1 Ɓakɔlítɔ 7 - Ɔngana á Kɛ̌kɛ

Músiɔ ka nyɔngɔ á eyamani

¹ Cɔ, kɛ̌kɛnde, nejisi nyɔngɔ nde ɓotómoɗundui. Ande kema ánjá mǒko kamukɛmbɛ nke.

² Ka nyɔngɔ á ɓánga iɛɓɛ, ambe mǒko buakɛ áɓɛ ndiu na nke ímbɛkɛ, na nke buakɛ áɓɛ na mǒko ímbɛkɛ.

³ Akeni munya-nke átɔtɔkisɛ ka nkakɛ kema nde nke anasiki í. Akeni phɔtɔ nke-éyamani átɔtɔkisɛ ka munyakɛ kema nde mǒko anasiki í.

⁴ Nke éyamani nna ye na kɔkɔta gǔ á nyama akɛ sasakɛ, munyakɛ ndiu aámbé ana kɔkɔta í. Mǒko-éyamani nna phɔtɔ na kɔkɔta gǔ á nyama akɛ sasakɛ, nkakɛ ndiu aámbé ana kɔkɔta í.

⁵ Ɓókóúmanɛ mɔnɔ. Aoɓá n'ande ka nyɔngɔ á mɛma á Mokonga, ɔ́kanani ko ɓaɓɛ anu ka mbenɔ ábɔa. Mbusa í, ɓóodondana ka ɓánga gea, Sɛtáni kanótombɛgɛmbɛ, ka nyɔngɔ nde, ɓókó na ɓukpɛkpɛ á amba nyama anu.

⁶ Nyɔngɔ ndɔ, nna gǎkɛ ɛɔphi, a tɔ kanisia nde nenóphi.

⁷ Netókondi gea, ɓakpa ɓɔbu ɓáɓɛ ɓea eme, kángá á ɓoá á nke. Nkpa na nkpa a gǎkɛ n'egabɔ nɛkɛ sasakɛ ɓíndɔ Mokonga amophi. Nkpa moci, egabɔ índe, nkpa ɓaangbo, egabɔ índo.

⁸ Cɔ, ka ɓundɔ ɓasimba na ɓake á kekusa, atúoɓá ánjá, ɓɔ, ɓáikɛ ɓea eme.

⁹ Aoɓá na ɓáná gǎkɛ ɔtɔka amba á nyama aɓɔ, ambe ɓáɔmanɛ. Nga, akeni ɔmana, kángá á bomokaga á měma na mɔphɛ á koke na koɓǒko.

¹⁰ Ka ɓundɔ ɓɔɔmani, ɛɔphi a ɓe: Nke kaɗoanɛ mɔnɔ na munyakɛ. Ɛɔphi ndɔ kátóki k'eme, atóki ka Mɔkɔta.

¹¹ Aoɓá nke n'aɗoani na munyakɛ, kaɔmanɛmbɛ ye. Aoɓá na nna ɓó, áɔ́kanɛ na munyakɛ. Mǒko kan'yɛ́ mɔnɔ phɔtɔ nkakɛ.

¹² Cɔ, ka ɓakpa ɓuangbo, eme nɛyɔngi ɓe, nna Mɔkɔta: Aoɓá mǒko mɓêki n'ana nke nde nna mɓêki, nke ndɔ aokonda ika na yɛ, mǒko kan'yɛ́mbɛ.

¹³ A phɔtɔ ɓó ka nke nde ande mɓêki n'ana mǒko nde nna mɓêki. Aoɓá mǒko ndɔ n'aɓeeki ika na yɛ, nke ndɔ kan'yɛ́mbɛ.

¹⁴ Nga, ka mǒko mmbé nna mɓêki, a bíbí na Mokonga ka nyɔngɔ á ɔ́kana akɛ na nkakɛ. Ka nke mmbé nna mɓêki, a phɔtɔ bíbí na Mokonga ka nyɔngɔ á ɔ́kana akɛ na munyakɛ. Kaɓɛ na nna ɓó, ámbé ɓ'ananu ɓáɓande ɓaniki áɔjɔɔkana, na ɓá ye ɗoni bíbí na Mokonga.

