1 Ɓakɔlítɔ 15 - Ɔngana á Kɛ̌kɛ

Yéso ajujúki ka kukuwa

¹ Ɓaya, nekondi goto nénókanisiɛ Mbino-Ánjá nde ɗénɔtɔ̌migi. Ɗóɓoɓeeki ú, na ka kɛ̌kɛnde, ɓo phɔ́tɔ oamba ú.

² Mbino-Ánjá ndɔ, ande phɔtɔ aphe á ɓoamia anu ka měma, aoɓá na ɓodungi ánjá ka měma ɓíndɔ ɗénɔtɔ̌mi. Kaɓɛ na nna ɓó, ámbé ɓeekea nɛnu a tɔ jǎi.

³ Ɗɛ́nɔphɛí phɔ́ ɓɔphɛi nde eme sasani ɗáɓámɔphɛí. Ɓɔphɛi kau aɓe: Kiísito ɗáku ka nyɔngɔ á ɓojeɗe nɛsu ɓíndɔ ɗáɓáɔtu suɓi á Ɓuku á Mokonga.

⁴ Ɗáɓámúmbi, esa á ko isaɔ, áojujuka ka kukuwa ɓíndɔ ɗáɓáɔtu suɓi á Ɓuku á Mokonga.

⁵ Áɔnsɛnɛkɛa Pɛ́tɛɛ, mpɔ áɔ̌sɛnɛkɛa ɓateki nkama na ɓaɓɛ (12).

⁶ Mbusa índɔ, áɔ̌sɛnɛkɛa mɔngɔ ímoci ɓadasu ɓaɓêki kɔnyɛ́nya ɓagoigi mia ɓɔku (500). Ɓakpa ndɔ, ɓásii sɔsɔɓɛ aɓɔ ɓá phɔ́tɔ ɓei na ɓunɛngbo gǎkɛ ɓáku.

⁷ Mbusa, áɔnsɛnɛkɛa Yakɔ́ɓɔ, mpɔ ka ɓateki ɓɔbu.

⁸ Mbusa aɓɔ ɓɔbu, áɔmɔsɛnɛkɛa phɔtɔ eme ímbɔ ne ɓea miki n'akɔɗɔki

⁹ nga, nende miki sɔsɔɓɛ á ɓateki ɓɔbu. Kékeni tanda, ɓámɔɔphanɛ nteki ka nyɔngɔ nde ɗétambisigi kanisa ndea Mokonga.

¹⁰ Ka nyɔngɔ á ɓonjánja-ékondi ndea Mokonga, ne ye gǎkɛ ɓíndɔ nekau. Ɓonjánja-ékondi nɛkɛ ndɔ, ɗákátú jǎi, ɗɛ́nɛbɛɗanigi phɛɛ kɔ̌nyɛ́nya ɓateki ɓunɛngbo ɓɔbu. Kɛ́bɛɗanigi gǎkɛ na ɓukpɛkpɛ ani, a ndiu ka ɓukpɛkpɛ á Mokonga, nnde a suɓi ani.

¹¹ Cɔ, kaɓɛ eme, kaɓɛ ɓateki ɓuangbo, nyɔngɔ nde ɓɛɔtɔmiaga aungɔ. Na nndɔ unge ɗóɓóɓeeki.

Jujúka ka kukuwa

¹² Cɔ, kaɓɛ na ɓɛɔtɔmiaga gea, Kiísito ajujúki ka kukuwa, nyɔngɔ sina nde ɓakpa ɓunɛngbo sɔsɔɓɛ anu ɓáɔyɔnga gea te, ɓasí ɓákájujukaeka ka kukuwa?

¹³ Kaɓɛ ɓasí na ɓákájujukaeka ka kukuwa, ámbé Kiísito ɗákájujúki gǎkɛ ka kukuwa.

¹⁴ Kaɓɛ Kiísito na ɗákájujúki ka kukuwa, ɓɔphɛi nɛsu nna na kantíti na ɓeekea nɛnu a phɔtɔ kángá kantíti.

¹⁵ Aoɓá ɓasí na ɓákáojujuka ɗoni ka kukuwa, ande gea te, Mokonga ɗákánjujúkisi Kiísito ka kukuwa. Aoɓá ɓó, ámbé ɓende ɓaɗigimisi á mbɛa ndea Mokonga nga, ɗéɓeɗigimisi gea te, Mokonga ɗánjujúkisi Kiísito ka kukuwa.

¹⁶ Nga, aoɓá ɓasí na ɓákáojujuka ka kukuwa, Kiísito ɗákájujuki gǎkɛ ka kukuwa.

¹⁷ Kaɓɛ Kiísito na ɗákájujúki ka kukuwa, ɓeekea nɛnu nna na kantíti, goto ɓo phɔ́tɔ suɓi á ɓojeɗe nɛnu.

¹⁸ Ande goto gea, ɓakpa nde ɓáku na ɓámɓeeki Kiísito, ɓáɓúngigi.

