1 Ɓakɔlítɔ 5 - Ɔngana á Kɛ̌kɛ

Ɓakiísito á ka Kɔlítɔ ɓáotambea ájeɗe

¹ Mbino anu aɔɔ́kɛkana ɔma bui gea, ɓona nyɔngɔ á iɛɓɛ sɔsɔɓɛ anu. Iɛɓɛ kau, aájeɗe phɛɛ nnde ɓákádondimbɛ mɔnɔ, nanga áɓá ka ɓunde ɓáná ɓaɓêki nga, ɓági te, ka ɓenu moci amukí nka-abakɛ!

² Cɔ, ɓenu, ɓo goto ǒbeba! Atókeni ndiu ɓóɓɛ na ɓɔmbɛ na ɓómɓeɛgɛ nkpa nde atɔtɔkisi kema ndɔ sɔsɔɓɛ anu.

^3-4 Cɔ, nanga néɓá ɗanga ka nyama, ne tɔ kimoci na ɓenu ka měma. Ka mmbɔ agi ɓojeɗe ndɔ, neteni ye tɔ nyɔngɔ nɛkɛ k'ína á Mɔkɔta nɛsu Yéso, ɓea nkpa nde ne kimoci na ɓenu. Mbenɔ nde ɓodondanagande, neɓande na ɓenu kimoci ka měma, na ɓukpɛkpɛ á Mɔkɔta nɛsu Yéso aɓande phɔtɔ ɓei.

⁵ Cɔ, mbisani nkpa ndɔ ka njaga á Sɛtáni gea, nyama akɛ áújukanɛ, měma akɛ áamɛ gǎkɛ esa nde Mɔkɔta Yéso ajande.

⁶ Nna na kema nde akeni ɓóobebɛ ně. Ɓókóoúba gea, cacu ábɔa aoɓimbisa mokati bui?

⁷ Cɔ, ósokoseani, ɓótokisɛ cacu á kala ka gea, ɓóɓɛ ɓea mokati á kɛ̌kɛ nnde nna na cacu. Eya, ɓo ye tɔ kángá á cacu, kpanga á ɓî Kiísito Muna-mɔgɔgɔ á Pasáka nɛsu ɗáku ka phɛ́a.

⁸ Cɔ, ɓégúɛni jaí nɛsu á Pasáka kángá á cacu á kala, kángá ɓojeɗe na mɔphɛ ájeɗe. Ɓégúɛni ndiu jaí ndɔ na mokati á kanga cacu, ande gea, gúa á jaí ka ɗoni na kángá á ɓojeɗe.

⁹ Suɓi á ɓaoɓa ndɔ ɗénóɗundui mosá, ɗénógi te, ɓókodaɗokeanɛmbɛ na ɓato á otungɔ.

¹⁰ Ka yɔnga ani ɓó, kétókóndi gea te, ɓókódaɗokeanɛmbɛ mɔnɔ na ɓakpa ɓɔbu ɓunde ɓánde ɓato-ájeɗe á ka mokonda ndee, kaɓɛ n'ande ɓato á měma á phɛngɛmana ka kema, ɓakukuɓa, ɓato á beba á ɓamokonga á mbɛa. Nga, ka katana na ɓɔ, kátókeni ye ɓóendɛ ka mokonda ndee!

¹¹ Cɔ, ɗénoɗundui gǎkɛ gea, ɓókodaɗokeanɛ mɔnɔ na nkpa nde aogea: «Nende mokiísito», n'ande: nto á otungɔ, nto á phɛngɛmana á měma ka kema, nto á beba ɓamokonga á mbɛa, nto á ɛphɔti, nto á ɓoita, nto á njaga-njaga. Ɓókóeɛgɛmbɛ na ɓɔ.

^12-13 Cɔ, ké na nyɔngɔ ka ɓakpa á ka mokonda ndee. Mokonga aámbé atenande nyɔngɔ nɛɓɔ. Akeni ndiu, ɓótenɛ nyɔngɔ á ɓakiísito ɓunde ɓáogea ájeɗe. A tɔ ɓíndɔ Ɓuku á Mokonga ayɔngi: «Mɓeagani nkpa ájeɗe sɔsɔɓɛ anu.»