1 Ɓatɛsalɔníka 2 - Ɔngana á Kɛ̌kɛ

Ekuma ndea Pɔ́lɔ na ɓadakɛ ɓateki mɔtɛ á Ɓatɛsalɔníka

¹ Ɓaya, ɓoúbi gea, bika asu mɔtɛ-anu ɗákátú ecici.

² Ɓoúbi phɔtɔ gea, mosá á kiɗia asu mɔtɛ-anu, ɗáɓásótambisigi phɔ́ na bóma asu ka Philípi. Mɔtɛ-anu phɔtɔ, Mokonga ɗásóphi ɓukpɛkpɛ á phɛá á Mbino-Ánjá nɛkɛ. Ɗéɓegi ɓó, nanga ɓî ɗáɓásóyé.

³ Ɓɔphɛi nɛsu gǎkɛ, nna na mbɛa, nna na maibe, nna n'odemayɔ.

⁴ Ɓe ndiu ɔphɛa ɓíndɔ Mokonga akondi. Nga, ɗásɔɔphani, áosópha Mbino-Ánjá nɛkɛ. Ɓéké phɔtɔ okáɓa ékondisaga na ɓakpa, ɓe ndiu ǒkondisaga na Mokonga, mmbé aoengekisa měma asu.

⁵ Ɓoúbi phɔtɔ gea, ɓékéǒbeba ɓakpa jǎi ka nyɔngɔ ékondisaga na ɓɔ, ɓéké phɔtɔ okáɓa imɔna ka nyɔngɔ á ɓɔphɛi nɛsu. Mokonga aámbé ande nɗigimisi.

⁶ Ɓéké phɔtɔ okáɓa obebɔ ka ɓakpa, kaɓɛ ka ɓenu, kaɓɛ ka ɓakpa ɓuangbo.

⁷ Nanga ɓî ɗéɓetú na ɓukpɛkpɛ éɗokomisa mɔtɛ-anu ɓea ɓateki ndea Kiísito, ɓê ndiu oɓá na měma aphɔngɔ. Ɗéɓetú ɓea ɓama-ɓaniki, ɓunde ɓáotambea nyɔngɔ á ɓ'anaɓɔ.

⁸ Nga, ɗéɓetú na siki anu phɛɛ. Kaɓondɔ unge, ɗéɓenɔ́tɔ̌migi Mbino-Ánjá ndea Mokonga. Nna tɔndɔ nndɔ, ɓê phɔtɔ oɓá na mɔphɛ á kuia anu. Eya, ɗéɓenókondi phɛɛ.

⁹ Ɓaya, ɓoúba ɓî ɗéɓeɔbɛɗanaga akpɛ phɛɛ mɔtɛ-anu, keiphe n'esa gea te, ɓékénóɗokomaneɛ mɔnɔ, mbenɔ nde ɗéɓeɔ́nɔtɔmiaga Mbino-Ánjá ndea Mokonga.

¹⁰ Ɓonde ɓaɗigimisi nɛsu, na Mokonga phɔtɔ, ɓî tambea asu mosá anu ɓenu ɓaɓêki, ɗátú ánjá, kángá á ɓojeɗe, na kángá á kisɛki.

¹¹ Ɓo phɔtɔ oúba ɓî ɗéɓetú ɓea ɓaba-ɓaniki ka ɓenu ɓɔbu.

¹² Nga ɗéɓenógbagisigi ka měma, na phɔngisa anu, na phɛá anu gea, ɓótambeɛ ɓíndɔ amɓɔngɛi Mokonga. Yɛ aámbé anɔɔphani gea, ɓóɓɛ ɓato á ka koɓoamɛ á ɓoombia nɛkɛ.

¹³ Ɓe phɔtɔ onsega Mokonga esa bui, ka nyɔngɔ nde, ɓî ɗéɓenɔ́tɔ̌migi Mbino-Ánjá ndea Mokonga, ɓɔ́ɔɔ́ka, ɓóoɓeekea gea: «Ande nyɔngɔ á Mokonga. Nna nyɔngɔ á kokpa.» Cɔ, ande ɗoni anu. Nga, nyɔngɔ á Mokonga angí ka mɛngɛ anu, ɓenu ɓaɓêki.

Tambisaga á Ɓatɛsalɔníka, a tɔ kimoci n'índe á ɓakiísito ɓuangbo

¹⁴ Ɓaya, ɓokengeani tɔ na ɓato á ka kanisa ndea Mokonga á ka Yudɛ́a, ɓunde ɓámɓeeki Kiísito. Nga, ɓato á k'ékuna nɛnu ɓánótambisigi ɓíndɔ Ɓayúda ɗáɓětambisigi ɓakiísito Ɓayúda.

¹⁵ Ai! Ɓayúda ɗáɓěme ɓaɔtu-nyɔngɔ ndea Mokonga, ɓâ phɔtɔ ommowa Mɔkɔta Yéso. Mpɔ, ɓáosótambisaga ɓesu ɓateki. Ɓakpa ndɔ ɓámɓɛisi Mokonga, ɓáoɓá ɓaɓiɓia á ɓakpa ɓɔbu.

¹⁶ Ɓáokáɓa imisia asu geae, ɓékětɔ̌miɛgɛ mɔnɔ ɓakpa nde ɓáná Ɓayúda nyɔngɔ á ɓoamia á ka měma. Ande gea te, ɓojeɗe nɛɓɔ, nnde á kala, n'índe á kɛ̌kɛ, aɓiki phɛɛ. Cɔ, kɛ̌kɛnde gǎkɛ, esúia ndea Mokonga ědondi.

Mɔphɛ á Pɔ́lɔ ka ɓakpa nde ɗégoisigi

¹⁷ Ɓaya, ɓesu ɓateki gǎkɛ, nanga ɓî ɗéɓekatanigi ka mbenɔ ábɔa ka keongi, ɓékékatanigi ka měma. Kaɓondɔ, ɗéɓetú na mɔphɛ ángbó á ɔna anu goto.

¹⁸ Eya, eme Pɔ́lɔ, netókondi mɔngɔ ásii gǎ á ɔna anu, kimoci na ɓadani. Sɛtáni â gǎkɛ osóɗakea aphe.

¹⁹ Cɔ, mbenɔ á ja á Mɔkɔta nɛsu Yéso Kiísito, ani mmbé aɓande nseɓeɔ na maseye nɛsu, kaɓɛ na nna tɔndɔ ɓenu? Eya, ɓenu ɓáunge ɓoɓande kekombó nɛsu k'ébeba ně mosá akɛ.

²⁰ Nga, ɓonde cina á ɓoombia na maseye nɛsu.