1 Ɓakɔlítɔ 2 - Ɔngana á Kɛ̌kɛ

Pɔ́lɔ aɔtɔmiaga nyɔngɔ á Kiísito mmbé ɓánkɔkɛigi ka moyangɔ

¹ Cɔ, ɓaya, mbenɔ nde eme, ɗéjú mɔtɛ-anu ka tɔ̌mia anu nyɔngɔ nde Mokonga ɗásɔmi, ɗékéyɔngi nyɔngɔ akpɛ ka engekisa í na ɗékéyɔngi na kɔɓɔɔngɛ phɛɛ.

² Ɓî ɗétú sɔsɔɓɛ anu, ɗékékondi gǎkɛ néúbɛ nyɔngɔ nɛngbo na nna tɔndɔ nyɔngɔ á Yéso Kiísito, mmbɔ ɗáɓámowe ka moyangɔ.

³ Kaɓondɔ, mbenɔ nde eme ɗéjú mɔtɛ-anu, ɗékétú na ɓukpɛkpɛ, néoɓá na kɔɓɔɓɔkɔ, nyama áɔmɔsɔka.

⁴ Ɓɔphɛi nɛmɔ na goisaga nɛmɔ, ɗékétú ogea ú ka ɓɔngaga anu na kɔɓɔɔngɛ á kokpa. Ɗé ndiu onógoisaga ka ɓukpɛkpɛ phɛɛ á Měma á Mokonga.

⁵ Cɔ, cina á ɓeekea nɛnu, kaɓɛmbɛ mɔnɔ ka kɔɓɔɔngɛ á kokpa, áɓɛ ndiu ka ɓukpɛkpɛ phɛɛ ndea Mokonga.

Kɔɓɔɔngɛ ndea Mokonga

⁶ Cɔ, nɛ tɔ ɔphɛa kɔɓɔɔngɛ ka ɓakpa nde ɓámɔti ka ɓeekea. Kɔɓɔngɛ ndɔ nna gǎkɛ á ka mokonda ndee, nna phɔtɔ á kɔkɔta á ka mokonda nde nnde aújukanande.

⁷ Nɛɔphɛa kɔɓɔɔngɛ á ɓɔsɔmɛa ndea Mokonga, nnde ɗáɓásɔmi ka ɓakpa. Nga, ɗáangi moangɔ á kɔɓɔɔngɛ ndɔ mosá á conjá á mokonda ka gea, ɓéɓɛ na ɓoombia nɛkɛ.

⁸ Nna tanda na ka moamɛ á ka mokonda nde mmbé ɗáúbi kɔɓɔɔngɛ kau. Ɗáɓátúoúba, ámbé ɗáɓákánkɔkɛigi Mɔkɔta á ɓoombia ka moyangɔ.

⁹ Cɔ, a gǎkɛ tɔ ɓíndɔ Ɓuku á Mokonga ayɔngi gea: «Kema nde nkpa káɔnimbɛ mɔnɔ na ɔ́ka í nnde ka nkpa kákanisimbɛ mɔnɔ ú aunge Mokonga ɗáɓɔngisigi ka ɓakpa nde ɓánkondi.»

¹⁰ Cɔ, Mokonga ɗásóphangi gǎkɛ base nyɔngɔ á ɓɔsɔmɛa ndɔ ka ɓukpɛkpɛ á Měma akɛ. Nga, Měma ndɔ aunge aokáɓa cina á nyɔngɔ bui, nanga áɓá kema nde ɛ̌sɔmɛani phɛɛ suɓi á Mokonga.

¹¹ Cɔ, ani mmbé aoúba nyɔngɔ á ka měma á dakɛ? Měma á nkpa sasakɛ tɔ unge aoúba. A phɔtɔ ɓó ka Mokonga. Nkpa nnaoúba nyɔngɔ á suɓi á Měma á Mokonga, na nna tɔndɔ Měma akɛ sasakɛ.

¹² Ɓesu, ɓékétɔi měma á ka mokonda ndee, ɓɛtɔi ndiu Měma nde atóki mɔtɛ á Mokonga ka gea, ɓéúbɛ kema bui nde ɗásóphi ka ɓonjánja-ékondi ndea Mokonga.

¹³ Ɓéké ɔphɛa ú na yɔnga á kɔɓɔɔngɛ á kokpa, ɓe ndiu ɔphɛa na yɔnga nde Měma á Mokonga aosópha. Kaɓondɔ, ɓɛɔyɔnga nyɔngɔ á ka phɔa Měma á Mokonga na ɓakpa nde ɓá tɔ na Měma á Mokonga.

¹⁴ Nkpa nde aseɓei tɔ ebigɔ nɛkɛ á kokpa, nnaɔtɔka n'aɓeeki nyɔngɔ nde atóki ka Měma á Mokonga. Nyɔngɔ ndɔ ande kobóbó ka yɛ. Nkpa ndɔ nnaɔtɔka n'aengekisi nyɔngɔ ndɔɔ. Nga, Měma á Mokonga tɔ unge aosópha aphe á tena á nyɔngɔ ánjá.

¹⁵ Nkpa nde ana Měma á Mokonga, aɔtɔka n'ateni nyɔngɔ bui. Nkpa nna gǎkɛ ɔtɔka n'ateni nyɔngɔ nɛkɛ.

¹⁶ Ɓáɗundu suɓi á Ɓuku á Mokonga ɓe: «Ani mmbé aoúba kanisia ndea Mɔkɔta? Ani mmbé aɔtɔka n'amphɛí?» Ɓesu ɓe gǎkɛ na kanisia nde atóki ka Kiísito.