1 Ɓakɔlítɔ 13 - Ɔngana á Kɛ̌kɛ

Ekondi anyɛ́nyi kema bubui

¹ Nanga nɛ́yɔnga na ɛyɔngi ɗanga-ɗanga ndea ɓakpa, na nnde á ɓamalaéka, na ké gǎkɛ n'ekondi, ɛsɔ ani a ɓea ayomɛ n'ɔkɔtɔ.

² Nanga néɓá n'egabɔ á ɔtɔa nyɔngɔ á Mokonga, nanga néúba nyɔngɔ á ɓɔsɔmɛa bui, nanga néɓá na úbapha bui, nanga néɓá na ɓeekea nde aɔtɔka na toisi mamba, na ké gǎkɛ n'ékondi, ne tɔ nkpa jǎi.

³ Nanga négaba nkumba nɛmɔ bui ka ɓato á ɓuyɛnɛ, nanga nétambisaga nyama ani ka nsa, na neǒbeba, na ké gǎkɛ n'ekondi, kɛ́tɔɛku ka kema ka phɔani.

⁴ Nto ékondi ana měma á phiphia kema bui, ande nkpa nde aǒenga ɓakpa, nna na nsengo, nna ǒɗokomisa, nnaǒbeba.

⁵ Nto ékondi nnaogea kema á soni, nnaokáɓa ɓokambia nɛkɛ sasakɛ, nnaɔɓɛa, nnaobisa ɓojeɗe nde ɓángi ně ka měma,

⁶ nna na maseye ka nyɔngɔ á kanga koɗoni, a ndiu na maseye ka nyɔngɔ á ɗoni.

⁷ Nto ékondi aogbukumia nyɔngɔ ájeɗe bui, ana ɓeekea ka kema bui, aoseɓea kema bui, aokinia kema bui.

⁸ Ekondi nnaosía. Ɔtɔa á nyɔngɔ á Mokonga, beba á Mokonga ka ɛyɔngi nde nnaoúbukana, asiande gǎkɛ. Úbapha asiande.

⁹ Cɔ, ɓékéoúba nyɔngɔ bui, ɓéké gǎkɛ ɔɔtɔa nyɔngɔ á Mokonga bui.

¹⁰ Mbenɔ nde kema bubui á kanga kisɛki aɓáeka, kema á kisɛki-kisɛki káɓɛeka ye gǎkɛ.

¹¹ Ɓî ɗétú miki, ɗɛ́ɔyɔnga ɓea miki, ɗéokanisia ɓea miki, ɗɛ́ɔbɛɗa nyɔngɔ ɓea miki. Cɔ, ɓî nɛmɔti ye, neɗeketi nyɔngɔ á koniki bui.

¹² Ka kɛ̌kɛnde, ɓɛɔmɔna Mokonga ɓea suɓi á kiyɔa, kángá engekisa akɛ. Mbusa, ɓɛmɔnaeka iso ka iso. Kɛ̌kɛnde, neomúba Mokonga ábɔa. Mbusa, nemúbaeka phɛɛ ɓíndɔ yɛ aomúba.

¹³ Kɛ̌kɛnde, kema isaɔ nde aunge aikande: ɓeekea, nseɓeɔ na ekondi. Nnde anyɛ́nyi gǎkɛ bui ande ekondi.