¹⁵ A gǎkɛ oɓá mmbé nna mɓêki, n'akondi ɗoana na mɓêki, áɗoanɛ. Aoɓá n'a ɓó, mǒko, kaɓɛ nke mmbé ande mɓêki nna kusi ɛ́ɔphi nga, Mokonga ɗánɔɔphani gea, ɓóikɛ ka ɓujɛjɛ.

¹⁶ Cɔ, oɓɛ nke-mɓêki, ooúba gea, onamisande munyakɔ ɗoni? Oɓɛ mǒko-mɓêki, ooúba gea, onamisande nkakɔ ɗoni?

Enda anu áɓɛ ɓíndɔ Mokonga ɗánɔɔphani

¹⁷ Cɔ, kaɓɛ na nna ɓó, akeni nkpa na nkpa áendɛ ka etéte á enda nde Mokonga ɗámophi. Áendɛ phɔtɔ ɓea ɓî ɗátú, Mokonga na kámɔphanimbɛ. Ɓɔphɛi ndɔ unge nɛɔphɛa ka kanisa bui.

¹⁸ Aoɓá Mokonga na ɗámɔphani nkpa n'ande ngu-ganja, áikɛ tɔ ngu-ganja. A gǎkɛ oɓá Mokonga na ɗámɔphani nkpa n'ande mowó, kagúɛmbɛ ganja.

¹⁹ Gúa á ganja, na kowó, nna na kantíti. Nnde ana kantíti ande gǎkɛ amba ɛɔphi ndea Mokonga.

²⁰ Akeni nkpa na nkpa áikɛ tɔ ka etéte nde ɗátú kau mbenɔ nde Mokonga ɗámɔphani.

²¹ Mbenɔ nde Mokonga ɗákɔɔphani, ɗótú nkɔɓɛ? Cɔ, koianɛgɛmbɛ. Aoɓá gǎkɛ aphe á toka akɔ ka kɔkɔɓɛ n'aɓei, ambe ótokɛ

²² Nga, nkpa nde Mɔkɔta ɗámɔphani n'ande nkɔɓɛ, atóki ye tɔ ka kɔkɔɓɛ ɓî a ye nkpa ndea Mɔkɔta. Nkpa nde Mɔkɔta ɗámɔphani na nna nkɔɓɛ, a ye gǎkɛ nkɔɓɛ ndea Kiísito.

²³ Mokonga ɗánósombi k'ésombi akpɛ. Ɓî a ɓó, ɓókoɓɛmbɛ ka kɔkɔɓɛ ndea ɓakpa.

²⁴ Ɓaya, akeni nkpa áikɛ mosá á Mokonga ɓíndɔ ɗáiki mosá, mbenɔ nde Mokonga ɗámɔphani.

Ɓɔphɛi ka phɔa á ɓake nde ɓákáɔmanimbɛ na ɓake á kekusa

²⁵ Ka ɓunde ɓákáɔmanimbɛ, Mɔkɔta kámososi ka kema ka phɔa aɓɔ. Nɛɔnɔphɛa nga, nende nkpa nde akeni ɓáɓeekeɛ nyɔngɔ nɛmɔ ka nyɔngɔ á ɓonjánja-ékondi nde Mɔkɔta ɗámopi.

²⁶ Ka nyɔngɔ á tambaga á ka matú nde, kanisia nde a suɓi á měma ani a ɓe: Akeni nkpa na nkpa áikɛ tɔ ɓíndɔ aiki.

²⁷ Ona nke? Kokaɓɛmbɛ yá akɛ. Kó gǎkɛ na nke? Cɔ, konkaɓɛmbɛ nke.

