1 Ɓakɔlítɔ 9 - Ɔngana á Kɛ̌kɛ

Ekuma ndea Pɔ́lɔ á phɛá á Mbino-Ánjá

¹ Cɔ, kéna kɔkɔta á gea á kema nde nekondi ee? Ké nteki ee? Eme, ɗékémɔni Yéso, Mɔkɔta nɛsu ee? Ɓókó ɓaniki ékuma nɛmɔ suɓi á Mɔkɔta ee?

² Nanga ɓakpa ɓuangbo ɓámoyá gea ké nteki, ka ɓenu gǎkɛ, nende nteki. Nga, ɓenu sasanu, ɓonde mphangiɔ ékuma nɛmɔ á ɓá nteki nde ɓa Mɔkɔta.

³ Ɛ́yɔngɛani sasani ka ɓakpa nde ɓáɔmɔtɔnga a ɓe:

⁴ Ande gea, kétɔki mɛma anu kema á koea na á konoa ee?

⁵ Kákeni néɓɛ na ɓake-ɓaɓêki ka tamba, ɓea ɓadasu ɓateki ɓunɛngbo, ɓea Pɛ́tɛɛ na ɓana-amakɛ na Mɔkɔta ee?

⁶ Ande gea, eme kaɓɛ Baanába tɔ ɓáunge ɓeɔbɛɗanaga ka tɔá á kema nɛsu bubui nde ɓeoenda ně ee?

⁷ Nto-émani sina mmbé amɔnɔ ǒphenda sasakɛ k'ékuma á nto á emani? Ngubi-ciko sina mmbé aokona mbó, káeɛ kau? Cɔ, nambi etuge sina mmbé, nna mɔnɔ onoa ka iɓo-ɛ́ɓɛ á k'etuge nɛkɛ?

⁸ Cɔ, kɛ́yɔngi tɔ nndɔ ka ɓea moangɔ á kokpa. Ɛɔphi ndea Mósa ayɔngi phɔtɔ ɓó.

⁹ Cɔ, ɓáɗundu suɓi ɛ́ɔphi ndea Mósa ɓe: «Koɗakɛ mɔnɔ aphenɔkɔ á ngɔmbɛ n'aɔɗɛtɛaga mbuka.» Ande gea Mokonga ana mosenda ka ngɔmbɛ?

¹⁰ Káyɔngi ndiu tɔ ka phɔasu? Eya, Mósa ɗáɗundu nndɔ ka phɔasu. Ambe nkpa nde aoguba na mmbé aodowa mbuka, ɓákeni bɛɗanaga na ɓá na nseɓeɔ á tɔá keɓu á ɗungu ínɛɓɔ.

¹¹ Ɓî ɗéɓekoni mbó á kema á ka měma suɓi anu, nna tanda ánjá aoɓá na ɓeɗúngu ka mbó á ka njaga anu?

¹² Cɔ, kaɓɛ ɓakpa ɓuangbo na ɓá na kɔkɔta á tɔá á kema ka njaga anu, ɓesu ɓéké phɔtɔ na kɔkɔta phɛɛ á tɔá á kema ka njaga anu? Cɔ, ɓesu, ɗéɓekébɛɗaneigi kɔkɔta ndɔ, ɓê ndiu oɗeketa kɔkɔta ndɔ ka gea, ɓékéimisiɛ mɔnɔ tútuisa á Nyɔngɔ-Ánjá ndea Kiísito.

¹³ Nga, ɓooúba ánjá gea, ɓakpa nde ɓaɔbɛɗanaga k'éndu ndea Mokonga, ɓáɔtɔa ea nɛɓɔ suɓi éndu ndea Mokonga. Na ɓakpa nde ɓáɔbɛɗanaga ekuma ɔ́phɛ́ɔ gǔ á ɛtɛ-ɔ́phɛ́ɔ, ɓá tɔ na keɓu ínɛɓɔ ka nyama á phɛ́a ndɔɔ.

¹⁴ A ɓíndɔ Mɔkɔta ɗásosi gea, ɓakpa nde ɓáɔtɔmiaga Mbino-Ánjá, ɓáendɛ k'ékuma á tɔ̌miaga á Mbino-Ánjá.

