1 Ɓakɔlítɔ 14 - Ɔngana á Kɛ̌kɛ

Egabɔ á Měma á kanga ɓojeɗe ka ɓakpa ɓɔbu

¹ Káɓágani phɔ́ ekondi. Bisani mɔphɛ anu k'égabɔ ɗanga-ɗanga á Měma á Mokonga kɔnyɛ́nya bui. Bisani mɔphɛ anu k'égabɔ á ɔtɔa á nyɔngɔ nde atóki ka Mokonga.

² Mmbé aɔyɔnga ɛyɔngi nde ɓakpa ɓánáoúba, nnaɔyɔnga na ɓakpa, a ndiu ɔyɔnga na Mokonga. Nga, nna na nkpa nde aoengekisa nyɔngɔ nde aɔyɔnga. Aɔyɔnga kema á ɓɔsɔmɛa ka ɓukpɛkpɛ á Měma á Mokonga.

³ Nkpa nde a gǎkɛ ɔɔtɔa nyɔngɔ nde atóki ka Mokonga, aɔmɔtisaga ɓeekea ndea ɓakpa, gbagisaga á měma, na phɔngisa á měma aɓɔ.

⁴ Nkpa nde aɔyɔnga k'ɛyɔngi nde nnaoúbukana, aɔmɔtisaga ɓeekea nɛkɛ sasakɛ. Mmbé gǎkɛ aɔɔtɔa nyɔngɔ nde atóki ka Mokonga, aɔmɔtisaga ɓeekea á ɓato á kanisa ɓɔbu.

⁵ Nekondi gea, ɓenu ɓɔbu ɓɔ́yɔngɛ ka ɛyɔngi nde nnaoúbukana. Nekondi gǎkɛ phɛɛ gea, ɓɔ́ɔtɔɛ nyɔngɔ nde atóki ka Mokonga. Ka nyɔngɔ nde, nkpa nde aɔɔtɔa nyɔngɔ nde atóki ka Mokanga, mmbɔ ana kantíti phɛɛ kɔnyɛ́nya nkpa nde aɔyɔnga ɛyɔngi nde nnaoúbukana. Nkpa ndɔ a tɔ na kantíti ámbé nkpa nde aoketia ɛyɔngi ndɔ aɓei, ka mɔtisaga á ɓeekea á ɓato á kanisa ɓɔbu.

⁶ Cɔ, ɓaya, mbenɔ nde nejúande mɔtɛ-anu, nɛ̂ tɔ ɔyɔngaga na ɓenu ka ɛyɔngi nde nnaoúbukana, neɓande na kantíti ka ɓenu ka kema sina? Neɓande tɔ na kantíti ámbé nɛɔnɔ́tɔmia kema á ɓɔsɔmɛa ndea Mokonga, nyɔngɔ á úbapha, ɔtɔa á nyɔngɔ nde atóki ka Mokonga na ɓɔphɛi.

⁷ Ɔ́nani phɔ́ kema ɓea ɓaphíí na mbengu, kaɓɛ ɛsɔ í na nnaojúana ánjá, cɔ, ɓáengekisande ɛsɔ á embɔ kau ɓo? Gea, kaɓɛ n'ande ɓaphíí, kaɓɛ n'ande mbengu.

⁸ Aoɓá nkpa n'asú mbengu á emani, ɛsɔ kau na káúbukani base, ani mmbé ɛ̌ɓɔngisagande k'émani?

⁹ Ɓenu gǎkɛ, ɓoengekisande nyɔngɔ nde ɓɔɔyɔnga ka ɛyɔngi nde nnaoúbukana ɓo, aoɓá na nna base? Ɓo tɔ ɔyɔnga kángá á kantíti.

¹⁰ Ɛyɔngi ɗanga-ɗanga aɓiki ka mokonda, nna gǎkɛ na kau nde nna na kantíti.

¹¹ A gǎkɛ oɓá na kéoúba kantíti á ɛyɔngi, nkpa nde aɔyɔnga ɛyɔngi ndɔ, aɓande k'éme mɔkɛni, nê phɔtɔ oɓá mɔkɛni ka yɛ.

¹² A phɔtɔ ɓó ka ɓenu, ɓî ɓokondi phɛɛ nyɔngɔ á egabɔ ɗanga-ɗanga á Měma á Mokonga, káɓáni phɔ́ phɛɛ egabɔ ndɔ aɔmɔtisa ɓeekea á ɓato á ka kanisa.

