1 Ɓatɛsalɔníka 1 - Ɔngana á Kɛ̌kɛ

Nsesɔ

¹ Ka ɓaɓêki á ka Tɛsalɔníka, sambani. Eme Pɔ́lɔ aámbé neɗundu ɓaoɓa ndee. Ɓe kimoci na Síla, na Timɔtɛ́ɔ. Ɓenu ɓáunge ɓɔɔngani na Abasu Mokonga, na Mɔkɔta Yéso Kiísito. Cɔ, ɓujɛjɛ na ɓonjánja áɓɛ ka ɓenu.

Obebɔ ka Mokonga

² Ɓeonsega Mokonga esa bui ka nyɔngɔ anu ɓenu ɓɔbu. Ɓéké phɔtɔ oɗeketa kumia ina anu k'ɛ́mɛmi nɛsu.

³ K'ɛ́mɛmi kau, ɓeonókanisia mosá á Abasu Mokonga. Nga, ɓeoúba ɓî ɓɔtɔtɔkisi ekuma ásii ka nyɔngɔ nde, ɓomɓeeki, ɓóonkonda. Ɓo phɔtɔ na ɓukpɛkpɛ phɛɛ ɓî ɓonseɓei Mɔkɔta nɛsu Yéso Kiísito.

⁴ Ɓaya, ɓeúbi gea, Mokonga ɗánɔsɔmbu gea, ɓóɓɛ ɓakpa nɛkɛ. Nga, yɛ anokondi.

⁵ A ɓó, ka nyɔngɔ nde, ɓî ɗɛ́ɓɛnɔ́tɔ̌migi Mbino-Ánjá ndea Mokonga, ɗáná tɔndɔ ka yɔnga, ɗátú ndiu ka ɓukpɛkpɛ ndea Měma á kanga ɓojeɗe. Ɗéɓebisi měma asu kau gea, ande ɗoni. Ɓoúbi phɔtɔ tambea asu ɓî ɗéɓeiki sɔsɔɓɛ anu, na ɗátú ánjá ka ɓenu.

⁶ Ɓenu phɔtɔ, ɗóɓoɓǐ tambea asu, n'índe á Mɔkɔta. Ɓô phɔtɔ oɓeekea ɓɔphɛi á Mbino-Ánjá ndɔ, nanga ɓî ɗóɓotambigi phɛɛ ka nyɔngɔ ndɔɔ. Ɗóɓotú ndiu na maseye á Měma á kanga ɓojeɗe.

⁷ Kaɓondɔ, ɓonde mphangiɔ ka ɓaɓêki ɓɔbu á ka Makɛdɔnía na á ka Akáya.

⁸ Nga, ka nyɔngɔ anu, nyɔngɔ á Mɔkɔta ɗáɛmbi ka mokonda bui, nna tɔndɔ ka Makɛdɔnía na ka Akáya. Nga, ɓeekea nɛnu ka Mokonga aunge andandisi nyɔngɔ nɛkɛ. Kaɓondɔ unge, ɓéké ye na nyɔngɔ angbo á ngoɗea á ɓakpa.

⁹ Nga, ɓáɔsɔ́tɔmiaga sasaɓɔ ɓî ɗóɓosósesi ka kiɗia asu mɔtɛ-anu, na ɓî ɗóɓoɗu nkumba ésomba ájeɗe, ɓóǒpháia ka Mokonga, ɓóoɓá ɓabɛɗanigi nɛkɛ. Nga, Mokonga aámbé aoenda mɛyɔ n'ande Mɔkɔta á ɗoni á na koba.

¹⁰ Cɔ, ɓo phɔtɔ omɓondea Anakɛ, mmbé Mokonga ɗánjujúkisi ka ɓasí, n'atókaeka na koba. Ina akɛ ande Yéso, mmbé asóamisi k'esúia ndea Mokonga nnde aobika.