1 Ɓakɔlítɔ 12 - Ɔngana á Kɛ̌kɛ

Egabɔ ndea Měma á kanga ɓojeɗe

¹ Ɓaya, ɓɛ́yɔngɛni phɔ́ nyɔngɔ á egabɔ ndea Měma á kanga ɓojeɗe nga, nekondi ɓóengekisɛ ú ánjá.

² Ɓooúba gea, mbenɔ nde ɗóɓókómúbimbɛ Mokonga, nyɔngɔ á ɓamokonga á mbɛa ɓunde ɓánáɔyɔnga, ɗátúonóɓotea na ɓúngisaga anu.

³ Kaɓondɔ unge, nekondi ɓóúbɛ base gea, mmbé aɔyɔnga na ɓukpɛkpɛ á Měma á Mokonga nnaɔtɔka n'ayɔngi gea: «Ámbé ɓánsɛmɛigi phɔ́ Yéso.» Na nna na nkpa nde aɔtɔka n'ayɔngi gea: «Yéso ande Mɔkɔta», Měma á kanga ɓojeɗe na kángoisigi.

⁴ Cɔ, Měma á kanga ɓojeɗe a tɔ mo. Yɛ gǎkɛ tɔ aámbé aogaba egabɔ ɗanga-ɗanga.

⁵ Mɔkɔta a tɔ mo. Yɛ gǎkɛ tɔ aámbé ɓáɔmbɛɗaneaga ekuma ɗanga-ɗanga.

⁶ Mokonga a tɔ mo. Yɛ gǎkɛ tɔ aámbé aeɓophi ɓakpa ɓɔbu ɓukpɛkpɛ á tɔtɔkisa á ekuma ɗanga-ɗanga bui.

⁷ Cɔ, Ɓukpɛkpɛ á Měma á kanga ɓojeɗe aɔnɛkani ka nkpa na nkpa, ka ɓonjánja á ɓakpa ɓɔbu.

⁸ Měma á kanga ɓojeɗe aomopha nkpa egabɔ á yɔnga na kɔɓɔɔngɛ. Měma ndɔ tɔ, aomopha nkpa egabɔ á yɔnga nyɔngɔ á úbapha phɛɛ.

⁹ Měma ndɔ tɔ, aomopha nkpa moci ɓeekea, Měma ndɔ tɔ, aomopha moci ɓukpɛkpɛ á amisa á esambɔ ɗanga-ɗanga.

¹⁰ Aomopha nkpa moci, ɓukpɛkpɛ á tɔtɔkisa á ketangaɔ, moci, ɓukpɛkpɛ á ɔtɔa á nyɔngɔ ndea Mokonga, moci, ɓukpɛkpɛ á úba engekisa Měma Ánjá na měma ájeɗe, moci, ɓukpɛkpɛ á yɔnga ɛyɔngi nde ɓakpa ɓánáoúba, moci, ɓukpɛkpɛ á kětia á ɛyɔngi ndɔɔ.

¹¹ Cina á ɓukpɛkpɛ ndɔ bubui atóki ka Měma ndɔ a tɔ mo. Yɛ aámbé aongabea nkpa na nkpa egabɔ ndɔ ɓíndɔ akondi.

Gbútuka á nyama á nkpa atinganigi

¹² Eya, Kiísito a ɓea nyama á nkpa mo, nnde ana gbútuka ásii. Nanga gbútuka ndɔ áɓika, ajúkani tɔ ka ɓá nyama mo.

¹³ Ɓesu ɓɔbu, Ɓayúda na ɓunde ɓáná Ɓayúda, ɓakɔɓɛ na ɓunde ɓáná ɓakɔɓɛ, ɓásoɓatisi tɔ suɓi á Měma ndɔ tɔ moci ka gea, ɓéɓɛ ɓesu ɓɔbu ɓea nyama mo. Ɓesu ɓɔbu ɓenu tɔ iɓo á Měma ndɔ mo.

¹⁴ Cɔ, nyama á nkpa nna tɔ na gbútuka moci, a ndiu ně ásii.

