1 Ɓakɔlítɔ 4 - Ɔngana á Kɛ̌kɛ

Ɓateki ndea Kiísito

¹ Kaɓondɔ, ósobɛɗani ɓea ɓabɛɗanigi ndea Yéso Kiísito, ɓɛɔbɛɗanaga ka tɔ̌mia nyɔngɔ á ɓɔsɔmɛa ndea Mokonga.

² Cɔ, kema nde ɓámɛmi ka ɓaɗigimisi ekuma, ande bɛɗanaga ánjá.

³ Cɔ, kaɓɛ n'ande ɓenu, kaɓɛ n'ande ɓato á ka ntua á tena á nyɔngɔ ɓáunge ɓáotena nyɔngɔ nɛmɔ, nndɔ nna kema ángbó k'éme. Eme, ké gǎkɛ otena nyɔngɔ nɛmɔ sasani.

⁴ Ɗoni, měma ani nna ɔmɔtɔnga ka kema. Nna gǎkɛ gea te, neúki ɓojeɗe. Mɔkɔta aámbé ande nteni-nyɔngɔ nɛmɔ.

⁵ Kaɓondɔ, ɓókótenɛ mɔnɔ nyɔngɔ ndea nkpa mosá á mbenɔ nde ɗáɓábisi. Mɓondeani Mɔkɔta ájɛ, Yɛ aámbé abisande base kema nde ɓásɔ̌mi ka keiphe, na bisa á base mosenda á ɓɔsɔmɛa á suɓi á měma á ɓakpa. Mpɔ, Mokonga ambebande nkpa na nkpa ɓíndɔ ankeni ně.

⁶ Ɓaya, nɛyɔngi nyɔngɔ ndɔ gǔ ani na gǔ á Apɔ́lɔ gea, tambea asu áɓɛ mphangiɔ ka ɓenu. Mpɔ, ɓóoúba kantíti á nyɔngɔ ndee: «Ɓókotingɛ mɔnɔ nyɔngɔ nde ɗáɓáɗundu.» Kaɓondɔ unge, nkpa kěbebɛmbɛ ka phɔa nkpa moci, na ɓɛnjiaga á ɓakpa ɓunɛngbo.

⁷ Cɔ, ani mmbé akobisi mɔkɔta gǔ á ɓadakɔ? Kema bui nde oně, nna tɔ Mokonga aámbé ɗákophi? Cɔ, ɓî a gǎkɛ ɓó, ǒbeba na kema nde oně, óoúba te, ɓákákophi ka ɓo?

⁸ Cɔ, ɓo ye tɔ na kema bui nde ɓonasiki í. Ɓo ye tɔ ɓatɔi. Ɓo ye tɔ ɓaamɛ, na ɓéké ɓaamɛ. Eya, nekondi gea ɓóɓɛ ɓaamɛ ɗoni ka gea, ɓesu phɔtɔ ɓémameɛ nji kimoci na ɓenu.

⁹ Nga, neokanisia te, Mokonga ɗásobisi ɓesu ɓateki ɓato á mbusa phɛɛ. Ɓáosotanga ɓea ɓakpa nde ɓáteni nyɔngɔ nɛɓɔ akpɛ ka kukuwa. K'índɔ unge ɓato á ka mokonda bui na ɓamalaéka ɓá ye tɔ osotangaaga.

¹⁰ Ɓesu, ɓende ɓabóbó ka nyɔngɔ á Kiísito, ɓenu gǎkɛ, ɓonde ɓato á kɔɓɔɔngɛ ka nyɔngɔ á jukana anu na Kiísito. Ɓesu ɓende ɓakusi, ɓenu ɓo gǎkɛ, ɓákpɛkpɛ. Ɓesu, ɓakpa ɓáɔsɔɓɛnjiaga, ɓenu gǎkɛ, ɓakpa ɓáonóɗokomisa.

¹¹ Na ka kɛ̌kɛnde, ɓena nja n'ɛnyɔta, ɓena ɓuyɛnɛ á ngɔ́mbɛ, ɓáosótambisaga, ɓeoga na ɓeótambeaga kángá ɔma á ɓuiki.

¹² Ɓɛɔbɛɗanaga akpɛ phɛɛ na njaga asu sasasu. Mbenɔ nde ɓakpa ɓáosóbóma, ɓê gǎkɛ ǒbisia njaga. Mbenɔ nde ɓakpa ɓáosótambisaga, ɓê gǎkɛ odakana.

¹³ Mbenɔ nde ɓakpa ɓáosóphusiaga na nyɔngɔ, ɓéǒsikisia ɓujɛjɛ. Kɛ̌kɛnde ɓakpa ɓáɔsɔ́ɔna ɓea kema á jǎi-jǎi á ka mokonda na ɓea eû.

¹⁴ Kénóɗundui nyɔngɔ nde ka kusa anu na soni, a ndiu ka phɛá anu ɓea ɓaniki nɛmɔ ékondi phɛɛ.

¹⁵ Ka enda anu kimoci na Kiísito, nanga ɓótóɓá na ɓagoisigi elephu nkama (10.000), abanu a tɔ mo. Eme ámbé ne ye tɔ abanu suɓi á Yéso Kiísito, ka tɔ̌miaga anu Mbino-Ánjá.

¹⁶ Kaɓondɔ, nenóɗengemisigi gea, ɓeani tambea nɛmɔ.

¹⁷ Kaɓondɔ unge, nenteki Timɔtɛ́ɔ mɔtɛ-anu. Yɛ, ande miki nɛmɔ ékondi n'ande nto á tambea ánjá suɓi á ɓeekea á Mɔkɔta. Yɛ, anokanisiande moangɔ nde neoɓea ka enda ani na Kiísito nga, nndɔ unge nɛɔphɛa ɔma bui ka kanisa bui.

¹⁸ Ɓakpa ɓuangbo sɔsɔɓɛ anu ɗáɓáǒbeba, ɓáoúba te, kéjuɛeka ye kó.

¹⁹ Cɔ, kaɓɛ gǎkɛ Mɔkɔta n'akondi, ámbé nekamisagande donda anu. Mpɔ, neúbande, nna tɔndɔ yɔnga á ɓunde ɓáǒbeba, neúbande phɔtɔ kema nde ɓá na ɓukpɛkpɛ á gea í.

²⁰ Koɓoamɛ ndea Mokonga nna tɔ ka yɔngaga, a ndiu ka ɓukpɛkpɛ.

²¹ Cɔ, ɓokondi ɓo? Nébikɛ mɔtɛ-anu na gbútu, kaɓɛ na měma ékondi na ɓɔphɔngɔ?