¹³ Ka nyɔngɔ índɔ unge, nkpa nde aɔyɔnga ɛyɔngi nde nnaoúbukana, ámɛmɛ Mokonga gea, yɛ nkpa ndɔ áɓɛ phɔtɔ na egaɓɔ á kětia á ɛyɔngi ndɔ ayɔngi.

¹⁴ Nga, aoɓá na nɛɔmɛma Mokonga k'ɛyɔngi nde nnaoúbukana, měma ani tɔ unge aɔmɛma, úbapha ani nna gǎkɛ ɔbɛɗanaga.

¹⁵ Cɔ, négeɛ ɓo? Nɛmɛmande Mokonga ka měma ani, phɔtɔ na ka úbapha ani. Neembande ka měma ani, nê phɔtɔ oemba ka úbapha ani.

¹⁶ Aoɓá n'ɔtɔ ɔmɛma Mokonga ka měma akɔ ka sega akɛ, ɓadakɔ íɓunde ɓákáoengekisa nnde ɔɔyɔnga, ɓákáɓeekeɛku «áɓɛ ɓó» ka ɛmɛmi nɛkɔ á ɓosegi nga, ɓákáoengekisa ɛyɔngi nɛkɔ.

¹⁷ Eya, nanga ɛmɛmi nɛkɔ á ɓosegi áɓá ánjá, kátɔkɛku gǎkɛ n'ɛ̌mɔtisigi ɓunɛngbo ka ɓeekea.

¹⁸ Nensegi Mokonga nga, nɛɔyɔnga ɛyɔngi ɗanga-ɗanga nde nnaoúbukana, kɔnɔnyɛ́nya ɓenu ɓɔbu.

¹⁹ Cɔ, suɓi á kanisa mosá á ɓaɓêki, nekondi nɛ́yɔngɛ nyɔngɔ ɓɔku, nnde ɓakpa ɓáoúba, ka gea, négoisɛgɛ ɓakpa ɓunɛngbo, na nɛkɛyɔngi nyɔngɔ ɛlɛphu nkama (10.000) k'ɛyɔngi nde nnaoúbukana.

²⁰ Ɓaya, kanisia anu káɓɛ́ mɔnɔ ɓínde á ɓaniki. Ɓáni ɓaniki ka ɓojeɗe, ɓóɓɛ gǎkɛ ɓagbɛga ka kanisia anu.

²¹ Ɓáɗundu suɓi á Ɓuku á Mokonga ɓe: «Mɔkɔta agi, neéngoɗeande ɓato á k'ékuna nde yɔnga na ɛyɔngi á ɓato á k'ékuna nengbo gea, nɛyɔngande na ɓɔ k'ɛ́sɔ á ɓato á k'ékuna nɛngbo. Nanga ɓákákóndɛku ɔ́ka ani.»

²² Nga, egabɔ á yɔnga ka ɛyɔngi nde nnaoúbukana, ande mphangiɔ ka ɓunde ɓákámɓeeki Mokonga, nna gǎkɛ ka ɓaɓêki. Egaɓɔ á ɔtɔa á nyɔngɔ nde atóki ka Mokonga, ande mphangiɔ ka ɓaɓêki, nna ka ɓundɔ ɓákáɓeeki.

²³ Aoɓá ɓato á ka kanisa ɓɔbu na ɓádondanigi, ɓâ tɔ ɔyɔnga ka ɛyɔngi nde nnaoúbukana, cɔ, ɓakpa jǎi-jǎi na ɓunde ɓáká ɓaɓêki na ɓá ɓei, ɓákágeɛku te, ɓoyaí?

²⁴ Cɔ, kaɓɛ gǎkɛ ɓakpa ɓɔbu na ɓáɔɔtɔa nyɔngɔ nde atóki ka Mokonga, nkpa jaǐ-jǎi na mmbé nna mɓêki n'angi, aengekisande ɓojeɗe nɛkɛ ka nyɔngɔ ndɔ aɔɔ́ka. Ɓátenande nyɔngɔ nɛkɛ ka ɓeana na nnde aɔɔ́ka.