¹⁵ Aoɓá ecinji n'agi: «Ka nyɔngɔ nde ké nɛmɔ njaga, cɔ, ké gbútuka á nyama.» Nndɔ nna gea te, nna gbútuka á nyama.

¹⁶ N'aoɓá kecue n'agi: «Ka nyɔngɔ nde ké iso, cɔ, ké gbútuka á nyama.» Nndɔ nna gea te, nna gbútuka á nyama.

¹⁷ Aoɓá nyama bui n'a tɔ iso, ɓɛɔ́kaphande ɓo? N'aoɓá nyama bui n'a tɔ kecue, ɓɛɔ́kande su á kema ɓo?

¹⁸ Cɔ, Mokonga ɗábisi gǎkɛ gbútuka á nyama moci-moci k'ɔ́ma nɛkɛ ɓíndɔ akondi.

¹⁹ Atúoɓá gbútuka á nyama bubui n'a tɔ moci, ámbé nyama nna ɓei!

²⁰ Kaɓondɔ, gbútuka á nyama aásii, nyama a gǎkɛ tɔ mo.

²¹ Iso nnaɔtɔka n'angi njaga: «Kéná siki akɔ.» Na mɔ̌, nna phɔtɔ ɔtɔka n'angi ecinji: «Kéna siki anu.»

²² Gbútu-gbútu á nyama nde aɔnɛkana kángá kantíti, nndɔ ndiu unge ana kantíti.

²³ Gbútuka á nyama nde ɓeokanisia gea, nna na ɓoombia, aunge ɓeoɗokomisa phɛɛ. Gbútu-gbútu á nyama nnde ande á soni, aunge ɓeoamba ú ánjá

²⁴ Gbútu-gbútu á nyama nde nna kɔsɔɔnisa soni, ɓékéɔtɔka na ɓeambi ú. Cɔ, Mokonga aámbé ajúki nyama ka gea gbútu-gbútu á nyama nde nna na ɓoombia áɓɛ ndiu na ɓoombia phɛɛ.

²⁵ Kaɓondɔ, kákéni gbútu-gbútu á nyama ákatanɛgɛ. Akeni ndiu gbútu-gbútu á nyama bubui áenganɛ.

²⁶ Aoɓá gbútuka á nyama moci n'aosamba, gbútuka bui â phɔtɔ osamba. Aoɓá gbútuka á nyama moci n'anobebɔ, gbútuka bui áoɓá na maseye kimoci na yɛ.

²⁷ Cɔ, ɓenu ɓɔbu ɓonde nyama á Kiísito. Nkpa na nkpa sɔsɔɓɛ anu, ande gbútuka á nyama ndɔɔ.

²⁸ Kaɓondɔ unge, Mokonga aebisi k'ama mosá-mosá ɓateki suɓi á kanisa, mbusa áǒbisa ɓaɔtu-nyɔngɔ ndea Mokonga, mpɔ, ɓagoisigi, mbusa aɓɔ, ɓatɔtɔkisigi-ketangaɔ, ɓaamisigi ɓato á esambɔ, mpɔ, ɓato á enga á ɓakpa ɓunɛngbo, ɓaɗigimisi ekuma, mbusa, ɓato á yɔnga ɛyɔngi nde ɓakpa ɓunɛngbo ɓánáoúba.

²⁹ Cɔ, ɓakpa ɓɔbu ɓáká ɓateki, ɓaɔtu-nyɔngɔ ndea Mokonga, ɓagoisigi, ɓatɔtɔkisigi-ketangaɔ,

³⁰ ɓaamisigi ɓato ésambɔ, ɓáyɔngi ɛyɔngi nde ɓakpa ɓánáoúba, ɓɔ ɓáunge ɓáoketia ɛyɔngi ndɔɔ.

³¹ Cɔ, mɔphɛ anu áɓɛ phɔ́ k'égabɔ nde aánjá phɛɛ. Kɛ̌kɛnde gǎkɛ, nekophangiande aphe nde aánjá kɔnyɛ́nya bui.