¹⁹ Kaɓɛ na ɓenseɓei tɔ Kiísito ka nyɔngɔ á enda á kɛ̌kɛnde, ande gea, ɓende ɓato á ngomi phɛɛ kɔ̌nyɛ́nya ɓakpa ɓɔbu.

²⁰ Ande gǎkɛ ɗoni gea, Kiísito ajujúki ka kukuwa. Yɛ, ande ánge á ɓajujuki ka kukuwa.

²¹ Nga, ka nyɔngɔ á nkpa moci aunge kukuwa ɗábiki, a phɔtɔ ɓó unge, jujúka ka kukuwa ɗábiki ka nkpa moci.

²² A tɔ ɓíndɔ ɓakpa ɓɔbu ɓáokuwa ka nyɔngɔ nde, ɓájúkani na Adámu, a phɔtɔ ɓó unge ɓakpa ɓɔbu ɓunde ɓájúkani na Kiísito ɓáɓande na enda á kɛ̌kɛ.

²³ Cɔ, ɓejujukande gǎkɛ nkpa na nkpa ka mbenɔ nɛkɛ. Kiísito aámbé ɗájujúki ka kukuwa, ande ánge, mpɔ, ɓakpa nɛkɛ k'ésa nde yɛ abikaeka.

²⁴ Mbusa índɔ, áoɓá sungiaga, Kiísito atúkatúkande koɓoamɛ, kɔkɔta na ɓukpɛkpɛ bui. Mpɔ, áonsikisia Abɛ Mokonga koɓoamɛ.

²⁵ Nga, akeni Kiísito ámameɛ nji bubui na ka ɓî Mokonga aebisande ɓaɓiɓia nɛkɛ ɓɔbu kusi écinji akɛ.

²⁶ Mɓiɓia á ka sungiaga, ka túkatúka akɛ, ande kukuwa.

²⁷ Nga, Ɓuku á Mokonga agi ɓe: «Mokonga ɗábisi kema bubui kusi á ecinji akɛ.» Ande gea, suɓi á nyɔngɔ nde: «kema bubui» Mokonga nna kusi á Anakɛ. Mokonga abisi ndiu kema bubui ka njaga á Kiísito.

²⁸ Mbusa, ɓî Mokonga abisande kema bui kusi á kɔkɔta ndea Kiísito, Kiísito sasakɛ ěbisande kusi á Abakɛ, mmbé ɗábisi kema bubui kusi á Kiísito. Mpɔ, Mokonga aɓande ye tɔ moamɛ gǔ á kema bubui.

²⁹ Cɔ, aoɓá ɓasí na ɓákájujukɛku ka kukuwa, ka nyɔngɔ eke nde, ɓáǒɓatisa ɓakpa ɓuangbo ka nyɔngɔ á ɓakpa nɛɓɔ ɓunde ɓasí? Aoɓá ɓasí na ɓákáojujuka ka kukuwa, ka nyɔngɔ éke nde ɓakpa ɓunɛngbo ɓáǒɓatisa k'ɔ́ma á ɓadaɓɔ íɓundɔ ɓasí?

³⁰ Cɔ, ɓesu, ka nyɔngɔ sina nde ɓeǒmakea ka kukuwa mbenɔ bui?

³¹ Ɓaya, esa bui neoóloka ka kukuwa. Nndɔ ande ɗoni, phɔtɔ ɓíndɔ neǒbeba ka nyɔngɔ anu ka júkana anu na Kiísito Yéso Mɔkɔta nɛsu.

³² Cɔ, atú oɓá na ɗémani na ɓanyama á kae-kae ka Ɛphɛsɔ ka nyɔngɔ á kokpa, ekende nɛtɔi kau? Kaɓɛ ɓasí na ɓákáojujuka ka kukuwa, a tɔ ɓíndɔ ɓáyɔngi ka mɛní gea: «Ɓéɛgɛni na ɓénoɛni nga, mama, ɓekuwande.»

³³ Ɓókǒdemisɛmbɛ: «Támbágá na ɓakpa ɓájeɗe aomúja nkpa.»

³⁴ Cɔ, sikiani kanisia ánjá, ɓóɗeketɛ ɓojeɗe. Ɓakpa ɓuangbo sɔsɔɓɛ anu ɓánáomúba Mokonga. Nɛyɔngi ɓó ka kusa anu na soni.

Nyama á jujúka ka kukuwa

³⁵ Cɔ, nkpa a gǎkɛ ɔtɔka n'aúsi gea: «Ɓakpa nde ɓaku, ɓájujukande ka kukuwa ɓo? Nyama aɓɔ aɓande ɓo?»

³⁶ Mbóbó nde ca! Ɓî ookona mbó, nnaɔtɔka n'atɛi na kákumbɛ phɔ́.

³⁷ Kema nde ookona, a tɔ mbó, kaɓɛ mbó á nganɔ, kaɓɛ mbó nɛngbo sina, nna gǎkɛ me í, nnde áɔtɛa aunge ookona.

³⁸ Cɔ, Mokonga aobisa nyama ka mbó ndɔ ɓíndɔ akondi, ka tɛisa á me. Mbó bubui, a tɔ na me nɛkɛ sasakɛ.