²⁸ A gǎkɛ oɓá n'omukí nke, kógi ɓojeɗe. A gǎkɛ oɓá nseka n'aɔmani, kági phɔtɔ ɓojeɗe. Ɓundɔ ɓáɔmani ye, ɓátambagande ka enda aɓɔ esa bui. Kaɓondɔ unge, nekondi nénóɓángisɛ na tambaga ndɔɔ.

²⁹ Ɓaya, nnde nɛyɔngi a ɓe: Mbenɔ kájigi ye ásii. Cɔ, kpangá á kɛ̌kɛnde, ɓakpa nde ɓána ɓake, ɓáikɛ ɓea ɓakpa nde ɓáná na ɓake.

³⁰ Ɓunde ɓáogáma, ɓáikɛ ɓea ɓunde ɓánáogáma, ɓunde ɓána maseye, ɓáikɛ ɓea ɓunde ɓáná na maseye, ɓundɔ ɓáosomba kema, ɓáikɛ ɓea ɓunde ɓáná na ka kema,

³¹ ɓunde ɓáɔbɛɗaneaga nkumba á ka mokonda, ɓáɓɛ ɓea ɓakpa nde ɓákáɔbɛɗaneaga ú nga, mokonda nde aoga ka sungiaga í.

³² Netókondi ɓóikɛ kángá á ianaga ka měma. Nkpa nde káɔmani, aoianaga nyɔngɔ ndea Mɔkɔta, aokáɓa ékondisaga na Mɔkɔta.

³³ Nkpa nde amɓǔ gǎkɛ nke, aoianaga nyɔngɔ á ka mokonda, aokaɓa ékondisaga na nkakɛ.

³⁴ Wa, ianaga iɓɛ aomɓotea. A tɔ ɓó ka nke nde káɔmani na ka nseka, yɛ aoianaga nyɔngɔ ndea Mɔkɔta ka gea, měma na nyama akɛ, áɓɛ ka Mɔkɔta, kángá á ɓojeɗe. Cɔ, nke nde aɔmani, a gǎkɛ aoianaga nyɔngɔ á ka mokonda, aokaɓa ékondisaga na munyakɛ.

³⁵ Nyɔngɔ ndɔ nɛyɔngi ande kanu. Nna ka imisia anu. Nekondi ndiu ɓótambeɛ ɓíndɔ akeni ka gea te, ɓɔ́mbɛɗaneɛgɛ Mɔkɔta na měma mo.

³⁶ Cɔ, aoɓá moganda n'akanisi te, aongea nke á mbanje nɛkɛ ájeɗe nga, nna omuka, aoɓá n'atúmi na mosenda á koke na koɓǒko, ambe ámukɛ nke ɓíndɔ akondi. Aogea ɓó, kági ɓojeɗe.

³⁷ A gǎkɛ oɓá moganda n'akondi ka měma akɛ ɗeketa á nyɔngɔ á ɓoá á nseka ndɔ, aoɓá n'ana ɓukpɛkpɛ á amba á nyama akɛ, cɔ, ɗeketa nyɔngɔ éyamani, nna ájeɗe.

³⁸ Nkpa nde aomuka nke á mbanje nɛkɛ, agi ánjá. Mmbé aɗeketi gǎkɛ nyɔngɔ á mbanje, agi phɔtɔ ánjá phɛɛ.

³⁹ Nke a tɔ oɓá kusi á kɔkɔta á munyakɛ, ámbé munyakɛ ka yɛ kákumbɛ. A ye oɓá munyakɛ n'aku, nke ndɔ n'akondi ɔmana, áɔmanɛ na mǒko nde yɛ ankondi, aoɓá mǒko ndɔ n'ande mɓêki nde ɓa Mɔkɔta.

⁴⁰ Atóɓande nto á maseye phɛɛ, ámbé aiki tɔ kángá ɔmana. Nndɔ ande kanisia nɛmɔ, nnde neoúba te, Měma á Mokonga aunge amopi nyɔngɔ ndɔɔ.