²⁵ Nga, kema nde aɛsɔmɛani ka měma akɛ, aúbukanande base. Kaɓondɔ, agbúkande muanku akɛ mosá á Mokonga, keongi akɛ áogbondoa oɗo ka beba á Mokonga, áɔyɔnga gea: «Eya, Mokonga a ka ɔlɔ anu.»

Moangɔ á suɓi á kanisa

²⁶ Cɔ, ɓaya, négeɛ ɓo? Mbenɔ nde ɓoodondanaga, nkpa moci aɔtɔka n'aembi, moci áɔphɛa, moci áɔɔ́tɔa kema á ɓɔsɔmɛa ndea Mokonga, moci áɔyɔnga ka ɛyɔngi nde nnaoúbukana, moci n'aoketia nyɔngɔ ndɔɔ. Nndɔ bui ágeanɛ ka mɔtisaga á ɓeekea ndea ɓato á ka kanisa.

²⁷ Aoɓá ɓakpa na ɓáɔyɔnga ka ɛyɔngi nde nnaoúbukana, akeni ɓáɓɛ ɓakpa ɓaɓɛ, kanyɛ́nyɛ mɔnɔ ɓakpa ɓasaɔ. Ɓáyɔngɛ gǎkɛ moci-moci, na nkpa moci áɓɛoketia nyɔngɔ ndɔ ɓáɔyɔnga.

²⁸ Aoɓá nketi-nyɔngɔ na nna ɓei, ɓakpa ndɔ ɓɔbu ɓádakanɛ suɓi á kanisa. Nkpa ndɔ áyɔngɛ tɔ ka měma akɛ sasakɛ ka yɛ sasakɛ na ka Mokonga.

²⁹ Aoɓá ɓaɔtu-nyɔngɔ ndea Mokonga, akeni ɓáɓɛ ɓakpa ɓaɓɛ, kaɓɛ ɓakpa ɓasaɔ, ɓakpa ɓunɛngbo ɓáianɛgɛ ámbé ɓáɔyɔnga ánjá, kaɓɛ na ɓáɔyɔnga ájeɗe.

³⁰ A gǎkɛ oɓá nkpa moci n'aɔni kema á ɓɔsɔmɛa ndea Mokonga, ambe nkpa ndɔ aɔyɔnga ádakanɛ.

³¹ Ɔ́tɔani nyɔngɔ nkpa moci-moci gea te, ɓakpa ɓɔbu ɓágoɛgɛ na ɓágbagɛgɛ ka měma.

³² Akeni mɔtu-nyɔngɔ ndea Mokonga áúbɛ éamba k'égabɔ ndɔ Měma á kanga ɓojeɗe amophi

³³ nga, Mokonga nna nto á eongo, a ndiu nto á ɓujɛjɛ. A tɔ ɓó ka kanisa bubui ndea ɓaɓêki ndea Mokonga.

³⁴ Akeni ɓake ɓádakanɛ suɓi á kanisa. Ɓánáɔtɔka na ɓáesósi gea, ɓáyɔngɛ. Ɓáikɛ kusi á kɔkɔta ɓíndɔ ɛɔphi ndea Mokonga ayɔngi.

³⁵ Ɓá ye oɓá na músiɔ, ɓéúsiɛ ɓamunyaɓɔ k'éndu. Nga, ande soni ka nke yɔnga suɓi á kanisa.

³⁶ Cɔ, nyɔngɔ á Mokonga ɗátóki mɔtɛ-anu, kaɓɛ ɓenu sasanu tɔ ɓáunge ɗɔɓɔtɔi?

³⁷ Aoɓá nkpa n'aokanisia te, ande mɔtu-nyɔngɔ ndea Mokonga, n'ana egabɔ ndea Měma á kanga ɓojeɗe ambe áúbɛ base gea te, kema nde nenóɗundui ande ɛɔphi ndea Mɔkɔta.

³⁸ Aoɓá gǎkɛ na káoúba, nɗeketani.

³⁹ Cɔ, ɓaya, bisani phɔ́ mɔphɛ anu phɛɛ k'égabɔ á ɔtɔa á nyɔngɔ nde atóki ka Mokonga. Ɓókóimisiɛmbɛ gǎkɛ egabɔ á yɔnga ka ɛyɔngi nde nnaoúbukana.

⁴⁰ Ambe kema bui ágeanɛ ndiu ka moangɔ ánjá na ɓíndɔ akeni.