1 Ɓakɔlítɔ 3 - Ɔngana á Kɛ̌kɛ

Ɓabɛɗanigi ndea Kiísito

¹ Cɔ, ɓaya, ɗékétɔki ngoɗea anu nyɔngɔ ɓea ɓakpa nde ɓá na Měma á Mokonga. Ɗɛ́yɔngi ndiu na ɓenu ɓea ɓakpa á ka mokonda ndee, ɓea ɓambɛnjɛ suɓi á ɓeekea á Kiísito.

² Kaɓondɔ unge, ɗénóphi iɓo-ɛ́ɓɛ ka noa í, kángá opha anu eea akpɛ nnde ɗɔ́ɓɔ́kɔ́tɔkɛku. Na ka kɛ̌kɛnde, ɓɔ́kɔ́tɔkɛku

³ nga, ɓo phɔ́tɔ otambea ɓea ɓakpa á ka mokonda ndee. Sɔsɔɓɛ anu, ɓona nsengo na sani. Cɔ, ɓókó phɔ́tɔ na tambea á ɓato á ka mokonda nde? Ɓókó phɔ́tɔ na tambea á kokpa?

⁴ Mbenɔ nde ka ɓenu aɔyɔnga te: «Eme, nende nkpa nde ɓa Pɔ́lɔ», ɓaangbo áɔyɔnga te: «Eme, nende ɓa Apɔ́lɔ» cɔ, ɓókó phɔ́tɔ otambea kokpa?

⁵ Cɔ, Apɔ́lɔ ande ani? Pɔ́lɔ ande ani? Ɓe tɔndɔ ɓabɛɗanigi, ɓunde ɗóɓoɓeeki ka ɓeana na ɓɔphɛi nɛɓɔ. Nkpa na nkpa ɗátɔtɔkisi ekuma ɓíndɔ Mokonga ɗángabei.

⁶ Eme, ɗékoni mbó, Apɔ́lɔ áoɗukia iɓo, Mokonga â gǎkɛ ɔtɛisa ú.

⁷ Cɔ, nkonanigi na nɗuki-iɓo ɓɔbu ɓáká na kantíti. Mmbé ana kantíti, a gǎkɛ tɔndɔ Mokonga, mmbé aɔtɛisa mbó.

⁸ Nkonanigi na nɗuki-iɓo, ɓá tɔ kímoci. Mokonga amphendande nkpa na nkpa ɓíndɔ abɛɗanigi ekuma nɛkɛ.

⁹ Nga, ɓɛɔmbɛɗaneaga Mokonga kimoci. Na ɓenu, ɓonde ciko na mɔphɛkɔ ndea Mokonga.

¹⁰ Ka ɓeana na egabɔ nde Mokonga ɗámopi, ɗébisi ɛtɛ á kpanga á mɔphɛkɔ ɓea mphɛki anjánjá. Nkpa ɓaangbo áɔphɛka gǔ í. Cɔ, nkpa na nkpa éɛnjiɛ gǎkɛ ánjá, k'etéte á mɔphɛkɔ nde aɔphɛka.

¹¹ Nga, ɛtɛ á kpanga á mɔphɛkɔ a ye ɓei, ande gea Yéso Kiísito. Nna ye na nkpa nde aɔtɔka n'abisi nɛngbo.

¹² Cɔ, ɓakpa ɓuangbo ɓáɔphɛka gǔ á ɛtɛ ndɔ na láté, ngɔa, ɛtɛ á esombi akpɛ, me, kasa na manganga.

¹³ Cɔ, k'ésa á tena á nyɔngɔ, etéte á ekuma ndea nkpa na nkpa aɔnɛkanande base. Esa ndɔ, aɓande na nsa, nsa ndɔ unge, aphangiande base etéte á ekuma ndea nkpa na nkpa.

¹⁴ Aoɓá ekuma á mɔphɛkɔ ndea nkpa na kásiɗi, nkpa ndɔ atɔande ophendɔ.

¹⁵ A gǎkɛ oɓá ekuma ndea nkpa n'asiɗi, aɓúngisande ophendɔ. Yɛ, aamande ɓea nkpa nde aóloki ka nsa.

¹⁶ Cɔ, ɓókóoúba gea, ɓonde endu ndea Mokonga, na Měma á Mokonga a suɓi anu?

¹⁷ Aoɓá nkpa n'atúkatúki endu ndea Mokonga, Mokonga antúkatúkande nga, endu ndea Mokonga ande ɔma á kanga á ɓojeɗe, na ɓenu ɓáunge ɓonde endu ndɔɔ.

¹⁸ Cɔ, nkpa kědemɛ mɔnɔ sasakɛ. Aoɓá ka ɓenu moci n'aokanisia te, ande mɔɔngɛ á ka mokonda nde, áɓɛ mbóbó ka gea, áɓɛ ye tɔ mɔɔngɛ ɗoni.

¹⁹ Nga, kɔɓɔɔngɛ ndea ka mokonda nde, ande kobóbó mosá á Mokonga. Cɔ, ɓáɗundu suɓi á Ɓuku á Mokonga ɓe: «Mokonga aǒkoɗa ɓato á kɔɓɔɔngɛ ka mɛ̌kɔ nɛɓɔ sasaɓɔ.»

²⁰ Goto: «Mɔkɔta aoúba kanisia ndea ɓato á kɔɓɔɔngɛ, aoúba gea, a tɔ jǎi-jǎi.»

²¹ Cɔ, nkpa kaébebɛmbɛ ka phɔa á ɓakpa nga, kema bui ande anu.

²² Nanga áɓá Pɔ́lɔ, áɓá Apɔ́lɔ, áɓá Pɛ́tɛɛ, nanga á ɓá mokonda, áɓá enda, áɓá kukuwa, nanga áɓá matú á kɛ̌kɛ, áɓá matú nde abikaeka, kema bubui ande anu.

²³ Cɔ, ɓenu, ɓonde gǎkɛ ɓakpa ndea Kiísito, Kiísito n'ande ɓa Mokonga.