

Esa á ja á Mɔkɔta

¹³ Ɓaya, ɓekondi gea, ɓóengekisɛ ɗoni nyɔngɔ á ɓakpa nde ɗáɓásí. Ande gea, ɓókoɓɛ mɔnɔ na ɓɔmbɛ ɓea ɓakpa na ɓáná na nseɓeɔ.

¹⁴ Ɓesu gǎkɛ, ɓeɓeeki gea, Yéso ɗáku, Mokonga áonjujukisa. Kaɓondɔ unge, ɓeɓeeki gea, aějujukisaeka ɓakpa nde ɗáɓásí na ɓámɓeeki Yéso. Mbusa, Mokonga ěbikisande ɓakpa nɛkɛ kimoci na Yéso, mɔtɛ-akɛ.

¹⁵ Cɔ, wani, ɓeonóngoɗea ɓɔphɛi nde Mɔkɔta nɛsu ɗásɔtɔ̌mi. Ɓesu íɓundɔ Yéso asódondande na ɓe phɔ́tɔ ka mokonda, ɓékéɛmɛɛku ɓakpa nde ɗáɓásí mosá.

¹⁶ Nga, ɓɛɔ́kande ɛsɔ ángbó, á mɔphani, ɛsɔ á malaéka, n'ɛsɔ á mbengu ndea Mokonga. Mpɔ, Mɔkɔta sasakɛ atókande na koba, áodida. Mbusa, ɓakpa nde ɗáɓásí na ɗáɓámɓeeki Kiísito, ɓájujukande ka kukuwa mosá-mosá.

¹⁷ Kɛ̌kɛndɔ, ɓesu íɓundɔ ɓe phɔ́tɔ ka mokonda, ɓetáiande kimoci na ɓɔ k'egugu phǒi! Ɓéodondana na Mɔkɔta k'ego. Mpɔ, ɓéoika na Mɔkɔta mɛyɔ.

¹⁸ Cɔ, phiphisanani měma ka nyɔngɔ ndɔɔ.