1 Ɓakɔlítɔ 8 - Ɔngana á Kɛ̌kɛ

Nyama nde ɓáophúia ka phɛ́a ka ɓamokonga á mbɛa

¹ Ɓeoúba gea, ka nyɔngɔ á nyama ɔ́phɛ́ɔ ka ɓamokonga á mbɛa: «Ɓesu ɓɔbu ɓena úbapha ka nyɔngɔ ndɔɔ», ɓíndɔ ɓɔɔyɔnga. Úbapha ndɔ, aomopha nkpa ébeba. Ekondi a gǎkɛ ǒgbagisaga ɓakpa ka měma.

² Nkpa nde aokanisia te, aoúba kema, káúbimbɛ ɓíndɔ atókeni úba í.

³ Aoɓá nkpa n'ankondi gǎkɛ Mokonga, Mokonga amúbande yɛ.

⁴ Cɔ, músiɔ a ɓe: Ɓɛɔtɔka na ɓeí due á nyama á phɛ́a ka ɓamokonga á mbɛa? Cɔ, ɓeoúba gea, nna na ka ɓamokonga á mbɛa nde ande ɗoni ka mokonda ndee. Ɓe gǎkɛ oúba gea, Mokonga a tɔ mo.

⁵ Eya, ɓakpa ɓunɛngbo ɓáogea, ɓamokonga á mbɛa ɓá na koba na ɓá phɔtɔ ka mokonda. Cɔ, ka ɓakpa ndɔ, ɓamokonga á mbɛa ɓáɓiki, na ɓakɔta ɓáɓiki phɔtɔ ɓó.

⁶ Ka ɓesu gǎkɛ, Abasu Mokonga a tɔ mo, mmbé aconji kema bubui, na ka ɓukpɛkpɛ nɛkɛ aunge ɓeoenda. Mɔkɔta a tɔ mo, Yéso Kiísito, mmbé kema bui a ɓei ka nyɔngɔ akɛ, na ka ɓukpɛkpɛ nɛkɛ aunge ɓeoenda.

⁷ Cɔ, ɓakpa ɓɔbu ɓáná gǎkɛ oúba ɗoni ndɔɔ. Ɓakpa ɓuangbo ɓáɛmbani gǎkɛ na beba á ɓamokonga á mbɛa. Na ka kɛ̌kɛnde, aoɓá na ɓáí eea ɓíndɔ, ɓá phɔ́tɔ okanisia te ɓáí nyama á phɛ́a. Ɓakpa ndɔ, úbapha aɓɔ akusi, ɓáɔɔna gea ɓájɔɔkani ka nyɔngɔ á nyama ndɔɔ.

⁸ Cɔ, eea kásojúsɛku mosá á Mokonga. Kaɓɛ na ɓeɗeketi ea á nyama á phɛ́a, ɓékéúki ka kema. Kaɓɛ gǎkɛ na ɓeí, ɓékéyamei tanda ka kema.

⁹ Ɛ́ngɛphani nga, ɓî ɓogbau, gbaua ndɔ, kěgúsɛ mɔnɔ gǎkɛ ɓakpa nde ɓeekea nɛɓɔ kámɔti.

¹⁰ Nga, aoɓá ka ɓundɔ ɓákámɔti ka ɓeekea n'akɔɔni oɓɛ ímbɔ ooúba ɗoni, n'ooeaga k'éndu ésomba, měma akɛ kántekande tɔndɔ áeɛ nyama ɔ́phɛ́ɔ ka ɓamokonga á mbɛa?

¹¹ Wa, dakɔ ímbɔ kámɔti ka ɓeekea na Kiísito ɗáku ka nyɔngɔ akɛ, aɓúngagande ka nyɔngɔ á «úbapha» akɔ.

¹² Cɔ, ka gea ɓojeɗe ɓó ka ɓadanu íɓunde ɓákámɔti ka ɓeekea, na újá á měma aɓɔ, ɓogi phɔtɔ ɓojeɗe ka Kiísito.

¹³ Kaɓondɔ unge, aoɓá eea n'aongusa dani ka ɓojeɗe, kéeɛeka ye tanda nyama ka gea, kengúsɛ mɔnɔ dani.