³⁹ Nyama á ɓakpa ɓɔbu nna kimoci. Nyama á ɓakpa atingani na nnde á ɓanyama, nnde á ɓambǔ atingani na nnde á ɓasú.

⁴⁰ A phɔtɔ na nyama á na koba na nyama á ka mokonda. Ɓoombia á nyama á na koba atingani na ɓoombia á nyama índe á ka mokonda.

⁴¹ Bɛnya á maní atingani na bɛnya á songe, â phɔtɔ otingana na nnde á ɓasɛɛngɔa. Sɔsɔɓɛ a ɓasɛɛngɔa, bɛnya aɓɔ atinganigi phɔtɔ.

⁴² Aɓáeka tɔ ɓondɔ ɓî ɓasí ɓájujukaeka ka kukuwa. Nkpa nde aokuwa, ɓáomúmba, mǒnda akɛ áophoa. A ye gǎkɛ ojujuka ka kukuwa, káphoɛku ye.

⁴³ Mbenɔ nde ɓáoúmba mǒnda, kaɓɛ na ɓoombia na ɓukpɛkpɛ. A ye ojujuka ka kukuwa, áoɓá na ɓoombia na ɓukpɛkpɛ.

⁴⁴ Ɓáomúmba n'ana nyama á ka mokonda, áojujuka na nyama nde ana enda. Ɓî ɓena nyama á ka mokonda, ɓeɓaeka phɔtɔ na nyama nde ana enda.

⁴⁵ Cɔ, ɓáɗundu suɓi á Ɓuku á Mokonga ɓe: «Nkpa á k'ama mosá-mosá, ina akɛ Adámu. Mokonga ɗámophi enda.» Kiísito ande gǎkɛ Adámu nde ɓa mbusa. Měma akɛ unge aobikisa enda.

⁴⁶ Nna nyama nde ana enda aunge aokpanga. Nyama á ka mokonda ndiu unge aokpanga, mpɔ nndɔ ana enda áobika mbusa.

⁴⁷ Mokonga ɗánconji nkpa ɓa k'ama mosá-mosá na oɗo. Nkpa ɓa ko baɓɛ, Kiísito ɗátóki gǎkɛ na koba.

⁴⁸ Ɓato á ka mokonda ɓákengeani na mmbɔ Mokonga ɗánconji na oɗo. Ɓato á na koba, ɓákengeani gǎkɛ na mmbɔ ɗátóki na koba.

⁴⁹ Ɓî ɓekengeani phɔ́ na nkpa nde ɗáɓánconji na oɗo, ɓekengeanande phɔtɔ na mmbɔ á na koba.

⁵⁰ Ɓaya, negie: Nnde ɓáconji na nyama na magia nnaɔtɔka n'angí ka koɓoamɛ ndea Mokonga, na kema nde aoújukana, nnaɔtɔka n'aiki kanga újukana.

⁵¹ Ɔ́kani phɔ́, nénoúbisɛ nyɔngɔ á ɓɔsɔmɛa: Ɓékésiɛku ɓesu ɓɔbu, ɓěketiande ndiu ɓesu ɓɔbu,

⁵² ka mbenɔ moci ɓea nkpa n'aogbeɗua, ɓî ɓásúande mbengu á sungiaga. Nga, ɓɛɔ́kande ɛsɔ á mbengu, ɓasí ɓɔbu ɓájujukande ka kukuwa, ɓáoɓá na nyama, nnde kákuwɛku. Ɓesu ɓɔbu ɓěgaiande.

⁵³ Nga, nyama nde aphoande, akeni áɓɛ nnde nnaophoa. Nyama nde aokuwa, aɓande na enda á mɛyɔ.

⁵⁴ Mbenɔ nde ɓakpa nde ɓá na nyama nde aophoa, ɓî ɓá ye na nyama á kɛ̌kɛ, na ɓunde ɓáokuwa ɓá ye na enda á mɛyɔ, wandɔ, nyɔngɔ á Ɓuku á Mokonga atɔtɔkɛanande ɓíndɔ ayɔngi: «Kukuwa así, Mokonga atɔki.

⁵⁵ Kukuwa, ɓukpɛkpɛ akɔ á kinda asuani? Kukuwa, ɓukpɛkpɛ akɔ á mowa asuani?»

⁵⁶ Nga, ɓukpɛkpɛ á mowa aotóka ka ɓojeɗe, na ɓojeɗe ana ɓukpɛkpɛ ka ɓeana n'ɛ́ɔphi ndea Mósa.

⁵⁷ Cɔ, ɓosegi ka Mokonga nga, asóphi ɓukpɛkpɛ á tɔka á kukuwa k'ína á Mɔkɔta nɛsu Yéso Kiísito.

⁵⁸ Kaɓondɔ, ɓadani ékondi, mamani na ɓukpɛkpɛ, ɓóósimbiɛ. Tútuisani ekuma ndea Mɔkɔta esa bui. Úbani phɔtɔ gea, ekuma nɛnu ka Mɔkɔta nna jǎi.