1 Ɓakɔlítɔ 6 - Ɔngana á Kɛ̌kɛ

Tena á nyɔngɔ á ɓakiísito

¹ Aoɓá ka ɓenu moci n'ana nyɔngɔ na dakɛ mɓêki, â goto oga ně ka ntua á tena nyɔngɔ á ɓakpa nde ɓáká ɓato á Mokonga kángá á gǎ ně mosá á ɓakpa ndea Mokonga ka ɓo?

² Ɓókóoúba gea, ɓakpa ndea Mokonga ɓáunge ɓátenaeka nyɔngɔ ndea ka mokonda? Cɔ, ɓî ɓotenaeka ú, ɓɔ́kɔ́ɔtɔka na ɓoteni nyɔngɔ ábɔbɔbɔa?

³ Ɓókóoúba gea, ɓetenaeka nyɔngɔ ndea ɓamalaéka? Cɔ, kákeni ɓétenɛ phɔtɔ nyɔngɔ á ka mokonda ndee!

⁴ Cɔ, mbenɔ nde ɓooɓá na nyɔngɔ á tena í ɓínde, eke nde ɓooga na nyɔngɔ ndɔ mosá á ɓateni-nyɔngɔ, ɓunde ɓáná na kɔkɔta suɓi á kanisa?

⁵ Nenóngoɗi ɓó ka kusa anu na soni. Ande gea, sɔsɔɓɛ anu, ɓókó tanda na mɔɔngɛ moci, mmbé aɔtɔka n'ateni nyɔngɔ nde a sɔsɔɓɛ anu ɓaɓêki?

⁶ Kɛ̌kɛnde gǎkɛ, mɓêki aɔntɔnga dakɛ mɓêki mosá á ɓateni nyɔngɔ ɓunde ɓáká ɓaɓêki!

⁷ Eya, ɓî ɓo ye ɔtɔngana ngǔngu anu, ande gea, ɓotugbanigi ye tɔ. Kátókeni ndiu ɓóphiphiɛ ɓojeɗe nde ɓakpa ɓáonogea ně? Kátókeni ndiu ka ɓenu ɓánóútɛ nkumba nɛnu?

⁸ Cɔ, ɓenu gǎkɛ ɓáunge ɓoogea ájeɗe na utá á nkumba ndea ɓakpa ɓunɛngbo, na ɓakpa ndɔ ɓǒgea ɓó, ɓánde ɓadanu ɓaɓêki.

⁹ Ɓókóoúba gea, ɓakpa nde ɓáogea ájeɗe ɓákáɓɛku na ɓotukɔ ka koɓoamɛ ndea Mokonga? Ɓókǒdemɛ mɔnɔ sasanu. Ɓakpa nde ɓákáɓɛku na ɓotukɔ ka koɓoamɛ ndea Mokonga ɓáungee: Ɓato á iɛɓɛ, ɓato á beba á ɓamokonga á mbɛa, ɓato á otungɔ, ɓǒko íɓunde ɓáǒɗaga ɓadaɓɔ ɓǒko,

¹⁰ ɓakukuɓa, ɓakpa nde měma aɓɔ aɔphɛngɛmana ka kema, ɓato á ɓoita, ɓato á ɛphɔ́ti, ɓato á njaga-njaga.

¹¹ Cɔ, ka ɓenu ɓuangbo ɗáɓátú tɔ ɓondɔ. Mokonga â gǎkɛ onósokosea, áɔnɔsɔmbɔa gea te, ɓóɓɛ ɓakpa nɛkɛ, áonótanga ɓato á koɗoni k'ína á Mɔkɔta nɛsu Yéso Kiísito na ka Měma á Mokonga nɛsu.

Nɗokomisani Mokonga ka nyama anu

¹² Ɓakpa ɓuangbo sɔsɔɓɛ anu ɓáogea: «Ɓámososi tɔ kema bubui.» Eya! Nna gǎkɛ kema bubui unge aánjá ka ɓenu. Nɛɔtɔka na negi te: «Ɓámososi kema bubui.» Kéɓeekeɛku gǎkɛ ɓá nkɔɓɛ á kema bubui.

¹³ Ɓogi goto te: «Ɓáconji eea ka nyɔngɔ á sɔphɔ, sɔphɔ ka nyɔngɔ á eea.» Mokonga aújande gǎkɛ kema ndɔ bui. Cɔ, ɓákáconji gǎkɛ nyama á nkpa ka nyɔngɔ á iɛɓɛ. Nyama a ndiu ka nyɔngɔ á Mɔkɔta na Mɔkɔta ka nyɔngɔ á nyama.

¹⁴ Mokonga ɗánjujúkisi Mɔkɔta Yéso ka kukuwa, na asójujukisande ka kukuwa ka ɓukpɛkpɛ nɛkɛ phɛɛ.

¹⁵ Cɔ, ɓooɓosa gea, nyama anu ande gbútuka á nyama á Kiísito? Cɔ, akeni nɛ́bɛɗɛ phaeka á nyama á Kiísito, nébisɛ ú ka phaeka á nyama á nke á mambɔ? Tanda phɔ́.

¹⁶ Ɓókóoúba gea, nkpa nde aoɗá na nke á mambɔ, ɓá ye tɔ na yɛ nyama ímoci? Nga, ɓáɗundu suɓi á Ɓuku á Mokonga ɓe: «Mǒko na nke, ɓáɓande nkpa mo.»

¹⁷ Nkpa nde ajúkani gǎkɛ na Mɔkɔta Yéso, a ye tɔ na yɛ nkpa moci ka měma.

¹⁸ Ɓángáni otungɔ. Ɓojeɗe nɛngbo bui nnde nkpa áogea, a ɗanga na nyama akɛ. Nkpa nde a gǎkɛ ǒyamea k'ótungɔ, agi ɓojeɗe ka nyama akɛ sasakɛ.

¹⁹ Ɓókó gǎkɛ oúba gea, nyama anu ande endu ndea Měma á kanga ɓojeɗe? Na Měma nde ɓoně Mokonga aámbé anophi? Ɓókó ɓamɛna-nyama anu sasanu.

²⁰ Mokonga aámbé ɗánósómbi k'ésombi akpɛ. Kaɓondɔ, nɗokomisani pɛ Mokonga ka nyama anu.