1 Ɓakɔlítɔ 16 - Ɔngana á Kɛ̌kɛ

Kɔngɔɛa á ɓakiísito á ka Yɛusalɛ́ma nkumba

¹ Cɔ, ka moangɔ á kɔngɔa kema ka ɓaɓêki á ka Yɛusalɛ́ma, geani phɔtɔ ɓó ɓíndɔ ɗéněngoɗi Ɓagalatía.

² Esa á yenga bubui, nkpa na nkpa ábisɛ ka mpɛphɛ, phaeka á imɔna nde aně mɔtɛ-akɛ, ka ɓeana n'ɛtɔi nɛkɛ ka gea, ɓókókaɓɛgɛ mɔnɔ ye imɔna mbenɔ nde nekiɗiande.

³ Mbenɔ nde neokiɗia, nětekande ɓakpa nde ɓɔ̌sɔmbu na ɓaoɓa á gɛndɛanu na keɓu nɛnu na Yɛusalɛ́ma.

⁴ Aoɓá n'akeni k'éme gǎ, ámbé negande phɔtɔ na ɓɔ kimoci.

Moangɔ á tamba ndea Pɔ́lɔ

⁵ Nejúande mɔtɛ-anu ka nyɛ́nyɛa nci á Makɛdɔnía nga, netingande ú.

⁶ Neoúba te neikande na ɓenu mɔtɛ-anu ka ɓ'esa ábɔa ka ɓɛjɔ. Mpɔ, ɓômoenga ka tútuisa tamba nɛmɔ.

⁷ Kékondi gǎkɛ nyɛ́nya anu mpongo. Ka ɓondo unge nenyɛ́nyisande ɓ'esa kimoci na ɓenu aoɓá Mɔkɔta n'akondi.

⁸ Kaɓondo, neikande wani ka Ɛphɛ́sɔ na ka ɓî esa á Pantɛkɔ́tɛ ajúande.

⁹ Nga, Mokonga amokoɗei aphe ka bɛɗanaga ekuma ángbó nanga ɓaɓiɓia ɓáɓika.

¹⁰ Aoɓá Timɔtɛ́ɔ n'akiɗi, nseseani ánjá phɛɛ nga, a phɔtɔ ɔmbɛɗaneaga Mɔkɔta ɓea eme.

¹¹ Ka ɓenu moci kamɓɛnjiɛgɛ mɔnɔ. Ɓónengambɛ ánjá ka tútuisa tamba nɛkɛ na ɓujɛjɛ, ka gea, ámodondɛ nga, neomɓondeaga kimoci na ɓadani.

¹² Ka nyɔngɔ á dasu Apɔ́lɔ, ɗénɗengemisigi gea, ágɛ mɔtɛ-anu kimoci na ɓadasu ɓuangbo. Nna gǎkɛ na siki á gǎ kɛ̌kɛnde. Agande ka mbenɔ nde akondande.

Mɔkɔ na ɓɔphɛi á ka sungiaga

¹³ Phɛani tɔ̌, ósimbiani ka ɓeekea nɛnu. Ɓáni na nténdé na ɓukpɛkpɛ!

¹⁴ Geani kema bubui suɓi ékondi.

¹⁵ Ɓooúba gea Sɛtɛphána n'ekombo nɛkɛ ɓánde ɓakpa nde ɗáɓámɓeeki Kiísito k'ama mosá-mosá ka ntanga-nji ndea ka Akáya. Ɓɔ ɓáunge ɓáɔ̌bɛɗaneaga ɓaɓêki. Ɓaya, nenóɗengemisigi gea,

¹⁶ ɔ́ɓɔ́kani ɓakpa ɓea ɓundɔ. Óɓeani phɔtɔ ɓakpa ɓɔbu ɓunde ɓáosuia bɛɗaneaga á Mɔkɔta ɓea ɓɔ.

¹⁷ Nena maseye ka kiɗia á Sɛtɛphána, Phɔɔtunátɔ na Akaíkɔ. Nga, ɓánɔpɛni ye tɔ.

¹⁸ Nga, ɓáphɔngisi měma ani sumɓî ɗáɓáphɔngisi měma anu. Óbebani ɓakpa ɓea ɓundɔ.

¹⁹ Ɓato á ka kanisa á ka Asía ɓánósesi. Akíla na Pisíla na ɓaɓêki ɓuangbo ɓunde ɓáodondanaga mɔtɛ-aɓɔ, ɓánósesi k'ína á Mɔkɔta.

²⁰ Ɓadani ɓɔbu ɓunde ɓá wani, ɓanósambei. Seseanagani suɓi á ekondi á Kiísito, ɓókotoanɛgɛ ka komunamema.

²¹ Eme Pɔ́lɔ aámbé neɗundu nsesɔ ndee na njaga ani sasani.

²² Aoɓá nkpa na kánkondi Mɔkɔta, ambe ɓánsɛmɛɛgɛ! Mɔkɔta nɛsu bika!

²³ Ɓonjánja-ékondi ndea Mɔkɔta Yéso áɓɛ na ɓenu!

²⁴ Nenókondi ɓenu ɓɔbu k'ína á Kiísito Yéso.