¹⁵ Cɔ, eme, ɗékénɔmɛmi gǎkɛ gea ɓómoengɛ ka ɓeana n'índɔ bui. Kéɗundu ɓó ka gea, nɛɔnɔmɛma ɓómoengɛ. Nétókondi nékuwɛ na nkpa na ka moyeyi ka phɔa á nyɔngɔ nde neǒbeba ně.

¹⁶ Kɛ́ɔtɔka na něbebi ka tɔ̌miaga á Mbino-Ánjá nga, ande kema nde ɓámososi. Ande ngomi k'éme aoɓá na kɛ́tɔ̌migi Mbino-Ánjá.

¹⁷ Atúoɓá eme aámbé ɗɛ́sɔmbu ekuma nde sasani, ámbé netókeni na tɔá á ophendɔ. Cɔ, ka ɔna gea ɓámososi, akeni gǎkɛ tɔ nɛ́tɔtɔkisɛ ú.

¹⁸ Cɔ, ophendɔ nɛmɔ ande kema sina? Ande tɔ̌miaga á Mbino-Ánjá kángá óphendɔ. Nɛɔtɔmiaga Mbino-Ánjá kángá á mɛma gǎkɛ ka kema nde amokeni ně.

¹⁹ Nna na nkpa nde nende nkɔɓɛ nɛkɛ. Eme, ɗéněbisi gǎkɛ sasani nkɔɓɛ ndea ɓakpa ɓɔbu ka gea, nééɓoteɛ ɓakpa ɓásii, ɓáɓɛ ɓakiísito.

²⁰ Mbenɔ nde nɛɔbɛɗanaga sɔsɔɓɛ á ɓayúda, tambea ani áokengeana na nnde á Ɓayúda ka gea, ɓámɓeekeɛ Kiísito. Nanga ɛɔphi ndea Mósa nna na ɓukpɛkpɛ k'éme, ne gǎkɛ ɔbɛɗanaga sɔsɔɓɛ á ɓunde ɓá kusi ɛ́ɔphi, ka gea, nééɓǒteɛ ɓunde ɓákusi á ɛɔphi.

²¹ Mbenɔ nde nɛɔbɛɗanaga sɔsɔɓɛ á ɓakpa nde ɓákákusi ɛ́ɔphi, tambea ani aokengeana na nndeaɓɔ ka gea te, ɓámɓeekeɛ Kiísito. Nna gea te, kéoamba ɛɔphi ndea Mokonga nga, neoamba ɛɔphi ndea Kiísito.

²² Mbenɔ nde nɛɔbɛɗanaga sɔsɔɓɛ á ɓakpa nde ɓákámɔtimbɛ ka ɓeekea, tambea ani aokengeana na nndɛaɓɔ ka gea, ɓámɓeekeɛ Kiísito. Eya, neǒyamea ka ɓakpa ɓɔbu ka gea, ɓakpa ɓunɛngbo sɔsɔɓɛ aɓɔ ɓáamɛ ka měma.

²³ Neogea nndɔ bui ka nyɔngɔ á Mbino-Ánjá gea te, nɛ́tɔɛ ka keɓu á bisia njaga.

²⁴ Ɓókóoúba gea te, ɓo ɓea ɓato á njoko á gǎ á mbangɔ ɓásii? Nkpa moci tɔ ámbé ɓáɔnkɔma. Cɔ, ɓáni ɓea nkpa ndɔɔ.

²⁵ Nga, nkpa buakɛ mmbé akondi ngia ka njoko, akeni átaeɛgɛ. Aogea ɓondɔ ka gea te, ɓámophɛ ɛkɔmi á mokonda, nnde aújukanande. Ɓesu gǎkɛ, ɓeogea nɛsu ka gea, ɓéɓɛ n'ɛkɔmi nde káújukanɛku.

²⁶ Kaɓondɔ unge, eme ké ɓea nkpa nde aoga mbangɔ jǎi-jǎi. Ké phɔtɔ ɓea nto á njoko á ɓɛtanaga, mmbɔ aoseya njaga akɛ ka mpɛna.

²⁷ Ne gǎkɛ otambisaga nyama ani phɛɛ ka gea, nena kɔkɔta gǔ í. Ande ka gea, mbusa á phɛá á ɓakpa ɓuangbo, ɓákámoyɛgɛ mɔnɔ.